రహదారి ఆక్రమణల తొలగింపు

సుమారు 45 దుకాణాలు నేలమట్టం

కొండపాక(గజ్వేల్‌): కుకునూరుపల్లిలో రహదారిని ఆక్రమించి ఏర్పాటు చేసిన దుకాణాలను అధికారులు మంగళవారం తొలగించారు. ఈనెల 10న సాక్షి పత్రికలో ‘రోడ్డు ఆక్రమణలతో ప్రమాదాలు’ అనే కథనం ప్రచురితమైంది. దీనికి స్పందించిన ఎంపీడీఓ రాంప్రసాద్‌, ఎస్సై శ్రీనివాస్‌, గ్రామ పంచాయతీ కార్యదర్శి స్వప్నల రహదారికి ఇరువైపులా ఉన్న వ్యాపార సంస్థలు, టీ పాయింట్లు, చికెన్‌ సెంటర్లు, దుకాణాలను జేసీబీ సహాయంతో తొలగించారు. అక్కడక్కడ కొందరు దుకాణాదారులు అడ్డురావడంతో కేసులు నమోదు చేయాల్సి వస్తుందని పోలీసులు హెచ్చరించారు. ఈ సందర్భంగా రాంప్రసాద్‌ మాట్లాడుతూ.. రోడ్డుకు ఒకవైపున సుమారు 45 వరకు ఆక్రమిత దుకాణాలను తొలగించినట్లు తెలిపారు. రోడ్డుకు ఇరువైపులా ఆక్రమిత దుకాణాలను తొలగించే వరకు ఈ ప్రక్రియ కొనసాగుతుందన్నారు. ఈ కార్యక్రమంలో కార్యదర్శి స్వప్న, కారోబార్‌ శ్రీధర్‌, పోలీస్‌ బలగాలు, సిబ్బంది పాల్గొన్నారు.

రహదారి ఆక్రమణల తొలగింపు