రోడ్డు రోలర్‌ ఎక్కిస్తాం

పటాన్‌చెరు టౌన్‌: వాహనంతో పాటు వచ్చే సైలెన్సర్లను నిబంధనలకు విరుద్ధంగా మార్చి అధిక శబ్దం వచ్చే వాటిని అమరుస్తున్నారు. కొందరు వాహనదారులు చెవులకు చిల్లులు పడేలా శబ్దం వచ్చే సైలెన్సర్లను ఏర్పాటు చేసుకుని రోడ్లపై దర్జాగా తిరుగుతున్నారు. దీంతో రోజు రోజుకు వాయు కాలుష్యం విపరీతంగా పెరిగిపోతోంది. ఎయిర్‌ పొల్యూషన్‌తో పాటు వాహనదారులు, ప్రయాణికులు ఈ సైలెన్సర్ల భారీ మోతకు అసౌకర్యానికి గురి అవుతున్నారు. ఈ క్రమంలో నిబంధనలకు విరుద్ధంగా బైక్‌ సైలెన్సర్లు మారుస్తున్న వారిపై పటాన్‌చెరు, సంగారెడ్డి ట్రాఫిక్‌ పోలీసులు కొరడా ఝలిపిస్తున్నారు. గత నెలలో నిర్వహించిన వాహన తనిఖీల్లో పటాన్‌చెరులో 155, సంగారెడ్డిలో 106 బైక్‌ల సైలెన్సర్లను సీజ్‌ చేసి, వాటిని రోడ్‌ రోలర్‌తో ధ్వంసం చేశారు. ఈ సందర్భంగా వాహనదారులు, మెకానిక్‌లకు పటాన్‌చెరు డీఎస్పీ ప్రభాకర్‌ కీలక సూచనలు చేశారు. ద్విచక్ర వాహనాలకు కంపెనీతో వచ్చిన సైలెన్సర్లలో ఎలాంటి మార్పులు చేయకూడదని సూచించారు. శబ్ద కాలుష్యానికి పాల్పడేలా బైక్‌లు నడిపే వారితోపాటు, మైనర్లు డ్రైవింగ్‌ చేస్తే వారి తల్లిదండ్రులపై చర్యలు తీసుకుంటామని హెచ్చరించారు.

తనిఖీలతో అడ్డుకట్ట

పటాన్‌చెరు నియోజకవర్గ పరిధిలోని ముత్తంగి, ఇస్నాపూర్‌, అమీన్‌పూర్‌లో ట్రాఫిక్‌ పోలీసులు వాహన తనిఖీలు ముమ్మరం చేశారు. అలాగే సంగారెడ్డి పరిధిలో కూడా తనిఖీలు చేపట్టి సైలెన్సర్లు మార్చిన ద్విచక్ర వాహనదారులకు జరిమానతో పాటు కేసు నమోదు చేసి, సైలెన్సర్లను సీజ్‌ చేస్తున్నారు.

వాహనదారులు, మెకానిక్‌లు జాగ్రత్త

పటాన్‌చెరులో 155, సంగారెడ్డిలో 106 సైలెన్సర్లు సీజ్‌

పోలీసుల సీరియస్‌ యాక్షన్‌