స్వాహాకార సంఘం

ఈ చిత్రంలోని రైతు పేరు సిద్దిరాంరెడ్డి. చిన్నశంకరంపేట మండలం ధరిపల్లి గ్రామం. 2020లో చందంపేట సహకార సంఘంలో తన పేరున రూ. 1.50 లక్షలు, తన భార్య భాగ్యలక్ష్మి పేరుపై రూ. 1.50 లక్షల పంట రుణం తీసుకున్నాడు. ఏటా సకాలంలో రుణం రెన్యువల్‌ చేయడంతో పాటు వడ్డీ చెల్లిస్తూ వస్తున్నాడు. అయితే సకాలంలో రుణం చెల్లించిన వారికి 5 శాతం వడ్డీ డబ్బులు తిరిగి వస్తాయి. కానీ ఈ రైతుకు ఎప్పుడూ తిరిగి ఇవ్వలేదు. గత నెలలో పంట రుణం పూర్తిగా చెల్లించేందుకు కార్యాలయానికి వెళ్లాడు. ఇద్దరివి కలిపి రూ. 4.50 లక్షలు చెల్లించి రసీదు తీసుకున్నాడు. అనంతరం తన అకౌంట్‌ స్టేట్‌మెంట్‌ కావాలని అడగగా, సీఈఓ పాషా తాత్సారం చేశాడు. వారం రోజుల క్రితం గట్టిగా నిలదీయగా, రూ. 70 వేలు ఇచ్చేందుకు అంగీకరించాడు. అయితే గ్రామస్తుల సమక్షంలో తప్పును ఒప్పుకొని, డబ్బులు చెల్లించాలని రైతు చెప్పడంతో ముఖం చాటేశాడు. దీంతో డీసీఓ కరుణాకర్‌కు ఫిర్యాదు చేసి విచారణ చేపట్టాలని రైతు కోరాడు. ఇలాంటి సంఘటనలు పీఏసీఎస్‌లో అనేకం జరిగాయని, స్టేట్‌మెంట్‌ అడిగినా ఇవ్వడం లేదని రైతులు వాపోతున్నారు.

చిన్నశంకరంపేట(మెదక్‌): చందంపేట సహకార సంఘంలో నిధుల దుర్వినియోగం జరిగినట్లు ఆరోపణలు వెల్లువెత్తుతున్నాయి. అలాగే రైతుల ఖాతాల నుంచి వారికి తెలియకుండానే డబ్బులు మళ్లించినట్లు తెలు స్తోంది. ఈక్రమంలో లాభాల్లో ఉన్న సొసైటీ నష్టాల బాట పట్టింది. ఇదే విషయంపై బుధవారం చైర్మన్‌ చింతల సత్యంపై డైరెక్టర్లు అవిశ్వాస తీర్మానం ప్రవేశపెట్టగా, గురువారం సహకార సంఘం సీఈఓ పాషాపై డీసీఓ కరుణాకర్‌కు ఫిర్యాదు అందింది. దీంతో సొసైటీలో అక్రమాలు ఒక్కొక్కటిగా బయటకు వస్తున్నాయి. రైతుల ఖాతాల నుంచి నేరుగా డబ్బులు డ్రా చేయడంతో పాటు సకాలంలో రుణం చెల్లించిన వారికి వచ్చే రిబేట్‌ డబ్బులు కూడా మాయం చేశారని రైతులు ఆరోపిస్తున్నారు.

లాభాల నుంచి నష్టాల్లోకి..

సహకార సంఘంలో ఐదేళ్ల క్రితం రూ. 1.80 లక్షల మిగులు బడ్జెట్‌ ఉండగా, పాలకవర్గం ఏర్పాటు తర్వాత నష్టాల్లో కూరుకుపోయింది. ఐదేళ్లలో ధాన్యం కొనుగోలు కేంద్రాల నిర్వహణతో వచ్చిన లాభాల లెక్కలు చూపడం లేదు. ఆరు నెలలుగా సిబ్బంది వేతనాలు ఇవ్వడం లేదని, ఇదేమని అడిగితే డబ్బులు లేవని చెబుతున్నారని డైరెక్టర్లు చెబుతున్నారు. నిధుల దుర్వినియోగంతో పాటు పీఏసీఎస్‌ ఫర్టిలైజర్‌ వ్యాపారం డబ్బు లు సైతం ప్రస్తుతం ఖాతాలో లేవని ఫిర్యా దులో పేర్కొన్నారు.

చర్యలు తీసుకుంటాం

చందంపేట సహకార సంఘంలో నిధుల దుర్వినియోగంతో పాటు సీ ఈఓ పాషా అక్రమాలపై విచారణ చేపడతాం. నిధులు దుర్వినియోగం అయినట్లు తేలితే చర్యలు తీసుకొని, నిధులు రికవరీ చేస్తాం.

– కరుణాకర్‌, డీసీఓ

చందంపేట పీఏసీఎస్‌లో అక్రమాలు

స్వాహాకార సంఘం