నమ్మితే నట్టేట ముంచారు

చేగుంట(తూప్రాన్‌): ప్రభుత్వ మద్దతు ధర కంటే అధికంగా చెల్లించి తామే ధాన్యం తీసుకుంటామని ప్రైవేట్‌ వ్యక్తులు చెప్పిన మాటలు నమ్మి రైతులు విత్తనాలు వేశారు. తీరా పంట చేతికందే సమయానికి దాని అసలు రంగు బయటపడింది. సగం దిగుబడి కూడా వచ్చే పరిస్థితి లేదని రైతులు లబోదిబోమంటున్నారు. మండలంలోని రుక్మాపూర్‌లో తమ వరి విత్తనాలు వేసుకంటే అధిక దిగుబడి వస్తుందని తామే, ఎక్కువ ధరకు తీసుకుంటామని ప్రైవేట్‌ వ్యక్తులు గ్రామస్తులకు వరి విత్తనాలు అందించారు. దాదాపు 40 మంది రైతులు 45, 47 అనే వరి విత్తనాలు సాగు చేశారు. ఓ రైతు పొలం పంట చివరి దశలో ఎండిపోయే పరిస్థితికి చేరుకోగా, మిగితా రైతుల వరి గొలుసులు సాధారం కంటే తక్కువగా వేశాయి. సగం కంటే తక్కువ దిగుబడి వచ్చి రూ. లక్షలు నష్టపోతామని రైతులు ఆందోళన వ్యక్తం చేస్తున్నారు. వరి విత్తనాలు అందించిన వ్యక్తులను ఫోన్‌లో సంప్రదించగా వారు అందుబాటులోకి రాలేదు. నమ్ముకొని వరి పంటను వేసుకుంటే అసలుకే మోసం జరిగిందని, తమకు న్యాయం జరిగేలా చూడాలని రైతులు అధికారులను కోరుతున్నారు. ఈవిషయమై ఏఓ హరిప్రసాద్‌ను వివరణ కోరగా.. రైతుల ఫిర్యాదు మేరకు సంబంధిత పంటల నమూనాలను పరిశోధన కేంద్రానికి పంపించామని తెలిపారు. ఉన్నతాధికారుల ఆదేశాల మే రకు చర్యలు తీసుకుంటామని పేర్కొన్నారు.

కొత్త రకం వరి విత్తనాలతో రైతులు కుదేలు