విద్యార్థులకు బ్యాంకు ఖాతాలు

రేగోడ్‌(మెదక్‌): మండలంలోని ఆయా విద్యాసంస్థలలో చదువుకుంటున్న విద్యార్థులకు తెలంగాణ గ్రామీణ బ్యాంకు ఆధ్వర్యంలో ఖాతాలను తెరిచారు. ఈ మేరకు పాస్‌బుక్స్‌ను బ్యాంకు మేనేజర్‌ రాజేష్‌కుమార్‌, క్యాషియర్‌ ఉదయ్‌కుమార్‌ మంగళవారం అందజేశారు. మోడల్‌స్కూల్‌లో 116, జిల్లా పరిషత్‌ ఉన్నత పాఠశాలలో 25, కస్తూర్బాలో 17 మంది విద్యార్థులకు బ్యాంకు ఖాతాలను తెరిచినట్లు తెలిపారు. విద్యార్థులు సైబర్‌ నేరగాళ్ల ఉచ్చులో పడవద్దని, ఎవరికి ఓటీపిలు చెప్పవద్దని, అనవసర లింక్‌లను ఓపెన్‌చేయవద్దని వారు సూచించారు. కార్యక్రమంలో ప్రిన్సిపాల్‌ ప్రవీణ, సీఆర్‌పీ సంతోష్‌, ఎఫ్‌ఎల్‌సీలు అజయ్‌కుమార్‌, మహేశ్‌ తదితరులు ఉన్నారు.

మెదక్‌జోన్‌: క్రీడల్లో గెలుపోటములు సహజమేనని, ఓటమి విజయానికి సోపానమని ఇన్‌చార్జి డీఈఓ విజయ పేర్కొన్నారు. పాఠశాల క్రీడా సమాఖ్య ఆధ్వర్యంలో మంగళవారం ఉమ్మడి మెదక్‌ జిల్లా తెలంగాణ సాంఘిక సంక్షేమ వసతిగృహాలకు చెందిన అండర్‌ 14–17 బాల, బాలికలకు స్థానిక జూనియర్‌ కళాశాల మైదానంలో ఖోఖో క్రీడా పోటీలను నిర్వహించారు. ఇందులో ప్రతిభ కనబర్చిన వారిని అభినందించారు. జిల్లా స్థాయిలో రాణించిన వారికి ఇదే నెల 23 నుంచి 25వ తేదీ వరకు యాదాద్రి భువనగిరి జిల్లాలో జరగనున్న రాష్ట్ర స్థాయి పోటీలలో పాల్గొంటారని తెలిపారు. కార్యక్రమంలో పీఈటీల సంఘం రాష్ట్ర కార్యనిర్వాహక అధ్యక్షుడు నాగరాజు, పీడీలు మాధవరెడ్డి, శ్రీకాంత్‌ గౌడ్‌, శ్రీధర్‌ రెడ్డి, సుజాత, అఫ్రీన్‌ ఫాతిమా పాల్గొన్నారు.

కౌడిపల్లి(నర్సాపూర్‌): రాష్ట్రస్థాయి పోటీలకు ముగ్గురు ఎస్టీ గురుకుల విద్యార్థులు ఎంపికయ్యారు. మంగళవారం మండల కేంద్రమైన కౌడిపల్లి ఎస్టీ గురుకుల పాఠశాల, కళాశాల ప్రిన్సిపాల్‌ ఫణికుమార్‌, ఉపాధ్యాయులు విద్యార్థులను సన్మానించారు. ఈ సందర్భంగా ఆయన మాట్లాడుతూ సంగారెడ్డి జిల్లా నిజాంపేటలో జరిగిన జిల్లాస్థాయి ఎస్‌జీఎఫ్‌ పోటీలలో ఎస్టీగురుకుల విద్యార్థి పాండు రెజ్లింగ్‌లో, నరేందర్‌నాయక్‌ షాట్‌పుట్‌లో, సిద్దార్థ్‌ లాంగ్‌జంప్‌లో సత్తాచాటి రాష్ట్రస్థాయి పోటీలకు ఎంపిక అయినట్లు చెప్పారు. కార్యక్రమంలో పీడీ రామకృష్ణ, పీఈటీ ఆంజనేయులు, ఉపాధ్యాయులు, విద్యార్థులు పాల్గొన్నారు.

ప్రశాంత్‌నగర్‌(సిద్దిపేట): టెట్‌ నుంచి ఉపాధ్యాయులను మినహాయించాలని పీఆర్టీయూ రాష్ట్ర అధికార ప్రతినిధి వంగ మహేందర్‌రెడ్డి డిమాండ్‌ చేశారు. మంగళవారం ఆయన మీడియాతో మాట్లాడుతూ సుప్రీంకోర్టు ఇచ్చిన తీర్పు ప్రకారం ఉపాధ్యాయులందరూ ఉద్యోగంలో కొనసాగాలంటే రెండేళ్ల లోపు తప్పనిసరిగా టెట్‌ పాస్‌ కావాలన్న నిబంధనను పూర్తిగా తొలగించాలన్నారు. 25, 30 సంవత్సరాల సర్వీసు కలిగిన ఉపాధ్యాయులు టెట్‌ రాసి ఉత్తీర్ణత కావడం అంటే ఇబ్బందికరమన్నారు. టెట్‌ పై చట్టసవరణ చేయాలని కోరుతూ ఉపాధ్యాయ ఎమ్మెల్సీ పింగిలి శ్రీపాల్‌ రెడ్డి, పీఆర్టీయూ రాష్ట్ర అధ్యక్ష ప్రధాన కార్యదర్శులు పులగం దామోదర్‌ రెడ్డి, సుంకరి భిక్షం గౌడ్‌లు కేంద్ర మానవవనరులశాఖ మంత్రిని, ఇతర మంత్రులను కలుస్తున్నట్లు తెలిపారు.

ప్రశాంత్‌నగర్‌(సిద్దిపేట): గజ్వేల్‌లోని మైనారిటీ గురుకుల బాలికల పాఠశాల, జూనియర్‌ కళాశాలలో ఔట్‌ సోర్సింగ్‌ పద్ధతిలో బోధించుటకు అర్హులైన మహిళా అభ్యర్థుల నుంచి దరఖాస్తులు ఆహ్వానిస్తున్నట్లు మైనార్టీ సంక్షేమశాఖ అధికారి నాగరాజమ్మ పేర్కొన్నారు. పీజీటీ ఫిజిక్స్‌ (1), జూనియర్‌ లెక్చరర్‌ గణితం (1) ఖాళీలు ఉన్నాయన్నారు. అర్హత కల్గిన మహిళలు ఈ నెల 24 సాయంత్రం 5గంటల లోపు గురుకుల పాఠశాలలో దరఖాస్తులు అందించాలన్నారు.

విద్యార్థులకు బ్యాంకు ఖాతాలు

విద్యార్థులకు బ్యాంకు ఖాతాలు