నాణ్యమైన విత్తనాలతో మేలు

నర్సాపూర్‌ రూరల్‌: నాణ్యమైన విత్తనాలతో సమృద్ధిగా పంటలు పండించాలని జిల్లా నోడల్‌ అధికారి, సీనియర్‌ వ్యవసాయ శాస్త్రవేత్త డాక్టర్‌ రాహుల్‌ విశ్వకర్మ రైతులకు సూచించారు. శుక్రవారం మండలంలోని అవంచలో వ్యవసాయశాఖ, ప్రొఫెసర్‌ జయశంకర్‌ విశ్వవిద్యాలయం ఆధ్వర్యంలో ‘నాణ్యమైన విత్తనం– రైతన్నకు నేస్తం’ అనే కార్యక్రమాన్ని నిర్వహించారు. ఈసందర్భంగా ఎంటీయూ 1010 వరి విత్తన పొలాన్ని పరిశీలించి మాట్లాడారు. నాణ్యమైన విత్తనంతో పంటలు పండించి దేశ సమగ్ర అభివృద్ధికి తోడ్పడాలని రైతులకు సూచించారు. ప్రతి మండలంలో ఒక గ్రామానికి విత్తన కిట్లు అందజేశామని, పండించిన విత్తనాలను ఇతర రైతులకు చేరేవేసేలా చూస్తామన్నారు. విత్తన లభ్యత పెంచడమే కాకుండా నాణ్యమైన విత్తనం కోసం ఈ ప్రయత్నం కొనసాగుతుందన్నారు. జిల్లా వ్యవసాయ అధికారి దేవకుమార్‌ మాట్లాడుతూ.. ఈ విత్తనాన్ని ఒక రైతు నుంచి మరొక రైతుకు ఇవ్వడం ద్వారా మంచి లాభాలతో పాటు నాణ్యమైన విత్తనాలు పొందవచ్చు అన్నారు. కార్యక్రమంలో మండల మానిటరింగ్‌ అధికారి లక్ష్మణ్‌, నర్సాపూర్‌ ఏడీఏ సంధ్యారాణి, ఏఓలు దీపిక, శ్రీదేవి, ఏఈఓలు, కృషి విజ్ఞాన కేంద్రం ప్రొఫెసర్లు, రైతులు పాల్గొన్నారు.

జిల్లా నోడల్‌ అధికారి రాహుల్‌ విశ్వకర్మ