నిధులిచ్చినా ఖర్చు చేయరేం?

● అధికారులపై ఎంపీ రఘునందన్‌రావు ఆగ్రహం ● వాడీవేడిగా దిశ సమావేశం

మెదక్‌జోన్‌: నిధులు మంజూరు చేసినా.. నేటికీ అభివృద్ధికి ఖర్చు చేయకపోవడం ఎంతవరకు సమంజసమని అధికారులపై ఎంపీ రఘునందన్‌రావు మండిపడ్డారు. బుధవారం కలెక్టరేట్‌లో ఏర్పాటుచేసిన జిల్లా అభివృద్ధి సహకార, మానిటరింగ్‌ కమిటీ (దిశ) సమావేశానికి ఆయన ముఖ్య అతిథిగా హాజరై మాట్లాడారు. 2014లో ఎంపీ కొత్త ప్రభాకర్‌రెడ్డి, రాజ్యసభ సభ్యులు ఆనందభాస్కర్‌, రేణుకాచౌదరితో పాటు తాను సైతం జిల్లా అభివృద్ధికి మంజూరు చేసిన నిధుల్లో సింహాభాగం ఖర్చుచేయకపోవడం సరికాదన్నారు. వాటిని వెంటనే అభివృద్ధికి ఖర్చుచేయాలని ఆదేశించారు. గత ప్రభుత్వం నిర్మించిన డబుల్‌బెడ్రూంలు అలాగే వదిలేశారని, వాటిని పేదలకు పంపిణీ చేయాలన్నారు. కేంద్ర ప్రభుత్వ పథకాలను సమర్థవంతంగా అమలు చేయాలన్నారు. వ్యవసాయ రంగ అభివృద్ధికి కేంద్రం రూ. 2 కోట్లు మంజూరు చేసిందని, వాటిని ఉపయోగించకపోవటంపై ఆగ్రహం వ్యక్తం చేశారు. చేగుంటలోని ఆగ్రోసెంటర్‌ నిర్వాహకుడు యూ రియా బస్తా ఇవ్వాలంటే ఇతర మందులను కొనుగోలు చేయాలనే నిబంధనతో రైతులకు ఇతర మందులు అంటగట్టాడని, ఈ విషయంపై తాను స్వయంగా ఫిర్యాదు చేసినా ఎందుకు స్పందించలేదని నిలదీశారు. చేగుంట ఆర్వోబీ నిర్మాణానికి నిధులు మంజూరు చేయించానని, అందుకు సంబంధించి అన్నిశాఖల అధికారులు త్వరలో సమావేశం నిర్వహించి పనులు ప్రారంభించాలని సూచించారు. జిల్లాలో పీఎంశ్రీ నిధులు పక్కదారి పట్టినట్లు తెలిసిందని, వాటిపై వెంటనే చర్యలు తీసుకోవాలని విద్యాశాఖ అధికారులను ఆదేశించారు. మెదక్‌లో కేన్సర్‌ ఆస్పత్రిని నిర్మించిచేందుకు వెయ్యి గజాల స్థలం కావాలని కోరగా, అందుకు కలెక్టర్‌ చూపిస్తామని తెలిపారు. సమావేశంలో డీఆర్‌ఓ భుజంగరావు, డీఆర్‌డీఓ శ్రీనివాసరావుతో పాటు జిల్లా అధికారులు సిబ్బంది పాల్గొన్నారు.