నాణ్యమైన విత్తనాలతోనే దిగుబడులు

కౌడిపల్లి(నర్సాపూర్‌): నాణ్యమైన విత్తనాలతోనే అధిక దిగుబడులు సాధించవచ్చని సంగారెడ్డి వ్యవసాయ పరిశోధన కేంద్రం శాస్త్రవేత్త, జిల్లా నోడల్‌ అధికారి రాహుల్‌ విశ్వకర్మ తెలిపారు. మంగళవారం మండలంలోని తునికిలో ‘నాణ్యమైన విత్తనం రైతన్నకు నేస్తం’ కార్యక్రమం క్షేత్రదినోత్సవంలో భాగంగా వరిపంటను పీజేటీఏయూ శాస్త్రవేత్త డాక్టర్‌ అరుణశ్రీ, వ్యవసాయ అధికారులతో కలిసి పరిశీలించారు. ఈ వానకాలంలో ప్రభుత్వం, పీజేటీఏయూ కలిసి మండలంలోని 56మంది రైతులకు ఎంటీయూ 1010 రకం 10కిలోల మినికిట్స్‌ వరి విత్తనాలను అందజేశారు. ప్రస్తుతం వరిపంట కోతదశలో ఉండగా పరిశీలించారు. పంటను సాగుచేసిన రైతులు గ్రామాల్లో తోటి రైతులకు అమ్మడం ద్వారా మంచి విత్తనాలతోపాటు లాభాలు వస్తాయని ఆయన పేర్కొన్నారు. ఈ కార్యక్రమంలో ఏడీఏ పుణ్యవతి, ఏఓ స్వప్న, ఏఈఓ నరేందర్‌, రైతులు శ్రీను, శ్రీనివాస్‌, రాములు, ఫకీర, పోచాగౌడ్‌ పాల్గొన్నారు.

తునికిలో వరిపంట పరిశీలన