తెగని ‘పంచాయతీ’

● ఎన్నికలు లేక నిలిచిన15వ ఆర్థిక సంఘం నిధులు ● మూలన పడ్డ ట్రాక్టర్లు.. వెలగని దీపాలు

పాపన్నపేట(మెదక్‌): గ్రామ పంచాయతీ ఎన్నికల నిర్వహణ కొలిక్కిరాకపోవడంతో 15వ ఆర్థిక సంఘం నిధులు నిలిచి పాలన భారంగా మారుతోంది. రిపేర్లు లేక ట్రా క్టర్లు, ఆటోలు మూలనపడుతున్నాయి. బోర్లు, విద్యుత్‌ దీపాల రిపేర్లు, పారిశుద్ధ్య సామగ్రి కొనుగోళ్లు, డీజిల్‌ చెల్లింపులు తడిసి మోపెడవుతున్నాయి. దీంతో కార్యదర్శులు అప్పులు చేసి పంచాయతీల భారం పంచుకుంటున్నారు. మెదక్‌ జిల్లాలో 469, సిద్దిపేటలో 487, సంగారెడ్డిలో 602 గ్రామ పంచాయతీలు ఉన్నాయి.

21 నెలలు కావొస్తున్నా జరగని ఎన్నికలు

పంచాయతీల నిర్వాహణకు కేంద్ర, రాష్ట్ర ఆర్థిక కమిషన్‌, జనరల్‌ ఫండ్‌ ముఖ్య ఆధారం. ఇందులో సీఎఫ్‌సీ, ఎస్‌ఎఫ్‌సీల ద్వారా ఏడాదికి ఒక్కో వ్యక్తికి రూ. 613 మంజూరవుతాయి. అయితే జనవరి 2024లో సర్పంచ్‌ల పదవీ కాలం ముగియడంతో ఫిబ్రవరి 1 నుంచి పంచాయతీలకు ప్రత్యేక అధికారులను నియమించారు. ఎన్నికలు నిర్వహించకపోవడంతో కేంద్రం సీఎఫ్‌సీ నిధులను ఆపేసింది. మరో వైపు స్టేట్‌ ఫైనాన్స్‌ కమిషన్‌ నుంచి కూడా కేవలం మల్టీపర్పస్‌ వర్కర్ల జీతాలకు సరిపడేలా మాత్రమే నిధులు వస్తున్నాయి. మెదక్‌ జిల్లాలో రెండు నెలలుగా వారికి కూడా జీతాలు రావడం లేదని తెలుస్తోంది. ఇక జనరల్‌ ఫండ్‌ ద్వారా వచ్చే ఆదాయంతోనే పంచాయతీల నిర్వహణ నెట్టుకొస్తున్నారు.

అప్పులపాలవుతున్న కార్యదర్శులు

మేజర్‌ పంచాయతీలు కొంతవరకు మనుగడ సాధించగలుగుతున్నా, చిన్న పంచాయతీల పరిస్థితి ఘోరంగా ఉంది. మెదక్‌ జిల్లా పాపన్నపేట మండలం దౌలాపూర్‌లో ట్రాక్టర్‌ రిపేరుకు రావడంతో మూలన పడింది. దీనిని రిపేరు చేయించాలంటే సుమారు రూ. 60 నుంచి 70 వేలకు పైగా అవుతుందని తెలుస్తోంది. డాక్యా తండాలో సింగిల్‌ ఫేజ్‌ మోటార్లు కాలిపోయి, గిరిజనులు తాగునీటికి తిప్పలు పడుతున్నారు. అలాగే డీజిల్‌కు డబ్బులు లేక మూడు రోజులకోసారి ట్రాక్టర్‌ ద్వా రా చెత్త సేకరిస్తున్నారు. పలు గ్రామాల్లో వీధి దీపాలు వెలగడం లేదు. తప్పని పరిస్థితుల్లో కార్యదర్శులు అప్పులు చేసి కొంత మేర వ్యవస్థను నడుపుతున్నారు.

తప్పని ఎదురుచూపులు

స్థానిక సంస్థల ఎన్నికలపై స్పష్టత ఇవ్వా లని గత నాలుగు రోజుల క్రితం ప్రభుత్వానికి హైకోర్టు ఆదేశాలు జారీ చేసింది. రిజర్వేషన్లు రద్దు చేసిన నేపథ్యంలో ఎన్నికలు ఎప్పుడు నిర్వహిస్తారో తెలపాలని కోరు తూ ఈనెల 24కు విచారణ వాయిదా వేసింది. ప్రభుత్వం వారం రోజులు గడువు కోరినందున హైకోర్టులో మరుసటి విచారణ కల్లా ఎన్నికలపై స్పష్టత వచ్చే అవకాశం ఉంది. ఈ విషయమై మెదక్‌ డీపీఓ యాదయ్యను వివరణ కోరగా ప్రభుత్వ ఆదేశాల మేరకు ఎన్నికల నిర్ణయం ఉంటుందన్నారు. ఎన్నికలు ఎప్పుడు వచ్చినా నిర్వహించేందుకు అధికార యంత్రాంగం సిద్ధంగా ఉందని తెలిపారు.