సేంద్రియ ఎరువులనే వినియోగించండి

కేవీకే శాస్త్రవేత్త శ్రీనివాస్‌

నర్సాపూర్‌ రూరల్‌: రసాయన ఎరువుల వాడకాన్ని పూర్తిగా తగ్గించి సేంద్రియ ఎరువులతో పంటలు సాగు చేయాలని తుంకి కృషి విజ్ఞాన కేంద్రం సీనియర్‌ శాస్త్రవేత్త శ్రీనివాస్‌ రైతులకు సూచించారు. మంగళవారం నర్సాపూర్‌ మండలం రెడ్డిపల్లిలో మల్లారెడ్డి అగ్రికల్చర్‌ యూనివర్సిటీ విద్యార్థులతో రావే కార్యక్రమంలో భాగంగా పంట పొలాలను సందర్శించారు. ఈ సందర్భంగా మాట్లాడుతూ రసాయన ఎరువుల వాడకంతో భూముల్లో భూసారం పూర్తిగా కోల్పోయి పలు రకాల చీడపీడలు సోకుతున్నాయని తెలిపారు. సేంద్రియ ఎరువుల వాడితే భూసారం పెరిగి మంచి దిగుబడి వచ్చి లాభం పొందవచ్చాన్నారు. సేంద్రియ ఎరువులతో పండించిన పంటలతో ప్రజల ఆరోగ్యం బాగుంటుందన్నారు. అనంతరం మల్లారెడ్డి యూనివర్సిటీ విద్యార్థులు జీవామృతం తయారు చేసే విధానాన్ని ప్రదర్శించి రైతులకు అవగాహన కల్పించారు. కార్యక్రమంలో విద్యార్థులు జాహ్నవి, పవిత్ర, శ్వేత, హరిత, సౌమ్య, వైష్ణవి, రైతులు నిరంజన్‌, సత్యనారాయణ, రాజు, హనుమంత్‌, భిక్షపతి భాస్కర్‌ తదితరులు పాల్గొన్నారు.