టైలరింగ్‌ శిక్షణ ప్రారంభం

Nov 29 2025 7:29 AM | Updated on Nov 29 2025 7:29 AM

హొసపేటె: బీటీర్‌ నగర్‌ అంబేడ్కర్‌ భవనంలో ఏర్పాటు చేసిన ఉచిత టైలరింగ్‌ శిక్షణ కేంద్రాన్ని మున్సిపల్‌ కౌన్సిల్‌ సభ్యుడు తారిహళ్లి జంబునాథ్‌ గురువారం ప్రారంభించారు. ఈ సందర్భంగా జంబునాథ్‌ మాట్లాడుతూ, ఎంఎస్‌పీఎల్‌ లిమిటెడ్‌ సీఎస్‌ఆర్‌ పథకం కింద బీటీఆర్‌ నగర్‌లో ప్రారంభించిన టైలరింగ్‌ శిక్షణ కేంద్రం పేద, వెనుకబడిన మహిళలకు ఉపాధి మార్గాన్ని చూపుతుందన్నారు. సీఎస్‌ఆర్‌ విభాగం ఉపాధ్యక్షుడు రమేష్‌ మాట్లాడుతూ ఆరు నెలల శిక్షణ కాలంలో మహిళలకు వినూత్న దుస్తుల నమూనా, బ్లౌజులు, ఇతర కుట్టు పద్ధతులు నేర్పిస్తామన్నారు. సామాజిక సేవలో ముందంజలో ఉందని, రాబోయే రోజుల్లో ఈ ప్రాంతంలో మరిన్ని సామాజిక కార్యక్రమాలు అమలు చేస్తామన్నారు. ఈ కార్యక్రమంలో మొత్తం 40 మంది మహిళా శిబిరార్థులు పాల్గొన్నారు.

యద్దలదొడ్డిలో భూప్రకంపనం

రాయచూరురూరల్‌: గురువారం రాత్రి సింధనూరు తాలూకా యద్దలదొడ్డిలో భూమి కంపిచండంతో స్థానికులు ఆందోళన చెందారు. ఉన్న పాటుగా ప్రకంపనలు రావడంతో ఇళ్లలో గోతులు ఏర్పడ్డాయి. జనం పరుగు తీశారు.

పొలంలో సన్నీలియోన్‌ చిత్రం

హుబ్లీ: ఓ రైతన్న తాను పండించిన పంటను సక్రమంగా కాపాడుకోవడానికి సరికొత్త ఆలోచనకు శ్రీకారం చుట్టారు. యాదగిరి జిల్లా ముదనూరుకు చెందిన సదరు రైతన్న బాలీవుడ్‌ నటి మోహకసార సన్నీలియోన్‌ నిలువెత్తు ఫొటో పెట్టాడు. పండించిన పత్తి దిగుబడుల కోతల వరకూ ఎవరి చెడు దృష్టి పడరాదని ఈ ఫొటో పెట్టినట్లు వారు తెలిపారు. దొంగలు, తదితర సంఘ విద్రోహ శక్తులు ఏపుగా పండిన పంటలపై వారి చెడు దృష్టి పడకుండా ఫొటోకు ఆకర్షితులవుతారని తెలిపారు. తమ పంట క్షేమంగా ఉంటుందని ఆ అన్నదాత తన అభిప్రాయాన్ని వెల్లడించారు.

అగ్ని ప్రమాదంలో దుకాణాలు దగ్ధం

హుబ్లీ: ఓ ఆకతాయి చేసిన బాధ్యతా రాహిత్యమైన పనితో ఏడు దుకాణాలు దగ్ధమయ్యాయి. విజయపుర చాలుక్య నగర ఎస్‌బీఐ బ్యాంక్‌ వద్ద సిగరెట్‌ ఆర్పకుండా పడేసిన సదరు ఆకతాయిల చర్యలతో నిప్పంటుకొని సిలెండర్‌ పేలడంతో దుకాణాలు కాలిబూడిదయ్యాయి. మంటలు ప్రక్కన ఉన్న ఇంటికి వ్యాపించినా.. ఎలాంటి ప్రాణాపాయం జరగకపోవడంతో ఊపిరి పీల్చుకున్నారు. సమాచారం అందుకున్న తక్షణమే అగ్నిమాపక సిబ్బంది హుటాహుటిన వచ్చి మంటలను అర్పారని స్థానికులు తెలిపారు. పోలీసులు కేసు నమోదు చేసుకున్నారు.

మహిళల పోరుబాట

రాయచూరు రూరల్‌: రాష్ట్రంలో అక్రమ మద్యం నియంత్రణను కట్టడి చేయాలని మహిళలు పోరుబాట ప్రారంభించారు. బెంగళూరులో ముఖ్యమంత్రి సిద్ధరామయ్యను కలిసిన నారీమణులు తమ సమస్యలను విన్నవించారు. వారు మాట్లాడుతూ గ్రామ సభల ద్వారా మద్యం దుకాణాలపై నిర్ణయం తీసుకోవడానికి అనుమతులు ఇవ్వాలని డిమాండ్‌ చేశారు. మద్యపాన నిషేధం–47 ప్రకారం మద్యం దుకాణాల ఏర్పాటుకు గ్రామ సభల నుంచి అను మతి పొందేలా చూడాలన్నారు. ఎక్కడ బడితే అక్కడే విక్రయించడంతో చిన్న పిల్లలు మద్యానికి బానిసలవుతారని అరోపించారు. అక్రమ మద్యం విక్రయానికి పుల్‌స్టాప్‌ పెట్టాలని వినతి పత్రం సమర్పించారు. మహిళలు పాల్గొన్నారు.