కమిటీతోనే కాలయాపన!

‘ఎన్‌డీఎస్‌ఎల్‌’పై సర్కారు మీనమేషాలు

మెదక్‌జోన్‌: కాంగ్రెస్‌ ప్రభుత్వం అధికారంలోకి వచ్చి రెండేళ్లు కావొస్తుంది. ఎన్‌డీఎస్‌ఎల్‌ ఫ్యాక్టరీని స్వాధీనం చేసుకొని నడిపిస్తారా..? లేదా అనే విషయంపై మాత్రం స్పష్టత కరువైంది. ఏడాదిన్నర క్రితం మంత్రి శ్రీధర్‌బాబుతో కమిటీని వేసింది. అందులో మెదక్‌ ఎమ్మెల్యే రోహిత్‌రావును సైతం సభ్యుడుగా నియమించింది. ఈ కమిటీ సిఫారసులకు అనుగుణంగా చర్యలు తీసుకుంటా మని చెప్పింది. అయినా నేటికీ స్పష్టత కరువైంది. కాగా ప్రైవేట్‌ యాజమాన్యం జాయింట్‌ వెంచర్లలో భాగంగా మూడు కంపెనీలను బ్యాంకులో కుదవపెట్టి రూ. కోట్లాది రుణం తీసుకున్నట్లు తెలిసింది. అయితే రెండు విడతల్లో ప్రభుత్వం బ్యాంకులకు సుమారు రూ. 60 కోట్లు చెల్లించినట్లు సమాచారం. కానీ నేటికీ కార్మికులకు ఇవ్వాల్సిన వేతనాలు మాత్రం చెల్లించలేదు.

వేలాది మందికి ఉపాధి

మెదక్‌ మండలం మంబోజిపల్లిలో 1988లో అప్ప టి ప్రభుత్వం నిజాం షుగర్‌ ఫ్యాక్టరీని ఏర్పాటు చేసింది. ఉమ్మడి మెదక్‌ జిల్లా పరిధిలోని 14 మండలాల పరిధిలో వేలాది ఎకరాల్లో రైతులు చెరకు సాగు చేసేవారు. 500 మంది రెగ్యులర్‌ కార్మికులతో పాటు సీజనల్‌ కార్మికులు, చెరకు నరికేందుకు కూలీలు, రవాణా కోసం ట్రాక్టర్లు, లారీలు, ఎడ్లబండ్లను ఉపయోగించేవారు. దీంతో ఫ్యాక్టరీ చుట్టూ హోటళ్లు, లారీలు, ట్రాక్టర్ల షోరూంలు వెలిశాయి. వేలాది మంది కార్మికులు, కూలీలకు చేతినిండా పని దొరికేది. ఈక్రమంలోనే చంద్రబాబు సర్కారు ప్రైవేట్‌ పరం చేసింది. 2002లో మంబోజిపల్లితో పాటు బోధన్‌, మెట్‌పల్లి ప్రాంతాల్లో నడుస్తున్న ఎన్‌డీఎస్‌ఎల్‌ మూడు ఫ్యాక్టరీలను ఏదో కారణం చూపి 51 శాతం వాటాను (జాయింట్‌) వెంచర్‌గా డెక్కన్‌ పేపర్‌ మిల్లు యజమాని గోకరాజు గంగరాజుకు సుమారు రూ. 100 కోట్లుకు విక్రయించినట్లు సమాచారం. వాటాలో మేజర్‌శాతం ప్రైవేట్‌పరం చేయటంతో దానిపై పూర్తి హక్కులు పొందిన యజమాని ఎన్‌ఎస్‌ఎఫ్‌ ఫ్యాక్టరీ పేరును తొలగించి, నిజాం డెక్కన్‌ షుగర్‌ లిమిటెడ్‌ (ఎన్‌డీఎస్‌ఎల్‌)గా మార్చారు. ప్రైవేట్‌ యజమాన్యం చేతుల్లోకి వెళ్లగానే 500 మంది కార్మికులకు గానూ 370 మందికి బలవంతంగా వీఆర్‌ఎస్‌ ఇచ్చారు. నాటి నుంచి కార్మికులకు కష్టాలు ప్రారంభ మయ్యాయి. 2015లో ఏకంగా కంపెనీనే మూసివేశారు. దీంతో వేలాది మంది కార్మికులు రోడ్డున పడగా, జిల్లాలో చెరకు సాగు కనుమరుగైంది. నాటి నుంచి ఫ్యాక్టరీని తెరిపిస్తామన్న నేతల మాటలు నీటి బుడగలుగానే మిగిలాయి. ఇప్పటివరకు కార్మికులకు చెల్లించాల్సిన వేతనాలు, దాచుకున్న డబ్బులు సైతం చెల్లించకపోవడం గమనార్హం.

66రోజులపాటు ధర్నాలు

ఫ్యాక్టరీని తిరిగి తెరిపించాలని కార్మికులు, రైతులు 2015లో 66 రోజుల పాటు ధర్మాలు నిర్వహించారు. అప్పట్లో టీడీపీ నేతగా రేవంత్‌రెడ్డి సైతం కార్మికులకు మద్దతుగా ధర్నాలో పాల్గొన్నారు. తాము అధికారంలోకి వచ్చిన 100 రోజుల్లో ప్యాక్టరీని తెరిపిస్తామని గత ముఖ్యమంత్రి కేసీఆర్‌ సైతం హామీ ఇచ్చినా, ఫలితం లేకుండా పోయింది. కాంగ్రెస్‌ అధికారంలోకి రాగానే ప్రత్యేకంగా కమిటీని వేసింది. ఆ కమిటీ విచారణ జరిపి కంపెనీని ప్రభుత్వం స్వాధీనం చేసుకొని నడిపించాలని సర్కారుకు నివేదిక ఇచ్చింది. అయితే ప్రభుత్వం మాత్రం దీనిపై ఇప్పటివరకు స్పష్టత ఇవ్వలేదు.