మొసళ్ల సంచారం..

చేపల వేటకు అంతరాయం

చేగుంట(తూప్రాన్‌): మండలంలోని వడియారం ఊర చెరువులో 10 రోజుల క్రితం రెండు మొసళ్లు కనిపించాయి. నాటి నుంచి గ్రామస్తులు చెరువు వద్దకు వెళ్లేందుకు జంకుతున్నారు. చెరువులో 50 గంగపుత్ర కుటుంబాలు చేపలు పట్టుకొని మార్కెట్‌లో విక్రయించి ఉపాధి పొందుతారు. కాగా మొసళ్ల సంచారం గుర్తించిన నాటి నుంచి చేపల వేటను మానేశారు. మొసళ్లను పట్టుకునేందుకు ప్రయత్నిస్తున్నారు. ఒక్కో మొసలి రోజుకు దాదాపు 15 కేజీల వరకు చేపలను తినేస్తుందని వాపోతున్నారు. వేలాది రూపాయల ఆదాయం కోల్పోయే ప్రమాదం ఉందంటున్నారు. అయితే అటవీశాఖ అధికారులు మొసళ్లను పట్టుకునేందుకు ఇద్దరు అటవీశాఖ సిబ్బందిని గ్రామానికి పంపించేందుకు సన్నాహాలు చేస్తున్నారు.