ఎస్సీ, ఎస్టీ గృహాల సోలరైజేషన్‌కు ఒప్పందం

ఎస్సీ, ఎస్టీ గృహాల సోలరైజేషన్‌కు ఒప్పందం

విశాఖ సిటీ : ఎస్సీ, ఎస్టీ గృహాలపై రూఫ్‌టాప్‌ సోలార్‌ ప్లాంట్ల ఏర్పాటు కోసం ఏపీఈపీడీసీఎల్‌ సంస్థ.. సద్భవ్‌ ఫ్యూచర్‌ టెక్‌ లిమిటెడ్‌తో ఒప్పందం కుదుర్చుకుంది. సోమవారం ఏపీఈపీడీసీఎల్‌ కార్పొరేట్‌ కార్యాలయంలో సంస్థ సీఎండీ ఇమ్మడి పృథ్వీతేజ్‌, డైరెక్టర్‌ టి.వి.సూర్యప్రకాశ్‌ సమక్షంలో సీజీఎం ఎల్‌.దైవప్రసాద్‌, సద్భవ్‌ ఫ్యూచర్‌ టెక్‌ లిమిటెడ్‌ డైరెక్టర్‌ భూపేంద్ర సింగ్‌ ఒప్పంద పత్రాలపై సంతకాలు చేశారు. ఈ ఒప్పందం కింద నర్సీపట్నం, పాలకొండ, పెద్దాపురం, రామచంద్రపురం, టెక్కలి, విజయనగరం రూరల్‌, తాడేపల్లిగూడెం డివిజన్లలోని 44,998 ఎస్సీ, ఎస్టీ సర్వీసులకు మొత్తం 90 మెగావాట్ల సామర్థ్యంతో రూఫ్‌టాప్‌ సోలార్‌ ప్లాంట్లను ఏర్పాటు చేయనున్నారు.

పీఎం సూర్యఘర్‌ పథకం కింద

ఉచితంగా సోలార్‌

పీఎం సూర్యఘర్‌ పథకంలో భాగంగా ఏపీఈపీడీసీఎల్‌ పరిధిలోని సుమారు 2 లక్షల ఎస్సీ, ఎస్టీ గృహాలపై ఉచితంగా సోలార్‌ ప్లాంట్లను ఏర్పాటు చేయడానికి టెండర్‌ ప్రక్రియ ఇప్పటికే పూర్తి చేశారు. ఈ పథకం కింద ప్రతి ఎస్సీ, ఎస్టీ గృహ వినియోగదారుని ఇంటిమీద 200 చదరపు అడుగుల ప్రాంతంలో 2 కిలోవాట్ల సామర్థ్యంతో రూఫ్‌టాప్‌ సోలార్‌ ప్లాంట్లు ఏర్పాటు చేయనున్నారు.