నాటక కళా ప్రతిభ.. శ్యాం ఖానాపూర్‌

Nov 29 2025 7:29 AM | Updated on Nov 29 2025 7:29 AM

రాయచూరు రూరల్‌: నేటి రోజుల్లో నశించి పోతున్న రంగస్థల కళకు ప్రాధాన్యం ఇవ్వాలనే ఉద్దేశ్యం కలిగినవారిలో శ్యాం ఖానాపూర్‌ కూడా ఒకరు. మారుమూల గ్రామంలో జన్మించి రంగస్థల కళకు ప్రాణం పోసిన మహా కళాకారుడుగా దేవదుర్గ తాలూకా గబ్బూరు మండలం ఖానాపూర్‌కు చెందిన శ్యాం పేరు తెచ్చుకున్నారు. హాస్యం, నటనతో విభిన్న పాత్రల్లో తనదైన శైలిలో నటించి వాటికి జీవం పోస్తూ కళలకు ఉత్తేజం కల్పిస్తున్నారు. గత 27 ఏళ్ల నుంచి రంగస్థల కళారంగంలో రాణిస్తున్నారు. పేదరికంలోనే బీకాం వరకు చదువుకున్న శ్యాం గబ్బూరు హూవినబావి రేవణ సిద్దేశ్వర నాటక కంపెనీ తరఫున నాటకాలలో నటిస్తూ వివిధ పాత్రల్లో అభినయించారు. 96 నాటకాల్లో నటించి మంచి పేరు సంపాదించుకున్నారు. శ్యాం ఖానాపూర్‌ సోషల్‌ మీడియాలో ఫేస్‌బుక్‌, ఇన్‌స్ర్ట్రాగాం, యూట్యూబ్‌ చానల్‌లో సమాజంలో జరిగిన ఘటనలు ప్రజలకు వివరిస్తూ అందరి మన్ననలను పొందారు.

సోషల్‌ మీడియాలో లక్షలాది మంది వీక్షణ

వరకట్న దురాచారం, నిరుద్యోగం, మూఢ నమ్మకాలు, ఆచార, విచారాలు, దురలవాట్లు, దుష్పరిణామాలు వంటి అంశాలపై కూతురు సాయంతో వీడియోలు తీసి సోషల్‌ మీడియాలో అప్‌లోడ్‌ చేస్తే లక్షలాది మంది వీక్షిస్తుంటారు. శ్యాం భార్య, పిల్లలు, మిత్రుడు చిదానంద, అక్క కొడుకు వెంకటేష్‌ల సహకారంతో శ్యాం చేసిన వీడియోలు అందరినీ ఆకట్టుకున్నాయి. ఓటీపీల వల్ల జరుగుతున్న మోసాలను ప్రజలకు అర్థమయ్యేలా రీల్స్‌ చేసి వదిలారు. పోలీస్‌ అధికారులు ద్విచక్రవాహనదారులు హెల్మెట్‌ ధరించాలని ఆదేశించడంతో దాని వల్ల ఎవరికి లాభం, ఎవరికి నష్టం అనే విషయాలను క్షుణ్ణంగా కళ్లకు కట్టినట్లు వివరించారు. శ్యాం ఖానాపూర్‌ రంగస్థల కళా రంగంలో అభినయించి చిత్రగుప్తుడు, దుర్యోధనుడు, జ్యోతిష్యుడు స్వామీజీగా, జపాలు చేసే వ్యక్తిగా వివిధ రకాల పాత్రల్లో రాణించారు.

రంగస్థల కళకు ప్రాణం పోస్తున్న కళాకారుడు

విభిన్న పాత్రల్లో తనదైన శైలిలో రాణించిన వైనం