‘ఫేక్‌’బుక్‌ ఖాతాలపై చర్యలు

Action on fack facebook accounts - Sakshi

ప్రభుత్వం, ప్రజాప్రతినిధుల పేరిట నకిలీ ఫేస్‌బుక్‌ ఖాతాలు తెరవొద్దు

నెటిజన్లను హెచ్చరిస్తూ ఐటీ శాఖ ప్రకటన

సాక్షి కథనంపై స్పందన

సాక్షి, హైదరాబాద్‌: రాష్ట్ర ప్రభుత్వం పేరిట, ప్రజా ప్రతినిధుల పేరిట నకిలీ ఫేస్‌బుక్‌ ఖాతాలు తెరిస్తే కఠిన చర్యలు తీసుకుంటామని ఐటీ శాఖ డిజిటల్‌ విభాగం నెటిజన్లకు హెచ్చరిక జారీ చేసింది. ‘ఫేక్‌’బుక్‌ సర్కార్‌’ శీర్షికన శుక్రవారం సాక్షి ప్రచురించిన కథనంపై వెంటనే స్పందించింది. ఫేస్‌బుక్‌లో ప్రభుత్వం, ప్రజాప్రతినిధుల పేరిట ఉన్న నకిలీ ఖాతాలను తొలగించే చర్యలు చేపట్టింది. ఈ మేరకు ‘‘గత రెండేళ్లలో ప్రభుత్వాన్ని, ప్రజా ప్రతినిధులను అనుకరిస్తూ తెరిచిన దాదాపు 130 నకిలీ ఖాతాలను మూసివేయించాం.

మరో పదిహేను నకిలీ ఫేస్‌బుక్‌ అకౌంట్లను తొలగించేలా శుక్రవారం చర్యలు తీసుకున్నాం. ప్రభుత్వం మీద, నాయకుల మీద ఆపేక్షతో, అత్యుత్సాహంతో కొందరు వ్యక్తులు ఇలాంటి నకిలీ ఖాతాలు తెరుస్తున్నారు. వాటిని ఎప్పటికప్పుడు రాష్ట్ర ప్రభుత్వ డిజిటల్‌ మీడియా విభాగం మానిటర్‌ చేస్తోంది. సంబంధిత వ్యక్తులను హెచ్చరిస్తోంది. రాష్ట్ర పోలీస్‌ శాఖలోని సైబర్‌ క్రైం విభాగం, ఫేస్‌బుక్‌ యాజమాన్యం సహాయంతో వాటిని తొలగిస్తున్నాం. ఇప్పటివరకు మానవతా దృక్పథంతో ఎవరిపైనా కఠిన చర్యలు తీసుకోలేదు.

మళ్లీ మళ్లీ అదే పొరపాటు చేసిన వారిపై చర్యలు తీసుకుంటాం..’’ అని డిజిటల్‌ మీడియా విభాగం డైరెక్టర్‌ కొణతం దిలీప్‌ ప్రకటన జారీ చేశారు. ప్రభుత్వం ‘తెలంగాణ సీఎంవో’, ‘ఐటీ మినిస్టర్‌ తెలంగాణ’ పేర్లతో అధికారిక ఫేస్‌బుక్‌ పేజీలను నిర్వహిస్తోందని.. కొందరు మంత్రులు, ప్రభుత్వ సంస్థలు, ప్రజాప్రతినిధులకు అధికారిక పేజీలు ఉన్నాయని ఆ ప్రకటనలో పేర్కొన్నారు. నీలి రంగులో ‘వెరిఫైడ్‌’టిక్‌ మార్కు ఉన్న ఫేస్‌బుక్‌ పేజీలనే అధికారిక పేజీలుగా గుర్తించాలని ప్రజలకు సూచించారు. ప్రభుత్వం, ప్రజాప్రతినిధుల పేరిట నకిలీ ఫేస్‌బుక్‌ పేజీలున్నట్లు గుర్తిస్తే dir_dm@telangana.gov.in  కు ఫిర్యాదు చేయాలని కోరారు.  

Advertisement
Advertisement

*మీరు వ్యక్తం చేసే అభిప్రాయాలను ఎడిటోరియల్ టీమ్ పరిశీలిస్తుంది, *అసంబద్ధమైన, వ్యక్తిగతమైన, కించపరిచే రీతిలో ఉన్న కామెంట్స్ ప్రచురించలేం, *ఫేక్ ఐడీలతో పంపించే కామెంట్స్ తిరస్కరించబడతాయి, *వాస్తవమైన ఈమెయిల్ ఐడీలతో అభిప్రాయాలను వ్యక్తీకరించాలని మనవి

Back to Top