గజ గజ

ఆదివారం శ్రీ 16 శ్రీ నవంబర్‌ శ్రీ 2025

521 కేసుల పరిష్కారం

మెదక్‌ కలెక్టరేట్‌: రాజీయే రాజమార్గమని జిల్లా ప్రధాన న్యాయమూర్తి నీలిమ అన్నారు. శనివారం జిల్లా న్యాయ సేవాధికార సంస్థ ఆధ్వర్యంలో జిల్లా కోర్టుతో పాటు, నర్సాపూర్‌, అల్లాదుర్గంలో కలిపి మొత్తం ఏడు బెంచ్‌లలో స్పెషల్‌ అదాలత్‌ నిర్వహించారు. ఈసందర్భంగా ఆమె మాట్లాడుతూ.. రాజీ పడడంతో ఇరువురికి న్యాయం జరుగుతుందన్నారు. స్పెషల్‌ లోక్‌ అదాలతో జిల్లావ్యాప్తంగా 521 అన్ని రకాల కేసులు పరిష్కరించినట్లు తెలిపారు.

దరఖాస్తుల ఆహ్వానం

మెదక్‌ కలెక్టరేట్‌: దివ్యాంగులకు సహాయ సహకారాలు అందించే వ్యక్తులు, సంస్థలకు ప్రభుత్వం రాష్ట్రస్థాయిలో పురస్కారాలు అందించనున్నట్లు ఇన్‌చార్జి డీడబ్ల్యూఓ హేమాభార్గవి శనివారం ఒక ప్రకటనలో పేర్కొన్నారు. అర్హత గల సంస్థలు, వ్యక్తులు ఈనెల 17వ తేదీ సాయంత్రంలోగా ఆన్‌లైన్‌లో దరఖాస్తు చేసి ఒక కాపీని తమ కార్యాలయంలో అందజేయాలని సూచించారు. పూర్తి సమాచారం కోసం 99599 06459 నంబర్‌లో సంప్రదించాలని సూచించారు.

సంగారెడ్డి జోన్‌: ఉమ్మడి జిల్లావ్యాప్తంగా ప్రజలు చలితో వణికిపోతున్నారు. వారం రోజులుగా ఉష్ణోగ్రతలు కనిష్ట స్థాయికి పడిపోయాయి. దీంతో రాత్రి సమయంలో ప్రజలు ఇంటి నుంచి బయటకు వచ్చేందుకు జంకుతున్నారు. సాధారణంగా నవంబర్‌ చివరి వారంలో ప్రారంభమై డిసెంబర్‌, జన వరి మాసాల్లో చలి అధికంగా ఉంటుంది. ప్రస్తుతం అందుకు భిన్నంగా ఉంది. గత రెండు రోజులుగా నమోదైన ఉష్ణోగ్రతలను పరిశీలిస్తే సంగారెడ్డి జిల్లాలో 7.8, 8.1 డిగ్రీల ఉష్ణోగ్రతలు నమోదై రాష్ట్రంలోనే మొదటిస్థానంలో నిలిచింది. తక్కువ ఉష్ణోగ్రతలు నమోదైన టాప్‌ 10 జిల్లాలలో సంగారెడ్డితోపాటు మెదక్‌, సిద్దిపేట జిల్లాలు ఉన్నాయి.

ఇబ్బందులు పడుతున్న ప్రజలు

రోజురోజుకు పెరుగుతున్న చలి తీవ్రతతో ప్రజానికం తీవ్ర ఇబ్బందులు ఎదుర్కొంటున్నారు. ము ఖ్యంగా వృద్ధులు, చిన్నారులు సాయంత్రం కాగానే ఇంటికే పరిమితం అవుతున్నారు. గ్రామాల్లో ఎక్కడ చూసినా చలి మంటలు వేసుకొని ఉపశమనం పొందుతున్నారు. అదేవిధంగా ఉన్ని దుస్తులు ధరిస్తున్నారు. ఉదయం కూరగాయలను మార్కెట్‌ తరలించే వారు, పాల వ్యాపారులు అవస్థలు పడుతున్నారు. ప్రస్తుతం పత్తి తీత పనులతో పాటు చెరుకు నరికే పనులు జోరుగా సాగుతున్నాయి. స్థానిక కూలీలతో పాటు వలస వచ్చిన వారు ఉదయం పూట చలికి భయపడి పనులకు వెళ్లలేక మధ్యాహ్న సమయంలోనే పనులు చేసుకుంటున్నారు.

మరింత పెరిగే అవకాశం

నవంబర్‌ నెల చివరి వరకు చలి తీవ్రత మరింత పెరిగే అవకాశాలు ఉన్నాయని వాతావరణ శాఖ అధికారులు చెబుతున్నారు. అదేవిధంగా మరో రెండు రోజుల పాటు మధ్యాహ్న సమయంలో కూడా శీతలగాలులు వీచే అవకాశం ఉందన్నారు. ప్రజలు కనీస జాగ్రత్తలు వహిస్తూ ఉండాల్సిన అవసరం ఉందని సంబంధిత అధికారులు చెబుతున్నారు. దీర్ఘకాలిక వ్యాధిగ్రస్తులతో పాటు చిన్నారులు కనీస జాగ్రత్తలు వహించాలని సంబంధిత అధికారులు చెబుతున్నారు.

ఉమ్మడి మెదక్‌ జిల్లానువణికిస్తున్న చలి

గజ గజ