త్వరగా ధాన్యం డబ్బుల చెల్లింపు

కలెక్టర్‌ రాహుల్‌రాజ్‌

పాపన్నపేట(మెదక్‌)/మెదక్‌కలెక్టరేట్‌: ధాన్యం డబ్బుల చెల్లింపు మరింత వేగవంతం చేయాలని కలెక్టర్‌ రాహుల్‌రాజ్‌ ఆదేశించారు. శనివారం సాయంత్రం మండల కేంద్రంలోని కొనుగోలు కేంద్రాన్ని తనిఖీ చేసి రిజిస్టర్లు పరిశీలించారు. ఈసందర్భంగా ఆయన మాట్లాడుతూ.. జిల్లాలో ఇప్పటివరకు 27,252 మంది రైతుల నుంచి 1,14,077 మెట్రిక్‌ టన్నుల ధాన్యం కొనుగోలు చేసి రూ.102.84 కోట్లు చెల్లించామని చెప్పారు. ట్యాగ్‌ చేసిన మిల్లులకు ధాన్యం తరలించాలన్నారు. నిబంధనల ప్రకారం తేమ శాతం కరెక్ట్‌గా ఉన్న ధాన్యాన్ని వెంటనే తరలించాలన్నారు. కొనుగోలుకు సంబంధించిన రిజిస్టర్లు సక్రమంగా నిర్వహించాలని సూచించారు. అంతకుముందు ఎల్లాపూర్‌లో పశు వైద్యశాలను సందర్శించారు. పాడి పశువుల సంరక్షణకు చర్యలు తీసుకోవాలన్నారు. వైద్య సిబ్బంది సమయపాలన పాటించాలని, ఎల్లవేళలా అందుబాటులో ఉండాలని ఆదేశించారు. అలాగే కలెక్టరేట్‌లో బిర్సాముండా జయంతిని పురస్కరించుకొని చిత్రపటానికి పూలమాల వేసి నివాళులర్పించారు. గిరిజన హక్కుల కోసం పోరాడిన మహా నాయకుడు బిర్సాముండా అని కొనియాడారు. కార్యక్రమంలో అదనపు కలెక్టర్‌ నగేశ్‌, జెడ్పీ సీఈఓ ఎల్లయ్య, ట్రైబల్‌ వెల్ఫేర్‌ అధికారి నీలిమ, విద్యార్థులు దళితులు పాల్గొన్నారు.