మెదక్‌లో అభివృద్ధి ఏదీ?

సమావేశంలో మాట్లాడుతున్న కవిత

మెదక్‌జోన్‌: రాష్ట్రం మొత్తంలో మెదక్‌ జిల్లాలోనే అభివృద్ధి దారుణంగా ఉందని, గతంలో జిల్లా మంత్రిగా చేసిన హరీశ్‌రావు ఏం చేశారని తెలంగాణ జాగృతి అధ్యక్షురాలు, ఎమ్మెల్సీ కవిత ప్రశ్నించారు. శనివారం రెండో రోజు కూడా ఆమె జిల్లాలో పర్యటించారు. ఈ సందర్భంగా ఆమె మాట్లాడుతూ ప్రజాక్షేత్రంలో ప్రజల సమస్యలను ప్రత్యక్షంగా చూశామన్నారు. కౌడిపల్లి ఎస్టీ బాలుర వసతి గృహానికి నెలకు రూ.1.50 లక్షల అద్దె ఇస్తున్నా కనీస సౌకర్యాలు లేకపోవడం బాధాకరమన్నారు. ఇప్పటికై నా సొంత భవనం నిర్మించి సమస్యలు పరిష్కరించాలని డిమాండ్‌ చేశారు. ఘనపూర్‌ ఆయకట్టు ఎత్తు పెంచేందుకు నిధులు మంజూరైనా ఇప్పటి వరకు పనులు ఎందుకు జరగడంలేదన్నారు. వెంటనే ఎత్తుపెంచి ముంపునకు గురైన భూములకు పరిహారం అందించాలన్నారు. ట్రిపుల్‌ఆర్‌లో భూములు కోల్పోయిన రైతులకు ఎకరాకు రూ. కోటి చొప్పున పరిహారమివ్వాలన్నారు. లేదంటే భూమికి భూమి ఇవ్వాల్సిందేనని అన్నారు. జిల్లా కేంద్రంలోని డబుల్‌ బెడ్రూంల్లో కనీస సౌకర్యాలు కూడా కల్పించక పోవటం ఈ ప్రభుత్వ చిత్తశుద్ధికి నిదర్శనమన్నారు. అన్నిరంగాలతో పాటు విద్యావ్యవస్థలో మెదక్‌ వెనకబడిందని, ఇక్కడ పీజీ సెంటర్‌ను ఏర్పాటు చేయాలన్నారు. ఈ ప్రాంత ప్రజల అభిష్టం మేరకు మెదక్‌ను చార్మినార్‌ జోన్‌లో కలపాలన్నారు. పద్మాదేవేందర్‌రెడ్డి పదేళ్లు అధికారంలో ఉండి ఉద్యమకారులను పట్టించుకోలేదన్నారు. ఈ సమస్యలన్నీ వచ్చే ఫిబ్రవరి 13లోగా పరిష్కారం చూపాలన్నారు.