లంచావతారులు!

● నెల నెలా మామూళ్ల వసూళ్లు ● పర్సంటేజీలు లేనిదే పాస్‌ కాని బిల్లులు ● ఉమ్మడి జిల్లాలో ఈ ఏడాది13 ఏసీబీ కేసులు నమోదు

పోలీస్‌, ఎకై ్సజ్‌, రెవెన్యూ, విద్యుత్‌శాఖలలో అవినీతి కంపు

మెదక్‌ అర్బన్‌: టేక్మాల్‌.. మెదక్‌ రూరల్‌.. హవేళిఘణాపూర్‌ ఎస్సైలు.. మెదక్‌ మున్సిపల్‌ ఉద్యోగి.. ట్రాన్స్‌కో ఏఈ, డీఈ.. ఇలా జిల్లాలోని వివిధ ప్రభుత్వశాఖల్లో పని చేస్తున్న కొంతమంది అధికారులు లంచాల రుచి మరిగారు. అవినీతి నిరోధకశాఖ మెరుపు దాడులు జరుపుతున్నా.. తీరు మార్చుకోవడం లేదు. మెతుకుసీమలో రోజురోజుకూ అవినీతి దందా హద్దులు దాటుతోంది. పోలీస్‌, ఎకై ్సజ్‌, రెవెన్యూ, విద్యుత్‌శాఖలలో అవి నీతి కంపు రాజ్యమేలుతుంది. పంచాయతీరాజ్‌, ఇరిగేషన్‌, రోడ్డు భవనాలు, వైద్యారోగ్య శాఖల్లో పర్సంటేజీలు ఇస్తే గాని బిల్లులు పాస్‌ కావడం లేదు. ఆర్టీఏ, రిజిస్ట్రేషన్‌ కార్యాలయాల్లో రోజూ కమీషన్ల రూపంలో కాసుల వర్షం కురుస్తోంది. ఈ ఏడాది ఇప్పటివరకు ఉమ్మడి జిల్లాలో 13 ఏసీబీ కేసులు నమోదయ్యాయి. మెదక్‌ జిల్లాలో 5, సంగారెడ్డిలో 3, సిద్దిపేటలో 5గురిని ఏసీబీ అధికారులు ట్రాప్‌ చేశారు.

● పోలీస్‌ అధికారులకు ప్రతి నెలా వైన్స్‌, కల్లు దుకాణాలు, ఇసుక వ్యాపారుల నుంచి ముడుపులు అందుతున్నాయి. ఇక కేసు కట్టాలన్నా.. రాజీ చేయాలన్నా కాసులే కావాలి. ఇక రోడ్డు ప్రమాదాలు అయితే పండగే. వాహనానికి స్టేషన్‌ బెయిల్‌ ఇవ్వాలంటే వేలాది రూపాయలు చెల్లించుకోవాల్సిందే. ఇలా పోలీస్‌స్టేషన్‌ను బట్టి ఎంతలేదన్నా సరాసరిగా నెలకు రూ. 60 వేల నుంచి రూ. 80 వేల వరకు ఆదాయం ఉంటుందని సమాచారం.

● ఎకై ్సజ్‌ అధికారుల రూటే సపరేటు. వైన్స్‌షాపులు కొత్తగా అలాట్‌ కాగానే రూ. 3 లక్షల గుడ్‌ విల్‌, నెలకు రూ. 20 వేల మామూలు, ఆరు నెలలకోసారి ఎస్టీఎఫ్‌, డీటీఎఫ్‌లకు రూ. 45 వేల చొప్పున చెల్లించుకోవాల్సిందే. ఇక కల్లు దుకాణాల నుంచి వారి అమ్మకాన్ని బట్టి నెల నెలా మామూళ్లు ఉంటాయి. ఏవైనా కేసులు అయితే సెటిల్‌మెంట్‌ రేటు అదనం.

● ఇక రెవెన్యూశాఖ మెట్లు ఎక్కితే ముడుపులు ఇచ్చుకోవాల్సిందే. భూ పహాణీ, సాదాబైనామాలు, రిజిస్ట్రేషన్లు, పెండింగ్‌ సక్సెషన్లు, మిస్సింగ్‌ ల్యాండ్స్‌, ఇతర భూసమస్యలపై డబ్బులు ముట్టజెప్పాల్సిందే.

● రిజస్ట్రేషన్ల శాఖలో కూడా బ్రోకర్ల హవా కొనసాగుతుంది. చాలన్‌తో సంబంధం లేకుండా, వీరు రిజిస్ట్రేషన్‌ చేసుకునే వారి వద్ద డబ్బులు వసూలు చేస్తున్నారు. ఇందులో వేలాది రూపాయలు అదనంగా తీసుకొని, అధికారులు కొంత, బ్రోకర్ల కొంత తీసుకుంటున్నారు. ఇలా రోజుకు ఎంతలేదన్నా రూ. 50 వేల వరకు లంచాల రూపంలో మేస్తారన్న ఆరోపణలున్నాయి.

● ఆర్టీఏలో బ్రోకర్లు, సిబ్బంది కలిసి వాటా లేసి పంచుకుంటున్నారు. రోజుకు వేలాది రూపాయలు చూడనిదే ఇంటికి వెళ్లని పరిస్థితి. అధికారులకు 15 శాతం, సిబ్బందికి 10, జూనియర్‌ అసిస్టెంట్లకు 5 శాతం ఇలా వాటాలకనుగుణంగా కమీషన్లు తీసుకుంటున్నారు. బ్రోకర్‌ వ్యవస్థ రద్దు చేసినప్పటికీ, వారి హవానే కొనసాగుతుంది. ఒక్కో ఏజెంట్‌ ఒక కోడ్‌తో ఫైల్‌ను పంపుతుంటారు.

● ఇక పంచాయతీరాజ్‌, ఇరిగేషన్‌, ఆర్‌అండ్‌బీ, ఆర్‌డబ్ల్యూఎస్‌ అధికారుల బిల్లులు పాస్‌ చేయాలంటే 3నుంచి 6 శాతం ముడుపులు తీసుకుంటున్నారు.

● కొంతకాలం క్రితం మెదక్‌లో జీఎస్టీ ఆఫీసర్‌ అవినీతిపై సీబీఐ కేసు నమోదుచేసింది. ఇలా ఎక్కడ చూసినా అవినీతి కేన్సర్‌లా విస్తరిస్తుంది.

విద్యుత్‌శాఖలో.. దీపం కిందే చీకటి అన్నట్లు అవినీతి దందా కొనసాగుతుంది. కొత్త మీటర్‌ కావాలన్నా, కొత్త కనెక్షన్‌ ఇవ్వాలన్నా, ప్యానల్‌ బోర్డుల ఏర్పాటు చేయాలన్నా కమీషన్లు ఇవ్వాల్సిందే. ట్రాన్స్‌ఫార్మర్ల మంజూరు నుంచి కొత్తలైన్ల ఏర్పాటు, చివరకు పోల్‌ ఎక్కాలన్నా, దిగాలన్నా డబ్బులు కావాల్సిందే. విద్యుత్‌ కాంట్రాక్టర్లు తాము చేసే పనుల్లో సామాగ్రి మిగిల్చుకొని, ఇతరులకు అమ్ముకుంటున్నారు. అధికారులకు కమీషన్లు ఇవ్వందే వీరి బిల్లులు పాస్‌ కావు, వరద నష్టం వల్ల వచ్చిన పోల్స్‌ లెక్కలు ఉండవు. లూజ్‌ లైన్‌లో ఇంటర్‌ పోల్స్‌ లేపాల్సిండగా వాటి సమాచారం ఉండదు.

మెదక్‌ వైద్యారోగ్యశాఖలో.. సుమారు 200కు పైగా ఉద్యోగుల మెడికల్‌ రీయింబర్స్‌మెంట్‌ బిల్లులు పెండింగ్‌లో ఉన్నట్లు తెలుస్తోంది. అందులో పనిచేసే ఒక ఉద్యోగి రూ. 3 వేలు ఇస్తేనే బిల్లు తయారు చేసి అధికారి ముందు పెడతానని ముఖం ముందే చెబుతున్నట్లు బాధితులు వాపోతున్నారు.