రైల్వేట్రాక్‌ కింద బాక్స్‌ బ్రిడ్జి

మెదక్‌– అక్కన్నపేట మార్గంలో సాగుతున్న పనులు

రామాయంపేట/హవేళిఘణాపూర్‌(మెదక్‌): బాక్స్‌ బ్రిడ్జి... వినడానికి ఇది కొత్తగా ఉన్నా... రైల్వే శాఖలో ఎప్పటి నుంచో అమలులో ఉంది. అత్యవసర పరిస్థితుల్లో ట్రాక్‌ కింద బ్రిడ్జి నిర్మించలేని పరిస్థితుల్లో బయట ప్రాంతంలో సిమెంట్‌తో తయారు చేయించిన బాక్స్‌ బ్రిడ్జిని రైల్వేట్రాక్‌ కింద అమరుస్తారు. మెదక్‌– అక్కన్నపేట రైల్వేట్రాక్‌ పరిధిలో శమ్నపూర్‌ వద్ద ఇలాగే బాక్స్‌ బ్రిడ్జిని అమర్చారు.

18 కిలోమీటర్ల మేర రైల్వేట్రాక్‌

మెదక్‌, అక్కన్నపేట మధ్య 18 కిలోమీటర్ల మేర రైల్వేట్రాక్‌ విస్తరించి ఉంది. దీనిని 2018లో ప్రారంభించారు. ఈట్రాక్‌పై అవసరమైన చోట సుమారు 35 వరకు చిన్న, పెద్ద బ్రిడ్జిలు నిర్మించారు. శమ్నాపూర్‌ వద్ద భారీస్థాయిలో వరద నీరు నిలిచే స్థలం వద్ద ఎలాంటి బ్రిడ్జి నిర్మాణం చేపట్టలేదు. దీనికి కొద్ది దూరంలో చిన్నస్థాయి బ్రిడ్జితో సరిపెట్టారు. 2018 తర్వాత పలుమార్లు కురిసిన భారీ వర్షాలతో ట్రాక్‌ వద్ద పెద్ద ఎత్తున వరద నీరు నిలిచింది. దీంతో రైల్వేశాఖతో పాటు గ్రామస్తులు సైతం ఇబ్బందుల పాలయ్యారు. ఈ మేరకు విచారణ జరిపించిన రైల్వే అధికారులు ఇక్కడ బ్రిడ్జి నిర్మాణం అత్యవసరమని తేల్చారు. ఈమేరకు నిర్మాణానికి రూ. రెండు కోట్లు మంజూరు చేశారు. రైల్వేట్రాక్‌ కింద తవ్వకాలు చేపట్టి బ్రిడ్జి నిర్మిస్తే చాలా సమయం పట్టడంతో పాటు పనులు జరిగినన్ని రోజులు రైలు ప్రయాణాలు ఆగిపోయే పరిస్థితి ఉంటుంది. దీంతో ఆశాఖకు చెందిన ఉన్నతాధికారుల ఆదేశం మేరకు బాక్స్‌ బ్రిడ్జి నిర్మాణాన్ని చేపట్టారు. రెండేళ్ల పాటు కొనసాగిన పనులు ఆరు నెలల క్రితం పూర్తయ్యాయి. వారం రోజుల క్రితమే ట్రాక్‌ కింద బ్రిడ్జిని పునరుద్ధరించే పనులను రైల్వే అధికారులు చేపట్టారు. ఈ మేరకు క్రేన్లతో ట్రాక్‌ కింద మట్టిని తొలగించారు. భారీ క్రేన్లు, గ్యాస్‌ కట్టర్ల సహాయంతో మూడు రోజులుగా సిమెంట్‌ బాక్స్‌ బ్రిడ్జిని ర్యాకు కిందకి నెడుతూ అమర్చారు. ఆ శాఖకు చెందిన ఉన్నతాధికారుల పర్యవేక్షణలో పనులు కొనసాగుతున్నాయి. ర్యాకు కింది భాగంలో సిమెంటు బాక్స్‌ బ్రిడ్జి పునరుద్ధరించే పనులు విజయంతమయ్యాయని ఆశాఖ అధికారులు పేర్కొన్నారు. రెండు, మూడు రోజుల్లో చిన్న చిన్న పనులు పూర్తవుతాయని తెలిపారు. కాగా బ్రిడ్జి నిర్మాణ పనులు కొనసాగుతున్న సమయంలో ఎలాంటి ఆటంకం లేకుండా మెదక్‌, అక్కన్నపేట మధ్య రైళ్లు నడుస్తున్నాయి. ఈమేరకు బ్రిడ్జి నిర్మించే స్థలంలో ట్రాక్‌ కింద మట్టి తొలగించగా పట్టాలు గాల్లో తేలుతున్నాయి. పట్టాల మధ్యలో ప్రత్యేకంగా ప్లేట్లు బిగించి రైలు ప్రయాణానికి ఆటంకం కల్గకుండా ఏర్పాటు చేశారు.

రైల్వేట్రాక్‌ కింద బాక్స్‌ బ్రిడ్జి