మహిళలకు స్కిల్‌ డెవలప్‌మెంట్‌ సెంటర్‌

మహిళలకు స్కిల్‌ డెవలప్‌మెంట్‌ సెంటర్‌

నర్సాపూర్‌ రూరల్‌: జిల్లాలో మహిళా సంఘాల కోసం స్కిల్‌ డెవలప్‌మెంట్‌ సెంటర్‌ ఏర్పాటు చేస్తామని జిల్లా ఇన్‌చార్జి మంత్రి వివేక్‌ వెంకటస్వామి అన్నారు. శనివారం పట్టణంలోని సాయికృష్ణ గార్డెన్‌లో కల్యాణలక్ష్మి, షాదీ ముబారక్‌ చెక్కులతో పాటు ఇందిరమ్మ చీరలను పంపిణీ చేశారు. ఈసందర్భంగా ఆయన మాట్లాడుతూ.. ప్రభుత్వం రూ. 12 వేల కోట్లు ఖర్చు పెట్టి సన్న బియ్యం, రూ. 8 వేల కోట్లతో మహిళలకు ఉచిత బస్సు సౌకర్యం కల్పిస్తుందన్నారు. దీంతో పాటు జిల్లాలో ఇందిరమ్మ ఇళ్ల నిర్మాణానికి రూ. 450 కోట్లు మంజూరు చేశామన్నారు. ఇప్పటికే రూ. 53 కోట్ల బిల్లులు అందించామని తెలిపారు. ఇందిరమ్మ చీరలతో మహిళల కళ్లల్లో ఆనందం వెల్లివిరుస్తుందన్నారు. ఆడపడుచులు ఆర్థికంగా ఎదిగేందుకు రూ. 21 కోట్ల వడ్డీ లేని రుణాలను ఇస్తున్నట్లు చెప్పారు. కార్యక్రమానికి ఆలస్యంగా వచ్చినందుకు క్షమించాలని మంత్రి మహిళలను కోరారు. అనంతరం ఎమ్మెల్యే సునీతారెడ్డి మాట్లాడుతూ.. మధ్యాహ్నం 12 గంటల నుంచి సాయంత్రం 5 గంటల వరకు మహిళలకు భోజనం పెట్టకుండా కూర్చోబెట్టడాన్ని తప్పు బట్టారు. జిల్లాలోని సింగూరు, ఘనపురం, హల్దీ ప్రాజెక్టుల ద్వారా రెండో పంట రబీ సీజన్‌కు నీరు అందించేలా చర్యలు తీసుకోవాలని కోరారు. ఖరీఫ్‌లో పంట నష్టపోయిన రైతులకు ఎకరాకు రూ. 25 వేల నష్ట పరిహారం చెల్లించాలన్నారు. బోనస్‌ డబ్బులను రైతుల ఖాతాల్లో జమ చేయాలని, వర్షాలకు ధ్వంసమైన రోడ్లకు వెంటనే మరమ్మతులు చేపట్టాలన్నారు. అనంతరం రాయరావు చెరువులో మంత్రి చేపలు వదిలారు. కార్యక్రమంలో కలెక్టర్‌ రాహుల్‌రాజ్‌, జిల్లా గ్రంథాలయ సంస్థ చైర్‌పర్సన్‌ సుహాసినిరెడ్డి, డీసీసీ అధ్యక్షుడు ఆంజనేయులు గౌడ్‌, నియోజకవర్గ కాంగ్రెస్‌ ఇన్‌చార్జి ఆవుల రాజిరెడ్డి, అధికారులు పాల్గొన్నారు.

జిల్లా ఇన్‌చార్జి మంత్రి వివేక్‌