విధులకు హాజరయ్యారా..?

చిన్నశంకరంపేట(మెదక్‌)/రామాయంపేట: ఆమె రెండు రోజులూ రిజిస్టర్‌లో సంతకం చేయలేదు.. విధులకు హాజరయ్యారా..? లేదా అంటూ డీఎంహెచ్‌ఓ శ్రీరామ్‌ విచారణ చేపట్టారు. సోమవారం చిన్నశంకరంపేట ప్రభుత్వ ఆస్పత్రిలో వైద్య సిబ్బంది హాజరు పట్టికను పరిశీలించారు. ఆదివారం కలెక్టర్‌ పీహెచ్‌సీని ఆకస్మికంగా తనిఖీ చేసి హాజరు రిజిస్టర్‌ను తనిఖీ చేశారు. ఈ సమయంలో హెల్త్‌ సూపర్‌వైజర్‌ బుజ్జి రెండు రోజులు హాజరు రిజిస్టర్‌లో సంతకం చేయలేదు. విధులకు వస్తే సంతకం చేయాలి, లేదా సీఎల్‌, అబ్సెంట్‌ ఏదో ఒకటి రిజిస్టర్‌లో నమోదు చేయాలి. ఇలా చేయకుండా రెండు రోజులు హాజరు పట్టికలో ఎందుకు ఖాళీగా ఉంచారని సందేహం వచ్చిన కలెక్టర్‌ విచారణకు అదేశించారు. ఈమేరకు డీఎంహెచ్‌ఓ సిబ్బందితో రహస్యంగా మాట్లాడి వివరాలు రికార్డు చేశారు. ప్రజలకు అందుబాటులో ఉండి వైద్య సేవలు అందించాలని సూచించారు. ఆయన వెంట ప్రోగ్రాం ఆఫీసర్‌ నవ్య, మెడికల్‌ ఆఫీసర్‌ వైశాలి ఉన్నారు. అలాగే రామాయంపేట ప్రభుత్వ ఆస్పత్రిని సందర్శించారు. సూపరింటెండెంట్‌ లింబాద్రితో మాట్లాడి సమస్యలను అడిగి తెలుసుకున్నారు. సిబ్బంది కొరత నెలకొందని, దీంతో ఇబ్బందులు ఎదురవుతున్నాయని ఆయన డీఎంహెచ్‌ఓ దృష్టికి తీసుకెళ్లారు.

డీఎంహెచ్‌ఓ శ్రీరామ్‌ ఆరా