రాజీతోనే కేసుల పరిష్కారం

సంగారెడ్డి టౌన్‌: రాజీమార్గంతోనే కేసుల పరిష్కారం అవుతాయని జిల్లా ప్రధాన న్యాయమూర్తి భవాని చంద్ర అన్నారు. జిల్లా కోర్టులో శనివారం నిర్వహించిన ప్రత్యేక లోక్‌ అదాలత్‌లో మొత్తం 2,508 కేసులు పరిష్కరించినట్లు తెలిపారు. ఇందులో క్రిమినల్‌ కాంపౌండబుల్‌ కేసులు 2,388, సివిల్‌ కేసులు 35, ప్రీ లిటిగేషన్‌ కేసులు 19, సైబర్‌ క్రైం కేసులు 63 ఉన్నాయి. మోటార్‌ వాహన చట్టం కింద రూ.38.60 లక్షల పరిహారం కూడా అందించినట్లు చెప్పారు. కార్యక్రమంలో జడ్జీలు, న్యాయవాదులు తదితరులు పాల్గొన్నారు.

ప్రతీ మహిళాచదువుకోవాలి

హత్నూర(సంగారెడ్డి)/జోగిపేట(అందోల్‌): ప్రతి ఒక్క మహిళ చదువుకొని అక్షరాస్యత సాధించాలని జిల్లా వయోజన విద్య అధికారి వెంకట్‌రెడ్డి అన్నారు. శనివారం మండల కేంద్రంలోని రైతు వేదికలో ఐకేపీ ఆధ్వర్యంలో అవగాహన సదస్సు నిర్వహించారు. ఈసందర్భంగా ఆయన మాట్లాడుతూ.. మహిళా సంఘాలలో ఉన్న ప్రతి ఒక్క మహిళ అక్షరాస్యత సాధించేందుకు కృషి చేయాలన్నారు. అలాగే జోగిపేటలోని మండల మహిళా సమాఖ్య భవనంలో డ్వాక్రా సంఘాల అధ్యక్ష, కార్యదర్శులు, వీఓలకు ఉల్లాస్‌ కార్యక్రమంపై ఒకరోజు శిక్షణ కార్యక్రమాన్ని ఏర్పాటు చేశా రు. ఈసందర్భంగా ఆయన మాట్లాడుతూ.. చదువు మధ్యలో ఆపేసిన మహిళలు ఓపెన్‌ స్కూల్‌ ద్వారా ఆయా పరీక్షలు రాసి ఉత్తీర్ణులు కావాలని సూచించారు. ఏపీఎం రాజశేఖర్‌, సిఆర్పిలు, మండల సమైక్య అధ్యక్ష కార్యదర్శులు విద్యారాణి, కష్ణవేణి తో పాటు గ్రామ సమైక్య సభ్యులు పాల్గొన్నారు.

ట్రిపుల్‌ఆర్‌ రైతులకు పరిహారం

తూప్రాన్‌: ట్రిపుల్‌ఆర్‌ పరిహారం డబ్బులు రైతుల ఖాతాల్లో చేస్తున్నామని ఆర్డీఓ జయచంద్రారెడ్డి శనివారం తెలిపారు. డివిజన్‌ పరిధిలో ఇప్పటికే 178 మంది రైతుల ఖాతాల్లో రూ.13 కోట్లు జమ చేశామన్నారు. ఖాతాల్లో డబ్బులు పడని రైతులు ఆందోళ చెందాల్సిన అవసరం లేదని, త్వరలో వారికి సైతం డబ్బులు జమ చేస్తామన్నారు. ప్రస్తుతం 2022 నాటి రిజిస్ట్రేషన్‌ డిపార్ట్‌మెంట్‌ మార్కెట్‌ ధరలు, 2013 నాటి భూసేకరణ చట్టం ప్రకారం నిర్ణయించిన నష్ట పరిహారం ధరకు డబ్బులు జమ అవుతున్నాయని స్పష్టం చేశారు. అలాగే కలెక్టర్‌ పెంచే నష్ట పరిహారం రెండో విడతగా వారి ఖాతాలో జమ చేస్తామన్నారు.

‘పౌష్టికాహారం తప్పనిసరి’

కొల్చారం(నర్సాపూర్‌): మండలంలోని సంగాయిపేట 1, 2వ అంగన్‌వాడీ కేంద్రాలను ఐసీడీఎస్‌ సీడీపీఓ వెంకటరమణ శనివారం సందర్శించారు. కేంద్రాల్లోని పిల్లల బరువు, ఎత్తును పరిశీలించారు. గర్భిణులు, పిల్లలకు పౌష్టికాహార వినియోగంపై అవగాహన కల్పించారు. అంగన్‌వాడీ టీచర్లు స్వరూప, హైమావతి, సిబ్బంది పాల్గొన్నారు.

రాజీతోనే కేసుల పరిష్కారం