గొడుగుపల్లిలో చిరుతపులి మృతి

దౌల్తాబాద్‌ (దుబ్బాక): గొడుగుపల్లి అడవిలో నక్కిన చిరుతపులి మంగళవారం ఉదయం మృతి చెందినట్లు అటవీ అధికారులు నిర్ధారించారు. వివరాలు ఇలా... పొదల్లో దాగి ఉన్న చిరుత పులిని 5 మీటర్ల దూరంలో గుర్తించి, ఫారెస్ట్‌ అధికారులు ఫొటోలు తీస్తున్న క్రమంలో అటు ఇటు కదలడం తప్ప లేచి పరుగెత్తడం లేదని గ్రహించారు. వెంటనే జిల్లా వెటర్నరీ అధికారికి సమాచారం అందించడంతో ఘటనా స్థలానికి చేరుకుని చిరుత పులి శవానికి పరీక్ష చేశారు. విషయం తెలుసుకున్న రాష్ట్ర ఫారెస్ట్‌ అధికారి శ్రీనివాస్‌ వచ్చి పులిని పరిశీలించారు. ఈ సందర్భంగా ఆయన మాట్లాడుతూ.. చిరుత పులి చనిపోవడం బాధాకరమన్నారు. శవ పరీక్షలో పులికి ఎలాంటి గాయాలు లేవని , గోర్లు, దంతాలు బాగానే ఉన్నాయని తెలిపారు. న్యూమోనియాతో చనిపోయి ఉండొచ్చని అనుమానం వ్యక్తం చేశారు. వయస్సు 10 నుంచి 13 ఏళ్లు ఉండొచ్చని చెప్పారు. చిరుత పులి భాగాలను ఫోరెన్సిక్‌ ల్యాబ్‌కు పంపామని, పరీక్షల అనంతరం తదుపరి చర్యలు తీసుకుంటామని తెలిపారు. కార్యక్రమంలో దుబ్బాక రేంజ్‌ అధికారి సందీప్‌ కుమార్‌, వెటర్నరీ అధికారులు కొండల్‌ రెడ్డి, పర్శరాములు, ఫారెస్ట్‌ అధికారులు హైమద్‌, మల్లేశం, వేణు, లింగమూర్తి తదితరులు పాల్గొన్నారు.