చేయి తడిపితేనే.. పనులు

పేట మున్సిపాలిటీలో తీరే వేరయా!

రామాయంపేట(మెదక్‌): రామాయంపేట మున్సిపాలిటీ అవినీతిమయమైంది. చేయి తడపందే ఏపని కావడం లేదనే ఆరోపణలున్నాయి. అధికారులు మొదలు కిందిస్థాయి ఉద్యోగి వరకు లంచాల కోసం అర్రులు చాస్తున్నట్లు తెలిసింది. ఇటీవల బ్లీచింగ్‌ పౌడర్‌ కొనుగోలులో అవినీతి చోటు చేసుకున్నట్లు ఆరోపణలు రాగా, కలెక్టర్‌ రాహుల్‌రాజ్‌ స్వయంగా కార్యాలయాన్ని సందర్శించారు. బ్లీచింగ్‌ పౌడర్‌ సంచులు, రికార్డులను పరిశీలించి తీవ్రస్థాయిలో హెచ్చరించినట్లు సమాచారం. వ్యాపారవర్గాలకు సంబంధించి లైసెన్స్‌ల జారీ, రెన్యువల్‌, ఇంటి బిల్లులు, పన్నుల వసూళ్లు వంటి ఏ పనికై నా డబ్బులు ముట్టాల్సిందే. మున్సిపాలిటీ పరిధిలో పెద్దఎత్తున హారితహారం నిధులు దుర్వినియోగమైనట్లు గతంలో కౌన్సిలర్లు ఆరోపణలు చేసిన విషయం తెలిసిందే. పట్టణవాసులకు మొక్కలు పంపిణీ చేసినట్లు రికార్డుల్లో నమోదు చేయగా, క్షేత్రస్థాయిలో పరిశీలిస్తే నామమాత్రంగా వార్డుకు నలుగురైదుగురికి మాత్రమే పంపిణీ చేసినట్లు తేలింది. వెంకటేశ్వర కాలనీలో ఏర్పాటు చేసిన నర్సరీలో పెద్ద సంఖ్యలో మొక్కలు నాటినట్లు అధికారులు ప్రకటించగా, అక్కడ చాలా తక్కువ సంఖ్యలో మాత్రమే మొక్కలున్నాయి.

విచారణ జరుపుతాం

మున్సిపల్‌ కార్యాలయంలో అవినీతిని సహించం. ఈమేరకు పలుమార్లు హెచ్చరించాం. అధికారులు, సిబ్బందిపై వస్తున్న ఆరోపణల విషయమై విచారణ జరిపించి చర్యలు తీసుకుంటాం.

– నగేశ్‌, అదనపు కలెక్టర్‌