అమ్మవారి సన్నిధిలో.. నక్షత్ర వనం

అమ్మవారి సన్నిధిలో.. నక్షత్ర వనం

పెద్దమ్మతల్లి ఆలయ ఆవరణలో 48 రకాల మొక్కలతో ఏర్పాటు
● నక్షత్రాలు, రాశులు, నవగ్రహాల పేరుతో నాటి, సంరక్షణ ● మొక్కలకు పూజలు చేస్తున్న భక్తులు

హిందూ సంప్రదాయంలో ప్రకృతిలోని పూలు, మొక్కలను దేవతామూర్తుల ప్రతిరూపాలుగా భక్తులు కొలవడం ఆనవాయితీగా వస్తోంది. అందుకే ప్రతీ పండుగలో వీటికి ప్రత్యేక స్థానం ఉంటుంది. భక్తులు తమ జన్మ నక్షత్రాల్లో ఏర్పడిన దోషాల నుంచి విముక్తి కోసం వాటికి ప్రతిరూపాలైన మొక్కలకు పూజలు చేయడం ద్వారా ఫలితం ఉంటుందని నమ్ముతారు. ఈ నేపథ్యాన భక్తుల మనోభావాలకు అనుగుణంగా పాల్వంచ మండలంలోని పెద్దమ్మతల్లి ఆలయ సన్నిధిలో నక్షత్రాల ఆధారంగా వివిధ రకాల మొక్కలు నాటి వనంగా తీర్చిదిద్దారు. నక్షత్రాలు, రాశులు, నవగ్రహాల పేర్లతో మొక్కలు పెంచి సంరక్షిస్తుండడంతో భక్తులు పూజలు చేస్తున్నారు. –పాల్వంచరూరల్‌

నక్షత్రాల వారీగా మొక్కలు ఇవే..

హిందూ సంప్రదాయంలో జాతక రీత్యా ఒక్కో రాశి వారు నిర్దేశిత మొక్కకు పూజిస్తే శుభ ఫలితాలు గోచరిస్తాయని నమ్ముతారు. ఇందులో భాగంగా అశ్విని నక్షత్రం వారు అడ్డసరం, భరణి నక్షత్రం వారు ఉసిరి, కృతిక – మేడి, రోహిణి – నేరేడు, మృగశిర – సండ్ర, ఆరుద్ర – రేల, పునర్వసు – వెదురు లేదా గన్నేరు, పుష్యమి నక్షత్రం – రావి, ఆశ్లేష – నాగకేసరి, జ్యేష్ఠ – దేవదారు, అనూరాధ – పొగడ, విశాఖ – నాగమల్లి, స్వాతి – మద్ది, చిత్త – మారేడు, హస్త – కుంకుడు, ఉత్తర – జువ్వి, పుబ్బ – మోదుగు, మఖ – మర్రి, మూల – వేగిస, పూర్వాషాడ – నిమ్మ, నారింజ, ఉత్తరాషాడ – పనస, శ్రవణా నక్షత్రం – తెల్లజిల్లేడు, ధనిష్ఠ – జమ్మి, శతభిషం – అరటి, పూర్వాభాద్ర – మామిడి, ఉత్తరాభాద్ర – వేపతో పాటు రేవతి నక్షత్రం వారు విప్ప మొక్కకు పూజ చేస్తే మంచిదని నమ్మిక.

రాశులు, గ్రహాల వారీగా..

ఇక రాశుల వారీగా మేషం – ఎర్రచందనం, వృషభం – ఏడుకాయల పాయ, మిథునం – పనస, కర్కాటకం – మోదుగు, సింహం – కలిగట్టు, కన్య – మామిడి, తుల – పొగడ, వృశ్చికం – సండ్ర, ధనస్సు – రావి, మకరం – జిట్రేగు, కుంభం – జమ్మి, మీన రాశి వారు మర్రి మొక్కకు పూజలు చేయాలని పండితులు చెబుతున్నారు. అలాగే, నవగ్రహాల్లో సూర్యుడికి జిల్లేడు, చంద్రుడికి – మోదుగు, కుజుడికి – చండ్ర, బుధ గ్రహానికి – ఉత్తరేణి, గురు – రావి, శుక్ర – అరటి, శని – జమ్మి, రాహువు – గరిక, కేతువు కోసం దర్భ మొక్కలు పూజలు చేశాలని అంటున్నారు.

1/1

అమ్మవారి సన్నిధిలో.. నక్షత్ర వనం