సన్నాలుంటే సై.. లేదంటే నై

● సన్నధాన్యం కోసం రైస్‌ మిల్లర్ల తకరారు ● దొడ్డు వడ్లను దించుకునేందుకు పేచీ ● కాంటాలు ఆలస్యం..కొనుగోళ్లపై ప్రభావం

చిన్నశంకరంపేట(మెదక్‌): సన్నధాన్యం కోసం రైస్‌మిల్లర్ల్లు తకరారు పెడుతున్నారు. సన్న ధాన్యం లా రీ తీసుకువస్తేనే.. దొడ్డు ధాన్యం దించుకుంటామని పేచీ పెడుతున్నారు. దీంతో జిల్లాలో ధాన్యం కొనుగోళ్లు ఆలస్యం అవుతోంది. డిమాండ్‌ తగ్గట్టుగా లారీలను పంపకపోవడంతో కాంటా చేసిన ధాన్యం కల్లాల వద్దే పేరుకుపోతుంది. ఇదేంటని ప్రశ్నిస్తే లారీని దించకపోవడంతో సమస్య ఉత్పన్నం అవుతుందని, దీంతో చేసేదిలేక దొడ్డు ధాన్యం లారీతో పాటు సన్న ధాన్యం లోడ్‌ పంపుతున్నామని నిర్వాహకులు చెబుతున్నారు. రోజుల తరబడి కాంటాలు ఆలస్యం కావడంతో ఇబ్బందులు తప్పడం లేదని రైతులు ఆవేదన వ్యక్తం చేస్తున్నారు. జిల్లాలో 518 కొనుగోలు కేంద్రాలు ఏర్పాటు చేయగా, ప్రస్తుతం 45 రైస్‌ మిల్లులకు మాత్రమే ధాన్యం తరలించేందుకు అనుమతి ఇచ్చారు. మరో 12 రైస్‌ మిల్లులు సకాలంలో మిల్లింగ్‌ చేసి బియ్యం అందించారు. అయినా బ్లాక్‌లిస్ట్‌లో చేర్చారు. గతంలోనే ధాన్యం ఇచ్చిన రైస్‌ మిల్లుల నుంచి సీఎంఆర్‌ రికవరీ చేసి ఉంటే ఈ సమస్య వచ్చి ఉండేది కాదని పలువురు అంటున్నారు.

గవ్వలపల్లి కొనుగోలు కేంద్రం వద్ద పేరుకుపోయిన ధాన్యం రాశులు

కల్లాల వద్ద పేరుకుపోయిన వడ్లు

ప్రభుత్వం ధాన్యం కొనుగోలు కేంద్రాల నుంచి సేకరించిన ధాన్యం రైస్‌ మిల్లులకు తరలించి మిల్లింగ్‌ అనంతరం తిరిగి తీసుకుంటుంది. ఇలాంటప్పుడు రైస్‌మిల్లర్ల సన్న వడ్లను ఎందుకు డిమాండ్‌ చేస్తున్నారనేది ప్రశ్నార్థకంగా మారింది. సన్నాలు కొనుగోలు చేసి రిసైక్లింగ్‌ చేసేందుకే అలా చేస్తున్నారనే ఆరోపణలున్నాయి. అధికారులు మాత్రం రైస్‌మిల్లర్లు సన్న, దొడ్డు ధాన్యం ఏదైనా సకాలంలో దించుకోవాల్సిందే అంటున్నారు. అయితే క్షేత్రస్థాయిలో మాత్రం పరిస్థితి వేరుగా ఉంది. ధాన్యం కొనుగోలు కేంద్రాలకు లారీలు రాకపోవడంతో ధాన్యం కాంటా నత్తనడకన సాగుతోంది. దీంతో కొనుగోలు కేంద్రాల వద్ద ధాన్యం పేరుకుపోయింది.