లక్ష్యానికి చేరువలో..

జిల్లాలో 82 శాతం ‘ఉపాధి’ ఈకేవైసీ పూర్తి
● మరో వారంలో వందశాతం! ● ఈజీఎస్‌ పనుల్లో అక్రమాలు,బోగస్‌ హాజరుకు చెక్‌

చిన్నశంకరంపేట(మెదక్‌): జాతీయ గ్రామీణ ఉపాధి హామీ పథకంలో నకిలీ జాబ్‌ కార్డులను (శ్రామికులను) ఏరి వేసేందుకు చేపట్టిన ఈకేవైసీ ప్రక్రియ జిల్లాలో ముమ్మరంగా సాగుతోంది. ఇప్పటికే 82 శాతం పూర్తి కాగా, మరో వారం రోజుల్లో వందశాతం పూర్తి చేయనున్నారు. జిల్లాలో 20 మండలాల పరిధిలోని గ్రామాల్లో 2,07,792 మంది జాబ్‌కార్డు కలిగి ఉన్నారు. ఇందులో ఇప్పటివరకు 1,70,993 మందికి సిబ్బంది ఈకేవైసీ పూర్తి చేశారు. పని ప్రదేశంలో కచ్చితమైన హాజరుతో పాటు వేతన చెల్లింపులు సులభతరం చేసేందుకు ఈకేవైసీ ప్రక్రియ నిర్వహిస్తున్నారు.

పని ప్రదేశంలో ‘ఐరిస్‌’

ఉపాధి హామీ కూలీలకు ఆధార్‌తో జాబ్‌ కార్డు లింక్‌ చేయడం ద్వారా ఈకేవైసీ పూర్తి చేస్తున్నారు. పని ప్రదేశంలో రెండుసార్లు ఐరిస్‌ ద్వారా హాజరు నమోదు చేయనున్నారు. దీంతో ఒకరి పేరు మీద మరొకరు పనిచేసేందుకు అవకాశం లేకుండా పోతుంది. అలాగే బోగస్‌ హాజరుకు చెక్‌ పడనుంది. కొన్నిచోట్ల బోగస్‌ మస్టర్లు రాయడం, ఉపాధి పనికి రాని వారికి హాజరు వేస్తున్నారనే ఆరోపణలు ఉన్నాయి. ఈకేవైసీతో ఇక ముందు ఉపాధి పనుల్లో కచ్చితత్వం ఉండనుంది. పని ప్రదేశంలో ఫొటో క్యాప్చర్‌ చేసి ఆన్‌లైన్‌ పోర్టల్‌లో ఆప్‌లోడ్‌ చేయనున్నారు. అలాగే సాయంత్రం పనులు ముగించే సమయంలో మరోసారి ఈ ప్రక్రియ పూర్తి చేస్తారు. అలాగే కూలీలకు వేతనం కూడా ఆన్‌లైన్‌ ద్వారా సులభంగా చేసేందుకు అవకాశం ఉంది. గ్రామాల్లో ఈజీఎస్‌ ఫీల్డ్‌ అసిస్టెంట్లు ఉపాధి హామీ కూలీల ఈకేవైసీ ప్రక్రియ నిర్వహిస్తున్నారు.

మండలాల వారీగా ఈకేవైసీ ఇలా..

జిల్లాలోని అల్లాదుర్గంలో 6,399, చేగుంట 9,635, చిలప్‌చెడ్‌ 6,242, హవేళిఘణాపూర్‌ 11,233, కౌడిపల్లి 10,275, కొల్చారం 8,736, మనోహరాబాద్‌ 4,927, మెదక్‌ 7,437, నర్సాపూర్‌ 9,488, నార్సింగి 4,734, నిజాంపేట 6,917, పాపన్నపేట 12,393, రామాయంపేట 7,758, రేగోడ్‌ 6,618, పెద్దశంకరంపేట 9,654, చిన్నశంకరంపేట 12,623, శివ్వంపేట 10,524, టేక్మాల్‌ 7,899, తూప్రాన్‌ 6,305, వెల్దుర్తి 11,196 మంది జాతీయ ఉపాధి హామీ పథకం కూలీలు ఈకేవైసీ పూర్తి చేసుకున్నారు.