ఇబ్బందులు తలెత్తనీయొద్దు

చేగుంట(తూప్రాన్‌): ఆర్వోబీ నిర్మాణం కోసం మండల కేంద్రంలోని రైల్వేగేట్‌ పరిసరాలను పలుశాఖల అధికారులు గురువారం పరిశీలించారు. ఈసందర్భంగా రైల్వేశాఖ అధికారులు జగదీశ్‌, సుధాకర్‌ రోడ్డుకు ఇరువైపులా ఉన్న అడ్డంకులు తొలగించాలని, వాహనదారులకు ఇబ్బంది లేకుండా తాత్కాలిక రోడ్డు సౌకర్యం ఏర్పాటుచేయాలని ఆర్‌అండ్‌బీ అధికారులను కోరారు. ఆర్వోబీ నిర్మాణానికి అనుకూలంగా ఉండేలా విద్యుత్‌ లైన్లు సరిచేసుకోవాలని సంబంధిత అధికారులకు సూచించారు. మిషన్‌ భగీరథ అధికారులు నీటి సరఫరా పైపులైన్లు అదనంగా వేసుకోవాలని తెలిపారు. రైల్వేగేట్‌ మూసివేస్తే వాహనదారులకు ఇబ్బంది లేకుండా తాత్కాలిక రోడ్డు సౌకర్యం, దారి మళ్లింపు చర్యల కోసం పోలీస్‌శాఖ సహకరించాలని కోరారు. ఎస్‌ఐ చైతన్యకుమార్‌రెడ్డి, ఫారెస్ట్‌ సెక్షన్‌ ఆఫీసర్‌ కిరణ్‌కుమార్‌, ఆర్‌అండ్‌బీ డీఈ నాగరాజు, బీజేపీ నాయకులు భూపాల్‌ చంద్రశేఖర్‌, రతన్‌ పాల్గొన్నారు.