అప్పుల బాధతో యువకుడు ఆత్మహత్య

మిరుదొడ్డి(దుబ్బాక): అప్పుల బాధ తాళలేక యువకుడు ఆత్మహత్య చేసుకున్నాడు. ఈ ఘటన అక్బర్‌పేట–భూంపల్లి మండలం మోలె గ్రామంలో మంగళవారం చోటు చేసుకుంది. భూంపల్లి ఎస్‌ఐ హరీశ్‌ కథనం ప్రకారం... గ్రామానికి చెందిన రాజు (32) కుటుంబ సభ్యులతో కలిసి జీవనోపాధి నిమిత్తం దుబ్బాకకు వలస వెళ్లాడు. ఈ క్రమంలో లేడీస్‌ ఎంపోరియం గాజుల దుకాణంతో జీవనోపాధి పొందుతూ భార్య ప్రసన్న, ఇద్దరు కుమారులను పోషిస్తున్నాడు. కాగా దుకాణం నిర్వహణ కోసం చేసిన అప్పులు ఎక్కువయ్యాయి. దీంతో కుటుంబ సభ్యులతో పాటు, బంధు మిత్రుల వద్ద చెప్పుకుని తరచూ బాధపడేవాడు. ఈ క్రమంలో అప్పులు తీర్చలేక మనస్తాపానికి గురై దుబ్బాక నుంచి స్వగ్రామానికి వచ్చి తన ఇంట్లో ఉరి వేసుకున్నాడు. విషయం తెలుసుకున్న పోలీసులు మృతదేహాన్ని పోస్టుమార్టం నిమిత్తం దుబ్బాక ప్రభుత్వ ఆస్పత్రికి తరలించారు.