నిధుల పురవళ్లు

మెదక్‌ బల్దియాకు భారీగా నిధులు మంజూరయ్యాయి. 80 వేల పైచిలుకు జనాభా ఉన్న ఈ మున్సిపాలిటీలో 33 వార్డులు ఉండగా, నేటికీ అనేక వార్డుల్లో తాగునీటి సమస్య, రోడ్లు, మురికి కాల్వలు సరిగా లేక ప్రజలు సతమతం అవుతున్నారు. ఈక్రమంలో ప్రభుత్వం పలు పథకాల కింద రూ. 50 కోట్లకుపైగా నిధులు మంజూరు చేసింది. పనుల గుర్తింపులో అధికారులు నిమగ్నమయ్యారు.

– మెదక్‌జోన్‌

పట్టణంలోని నవాబుపేట, వీరహనుమాన్‌ కాలనీ, నర్సిఖేడ్‌, నల్లపోచమ్మ, దుర్గాకాలనీ, దాయరవీది, కోలిగడ్డ, అజంపుర, పట్టణంలో విలీనమైన అవుసులపల్లి, ఔరంగాబాద్‌, పిల్లికొటాల్‌ సమీపంలో గల డబుల్‌బెడ్రూం వీధుల్లో సమస్యలు రాజ్యమేలుతున్నాయి. సరైన డ్రైనేజీలు లేకపోవటంతో రోడ్లపైనే మురుగునీరు పారుతోంది. ఫలితంగా దోమలు, ఈగలకు నిలయంగా మారి ప్రజలు అనారోగ్యం బారిన పడుతున్నారు. అలాగే సరైన రోడ్లు, తాగునీటి సరఫరా కాని కాలనీలు ఉన్నాయి. డబుల్‌ బెడ్రూం కాలనీకి వెళ్లాలంటే కనీస రోడ్డు సౌకర్యం కరువైంది. మౌలిక వసతులు లేక ప్రజలు తిప్పలు పడుతున్నారు. అలాగే పట్టణ నడిబొడ్డు నుంచి వెళ్లే మహబూబ్‌నగర్‌ (ఎంఎన్‌) కెనాల్‌లో పట్టణ మురుగు నీరు కలుస్తోంది. ఆ నీరు తాగునీటికి ఉపయోగించే పసుపులేరు వద్ద గల పంప్‌హౌస్‌లో చేరుతోంది. ఈనేపథ్యంలో పలు రకాల సంక్షేమ పథకాల కింద ప్రభుత్వం రూ. 50.38 కోట్లు మంజూరు చేసింది. ఈ నిధులతో సమస్యలు పరిష్కారమయ్యే అవకాశం ఉంది.

పట్టణాభివృద్ధికి రూ. 18.70 కోట్లు

50 వేల పైచిలుకు జనాభా ఉన్న మున్సిపాలిటీలకు యూడీఐఎఫ్‌ కింద రూ. 18.70 కోట్లు ఇటీవల మంజూరయ్యాయి. కాగా అత్యవసరంగా చేయాల్సిన పనులను అధికారులు ఆయా వార్డుల్లో గుర్తిస్తున్నారు. వీటితో ముఖ్యంగా మురికి కాలువల నిర్మాణాలు, సీసీరోడ్లు, కమ్యూనిటీ హాళ్ల నిర్మాణం, పార్కుల అభివృద్ధి, అవసరమైన చోట కల్వర్టుల నిర్మాణం, మొన్నటి వర్షాలకు దెబ్బతిన్న రోడ్ల మరమ్మతులకు ఈ నిధులు ఉపయోగించనున్నారు.

సచ్ఛభారత్‌ మిషన్‌కు రూ. 1.68 కోట్లు

స్వచ్ఛభారత్‌ మిషన్‌ పథకం కింద మున్సిపాలిటీకి రూ.1.68 కోట్లు మంజూరయ్యాయి. ఈ నిధులతో పట్టణ శివారులో గల డంప్‌యార్డు వద్ద వే బ్రిడ్జి నిర్మాణం, తడి, పొడి చెత్తను వేరు చేసే ప్రత్యేకమైన మిషన్‌ ఏర్పాటు చేయనున్నారు.

పనులు గుర్తిస్తున్నాం

ఇటీవల పలు రకాల సంక్షేమ పథకాల ద్వారా మున్సిపాలిటీకి రూ. 50.38 కోట్లు మంజూర య్యాయి. గత నెల అమృత్‌ పథకం కింద రూ. 30 కోట్లు రాగా, పనులు ప్రారంభం అయ్యాయి. ఇటీవల పట్టణాభివృద్ధి, స్వచ్ఛభారత్‌ మిషన్‌ కింద నిధులు వచ్చాయి. అత్యవసరంగా చేయాల్సిన పనులు గుర్తిస్తున్నాం.

– శ్రీనివాస్‌రెడ్డి, మున్సిపల్‌ కమిషనర్‌

మెదక్‌ బల్దియాకు రూ. 50.38 కోట్లు మంజూరు

నిధుల పురవళ్లు