ఆ డబ్బులు ఏమయ్యాయి?

పీఎంశ్రీ నిధులపై హెచ్‌ఎంను ప్రశ్నించిన విద్యార్థులు

కౌడిపల్లి(నర్సాపూర్‌): కార్పొరేట్‌కు దీటుగా ప్రభుత్వ బడుల్లో మౌలిక వసతులు కల్పించేందుకు కేంద్ర ప్రభుత్వం పీఎంశ్రీ పథకం ద్వారా పాఠశాలల అభివృద్ధికి నిధులు కేటాయించింది. అందులో భాగంగా కౌడిపల్లి ఉన్నత పాఠశాలకు గతేడాది రూ. 9.50 లక్షలు మంజూరు చేసింది. వీటిని అప్పటి ఇన్‌చార్జి హెచ్‌ఎం, సీనియర్‌ ఉపాధ్యాయు డి పేరున బ్యాంక్‌ ఖాతా ఓపెన్‌ చేసి నిధులు ఖర్చుచేశారు. ఇందులో కిచెన్‌ గార్డెన్‌ ఏర్పాటుకు రూ. 50 వేలు ఖర్చుచేసినట్లు లెక్కలు చూపించారు. అయితే అక్కడ మొక్కల అనవాళ్లు కనిపించడం లేదు. బోర్డు, జాలీ మాత్రమే దర్శనమిస్తున్నాయి. అలాగే పదో తరగతి విద్యార్థులకు స్నాక్స్‌ కోసం రూ. 60 వేలు, విహారయాత్రకు రూ. 2.16 లక్షలు ఖర్చు అయినట్లు లెక్కలు చూపించారు. అంత ఖర్చుకాలేదన్న ఆరోపణలు ఉన్నాయి. పాఠశాల వార్షికోత్సవానికి రూ. 50 వేలు ఖర్చు చేసినట్లు చెబుతుండగా, అప్పటి పదో తరగతి విద్యార్థుల సొంతంగా డబ్బులు జమచేసి చేశామని చెబుతున్నారు. చేసిన పనులకు.. బిల్లులకు పొంతనలేదని, పెద్దమొత్తంలో నిధులు గోల్‌మాల్‌ అయ్యాయని విద్యార్థులు ఆరోపిస్తున్నా రు. పాఠశాలకు పీఎంశ్రీ నిధులు ఎన్ని మంజూరయ్యాయి. ఎంత ఖర్చుచేశారనే వివరాలు కావాలని పలుమార్లు అడిగినా అప్పటి హెచ్‌ఎం చెప్పలేదని, వాటికి సంబంధించిన వివరాలు చెప్పాలని బుధవారం హెచ్‌ఎం లలితాదేవిని ప్రశ్నించారు. పీఎంశ్రీ నిధులు ఖర్చుచేసినప్పుడు తాను సెలవులో ఉన్నానని, అప్పుడు ఇన్‌చార్జి హెచ్‌ఎంగా పద్మజ బాధ్యతలు నిర్వర్తించారని బదులిచ్చారు. ప్రస్తుతం ఆమె సెలవులో ఉన్నందున రాగానే వివరాలు అడిగి చెబుతానన్నారు.