ప్రతీ విద్యార్థి మరో ముగ్గురికి చెప్పాలి

● పోక్సో చట్టంపై అవగాహన కల్పించాలి

● బాలికల రక్షణకే చట్టం: ఏఎస్పీ మహేందర్‌

మెదక్‌ మున్సిపాలిటీ: పిల్లలపై జరిగే అకృత్యాలు, లైంగిక దాడులు అరకట్టేందుకే ప్రభుత్వం పోక్సో చట్టం అమల్లోకి అదనపు ఎస్పీ మహేందర్‌ తెలిపారు. మంగళవారం మెదక్‌ పట్టణంలోని బాలికల సాంఘిక సంక్షేమ గురుకుల పాఠశాలలో భరోసా ఆధ్వర్యంలో ఏర్పాటు చేసిన అవగాహన సదస్సులో ఆయన మాట్లాడారు. పిల్లలపై జరిగే నేరాలను నివారించడానికి అవగాహన సదస్సులు నిర్వహిస్తామని చెప్పారు. ప్రతి విద్యార్థి మరో ముగ్గురికి పోక్సో చట్టాలపై అవగాహన కల్పించాలని సూచించారు. మహిళల భద్రత, బాలికల రక్షణ, చట్టపరమైన సహాయం అందించడంలో భరోసా కేంద్రం కీలక పాత్ర పోషిస్తుందన్నారు. బాలికలు ఎదుర్కొనే సమస్యలను భయపడకుండా పోలీసులకు తెలియజేయాలని, ప్రతీ విద్యార్థి భద్రత కోసం పోలీస్‌ శాఖ పూర్తిస్థాయిలో అందుబాటులో ఉంటుందని ఏఎస్పీ తెలిపారు. అనంతరం మెదక్‌ భరోసా కోఆర్డినేటర్‌ సౌమ్య విద్యార్థులకు పోక్సో చట్టాలపై అవగాహన కల్పించారు. ప్రత్యేకంగా గుడ్‌ టచ్‌ బ్యాడ్‌ టచ్‌ అంశాలను ఉదాహరణలతో వివరించారు. ఈ కార్యక్రమంలో సైబర్‌ క్రైమ్‌ డీఎస్పీ సుభాష్‌ చంద్ర బోస్‌, ఉప్పలయ్య, బాలనర్సింలు, ఇన్‌చార్జి విజయ, స్కూల్‌ ప్రిన్సిపాల్‌ రాధారాణి పాల్గొన్నారు.