పరిశ్రమల ఏర్పాటుకు అనుకూలత కల్పించండి

పరిశ్రమల ఏర్పాటుకు అనుకూలత కల్పించండి

అనంతపురం అర్బన్‌: జిల్లాలో నూతన పరిశ్రమల ఏర్పాటుకు అనుకూల వాతావరణం కల్పించాలని సంబంధిత అధికారులను కలెక్టర్‌ ఓ.ఆనంద్‌ ఆదేశించారు. పరిశ్రమలు, ఎగుమతి ప్రోత్సాహక కమిటీ సమావేశం శుక్రవారం కలెక్టరేట్‌లోని మినీ కాన్ఫరెన్స్‌ హాల్‌లో జరిగింది. కలెక్టర్‌ మాట్లాడుతూ.. ఏపీఐఐసీ పారిశ్రామికవాడల్లో ఇప్పటికీ ఉత్పత్తి ప్రారంభించని యూనిట్లను గురించి ఆరా తీశారు. వాటిలో ఉత్పత్తి మొదలు పెట్టేలా చర్యలు తీసుకోవాలని జోనల్‌ మేనేజర్‌ను ఆదేశించారు. ఔత్సాహిక పారిశ్రామికవేత్తలను ఆహ్వానించి సింగిల్‌ డెస్క్‌ పోర్టల్‌ ద్వారా అనుమతులు మంజూరు చేయాలన్నారు. పరిశ్రమల స్థాపనకు ఎస్సీ, ఎస్టీ వర్గాల వారికి విరివిగా రుణాలు మంజూరు చేయాలని సూచించారు. అనంతరం పారిశ్రామికాభివృద్ధి పాలసీ కింద రెండు యూనిట్లకు విద్యుత్‌ రాయితీ రూ.3.84 లక్షలు, వడ్డీ రాయితీ కింద నాలుగు యూనిట్లకు రూ.4.68 లక్షలు, పెట్టుబడి రాయితీ కింద 11 యూనిట్లకు రూ.3.88 కోట్లు సబ్సిడీ మంజూరుకు ఆమోదం తెలిపారు. సమావేశంలో వివిధ శాఖల అధికారులు పాల్గొన్నారు.

భూముల సమస్యలు పరిష్కరించాలి

జాతీయ రహదారి 544డీ నిర్మాణంలో తలెత్తిన భూ సమస్యలను త్వరిగతగతిన పరిష్కరించాలని కలెక్టర్‌ ఓ.ఆనంద్‌ సంబంధిత అధికారులను ఆదేశించారు. కలెక్టర్‌ శుక్రవారం కలెక్టరేట్‌లోని తన చాంబర్‌లో జాయింట్‌ కలెక్టర్‌ శివ్‌ నారాయణ్‌ శర్మతో కలిసి అధికారులతో సమీక్షించారు. ఈ సందర్భంగా ఆయన మట్లాడుతూ ప్రాజెక్టులు నిర్ధేశించిన సమయంలో పూర్తికావాలంటే అందుకు తగ్గట్టుగా పనులు జరగాలన్నారు. ఎన్‌హెచ్‌ 544డీకి సంబంధించి తాడిపత్రి అర్బన్‌, బుగ్గ, బోడిగానిదొడ్డి, ముచ్చుకోట, కొండాపురం, ఎర్రగుంటపల్లి తదితర గ్రామాల పరిధిలో పెండింగ్‌లో ఉన్న భూ సమస్యలపై ప్రత్యేక దృష్టి సారించి పరిష్కారానికి చర్యలు తీసుకోవాలని ఆదేశించారు. సమావేశంలో ఆర్‌డీఓ కేశవనాయుడు, నేషనల్‌ హైవే పీడీ తరుణ్‌కుమార్‌, మేనేజర్‌ మురళీకృష్ణ, కలెక్టరేట్‌ భూ విభాగం సూపరింటెండెంట్‌ రియాజుద్దీన్‌, డీటీ శ్రీనివాసులు పాల్గొన్నారు.

సమాజంలో లింగ వివక్ష తగదు

అనంతపురం టౌన్‌: సమాజంలో లింగ వివక్ష తగదని కలెక్టర్‌ ఓ ఆనంద్‌ అన్నారు. లింగ వివక్షపై కలెక్టర్‌ కార్యాలయంలో డీఆర్‌డీఏ అధికారులతో కలిసి పోస్టర్లను శుక్రవారం కలెక్టర్‌ విడుదల చేసి, మాట్లాడారు. పురుషులతో సమానంగా అన్ని రంగాల్లో మహిళలు రాణిస్తున్నారన్నారు. లింగ వివక్షతపై చేపట్టే ర్యాలీల్లో అధికారులు తప్పనిసరిగా పాల్గొనాలన్నారు. డీఆర్‌డీఏ పీడీ శైలజ మాట్లాడుతూ.. శనివారం నుంచి డిసెంబర్‌ 23వ తేదీ వరకు మహిళలపై చూపుతున్న వివక్షత, బాల్య వివాహాలు, మహిళా సాధికారతపై జిల్లా వ్యాప్తంగా అవగాహన సదస్సులు నిర్వహిస్తున్నట్లు తెలిపారు. కార్యక్రమంలో ఏపీడీ రాధారాణి, డీపీఎం రవీంద్రబాబు, ఏపీఎంలు భాస్కర్‌నాయుడు, శివప్రసాద్‌, జిల్లా సమాఖ్య అధ్యక్షురాలు సుశీలమ్మ పాల్గొన్నారు.

మెగా పీటీఎం విజయవంతం చేయాలి

అనంతపురం సిటీ: మెగా పేరెంట్‌ మీటింగ్‌ (మెగా పీటీఎం 3.0)లను విజయవంతం చేయాలని కలెక్టర్‌ ఆనంద్‌ పిలుపునిచ్చారు. కలెక్టరేట్‌ ఆవరణలోని రెవెన్యూ భవన్‌లో శుక్రవారం ఆయన విలేకరులతో మాట్లాడారు. డీఈఓ ప్రసాద్‌బాబు, ఆర్‌ఐఓ వెంకటరమణనాయక్‌, సమగ్రశిక్ష ఏపీసీ శైలజ పాల్గొన్నారు. జిల్లా వ్యాప్తంగా 1,752 పాఠశాలలు, కళాశాలల్లో పీటీఎం సమావేశాలు నిర్వహించనున్నట్లు వివరించారు. మొత్తం 2,15,504 మంది విద్యార్థులతో పాటు వారి తల్లిదండ్రులు కూడా పాల్గొంటారని వివరించారు. కార్యక్రమానికి అన్ని స్థాయిల ప్రజాప్రతినిధులను ఆహ్వానించాలని ప్రధానోపాధ్యాయులు, ఉపాధ్యాయులను ఆదేశించినట్లు తెలిపారు. పిల్లల ప్రగతి, వారి నడవడిక, మాట తీరు, సాధించిన మార్కులు వంటి అన్ని అంశాలపై సమగ్రంగా చర్చిస్తారన్నారు. డొక్కా సీతమ్మ భోజన కార్యక్రమంలో భాగంగా సహపంక్తి భోజనాలు కూడా ఏర్పాటు చేయనున్నట్లు వివరించారు. అనంతరం విద్యార్థులకు హోలిస్టిక్‌ ప్రోగ్రెస్‌ కార్డులు అందజేయనున్నట్లు తెలిపారు.