సందేహాలెన్నో!

బీసీ రిజర్వేషన్లు..

పంచాయతీ ఎన్నికల్లో బీసీలకు 42% రిజర్వేషన్ల అమలుపై రాజకీయనాయకుల్లో పలు సందేహాలు తలెత్తుతున్నాయి. ఈ పంచాయతీ ఎన్నికల్లో కచ్చితంగా బీసీలకు 42% రిజర్వేషన్లు అమలు చేస్తామన్న ప్రభుత్వ ప్రకటన కేవలం శుష్కవాగ్దానమేనా లేక చిత్తశుద్ధితో చేసిందోనన్న సంశయం ఇప్పుడు అన్ని రాజకీయపార్టీల నేతల మదిని తొలిచేస్తోంది.

మెదక్‌ అర్బన్‌: బీసీ రిజర్వేషన్లపై కోర్టు తీర్పు నేపథ్యంలో 50% కోటాను దాటకుండా తొలుత పంచాయతీ ఎన్నికలు నిర్వహించాలని ఇటీవల మంత్రివర్గం నిర్ణయం తీసుకున్న సంగతి తెలిసిందే. ఈ నిర్ణయంతో ఇటీవల ప్రకటించిన రిజర్వేషన్లు కూడా మారనున్నట్లు తెలుస్తోంది. కాంగ్రెస్‌ తరఫున 42% రిజర్వేషన్లను బీసీలకు కల్పించే ఉద్ధేశ్యంతో ముందుకెళ్తామని రేవంత్‌ సర్కార్‌ స్పష్టం చేసింది. అయితే ఇప్పటివరకు సర్పంచ్‌, వార్డ్‌ మెంబర్లకు పార్టీ రహితంగా ఎన్నికలు జరిగాయి. పార్టీ బీఫాం గుర్తులుండవు. గ్రామస్థాయి రాజకీయాలు కూడా, పార్టీకన్నా, వ్యక్తిగత సంబంధాలపై ఆధారపడి ఉంటాయి. ఈ నేపథ్యంలో గ్రామస్థాయిలో పార్టీ ప్రాతిపదికన రిజర్వేషన్లు అనేక సమస్యలకు దారి తీసే అవకాశం ఉందన్న అభిప్రాయాలు వ్యక్త మవుతున్నాయి. ఈసారి ఇద్దరు పిల్లల నిబంధన ఎత్తివేస్తూ ప్రభుత్వం సోమవారం గెజిట్‌ విడుదల చేయడంతో 1995 నుంచి ఎన్నికల్లో పోటీ చేయడానికి అర్హత లేని అభ్యర్థులకు కొత్త అవకాఽశం లభించినట్లైంది.

ప్రత్యేకపాలనలో రాని నిధులు

మెదక్‌ జిల్లాలో 492 గ్రామపంచాయతీల్లో 5,24,451 ఓటర్లున్నారు. గత సర్పంచ్‌ల పదవీకాలం 31 జనవరి 2024లో ముగియడంతో ఫిబ్రవరి 1 నుంచి గ్రామపంచాయతీల్లో ప్రత్యేక పాలన మొదలైంది. అప్పట్నుంచీ 15వ ఆర్థిక సంఘం ద్వారా రావాల్సిన నిధులు రావడం లేదు. వచ్చే ఏడాది మార్చి వరకు ఎన్నికలు జరగకపోతే నిధులు మురిగిపోయే ప్రమాదముంది. డిసెంబర్‌ రెండో వారంలో షెడ్యూల్‌ ప్రకటించి, ఎన్నికలు నిర్వహించాలని నిర్ణయించారు.

రిజర్వేషన్లు మార్పు..

గతంలో ప్రకటించిన రిజర్వేషన్లు మారనున్నాయి. బీసీ రిజర్వేషన్లను 42% నుంచి 22 శాతానికి తగ్గిస్తారు. మిగిలిన 20% జనరల్‌ కేటగిరీలో కలుపుతూ మళ్లీ స్థానాల జాబితాను పంచాయతీరాజ్‌శాఖ తయారు చేస్తుంది. బీసీ స్థానాల ఖరారుకు డెడికేషన్‌ కమిషన్‌ నివేదికను ప్రామాణికంగా తీసుకుంటారు. మొదట పంచాయతీ ఎన్నికలను మూడు దశల్లో నిర్వహించే అవకాశం ఉంది. అనంతరం ఎంపీటీసీ,జెడ్పీటీసీ ఎన్నికలు నిర్వహించనున్నారు.

పంచాయతీ పోరులో ఇవి అమలు సాధ్యమేనా?

మంత్రి వర్గ నిర్ణయంతో మారనున్న రిజర్వేషన్లు!

ఇప్పటికే పల్లెల్లో మొదలైన ఎన్నికల వేడి

ఇద్దరు పిల్లల నిబంధన ఎత్తివేత

పార్టీపరంగా రిజర్వేషన్లు సాధ్యమేనా!

పంచాయతీ ఎన్నికలు పార్టీ రహితంగా జరుగుతాయి. బీఫాంలు, పార్టీ గుర్తులు ఉండవు. కానీ అధికార పార్టీ పంచాయతీ ఎన్నికల్లో సర్పంచ్‌, వార్డ్‌ మెంబర్‌ అభ్యర్థులకు పార్టీ పరంగా 42% రిజర్వేషన్లు ఇస్తామని ప్రకటిచండం ఆశ్చర్యానికి గురి చేస్తోంది. గ్రామస్థాయి రాజకీయాలు పార్టీ ప్రాతిపదికన కాకుండా, వ్యక్తిగత పరపతిని బట్టి ప్రభావం చూపుతాయి. పార్టీ ప్రతిపాదించిన వ్యక్తే ఎన్నికల్లో పోటీ చేసే అవకాశం ఉండదు. అదే పార్టీ నుంచి మరో వ్యక్తి, సర్పంచ్‌, వార్డ్‌ మెంబర్‌గా పోటీచేసే అవకాశం ఉంటుంది. దీంతో పార్టీ అభ్యర్థులను నిర్ధారించడం కష్టంగానే ఉంటుందని పలువురు కాంగ్రెస్‌ పార్టీ కార్యకర్తలు అభిప్రాయ పడుతున్నారు. మొత్తమ్మీద పంచాయతీ ఎన్నికల ప్రకటన కార్యకర్తలను గందరగోళానికి గురి చేస్తోంది. అయితే ఎన్నికలు ఎప్పుడు నిర్వహించినా అధికార వర్గాలు సిద్ధంగా ఉన్నాయి.