డయాలసిస్‌ సేవల్లో ప్రథమం

దుబ్బాక ప్రభుత్వ ఆస్పత్రి ఘనత

దుబ్బాక: దుబ్బాక ప్రభుత్వ ఆస్పత్రిలోని డయాలసిస్‌ సెంటర్‌ వరుసగా రెండోసారి ఉత్తమ సేవల్లో రాష్ట్రంలోనే ప్రథమ స్థానంలో నిలిచింది. 2023 మార్చి 5న ఆస్పత్రిలో అపెక్స్‌ కిడ్నీవేర్‌ ప్రైవేట్‌ లిమిటెడ్‌ ముంబై వారు ఐదు పడకలతో డయాలసిస్‌ సెంటర్‌ను ఏర్పాటు చేశారు. కేవలం రెండున్నర సంవత్సరాల్లోనే 10 వేల మందికి పైగా రోగులకు సేవలు అందించడం విశేషం. సెంటర్‌ ఇన్‌చార్జి శేఖర్‌, సిబ్బంది సురేష్‌, వివేక్‌రెడ్డి, స్వామి, మానస, రమేశ్‌ను సూపరింటెండెంట్‌ హేమరాజ్‌సింగ్‌తో పాటు వైద్యులు సన్మానించి అభినందించారు. సిబ్బంది అంకితభావంతో చేస్తున్న వైద్యసేవలకు గాను ఈ గుర్తింపు దక్కిందని కొనియాడారు. ఉత్తమ సేవలు అందిస్తున్న ఆస్పత్రిని ప్రభుత్వం అన్ని విభాగాల్లో అభివృద్ధి చేస్తే ఇంకా మంచి వైద్య సేవలు అందించడానికి అవకాశం ఉంటుందని ఎమ్మెల్యే కొత్త ప్రభాకర్‌రెడ్డి పేర్కొన్నారు.