ఒంటరి ఏనుగు ప్రమాదకారి

యశవంతపుర : లోకసభ ఎన్నికల ఫలితాల తరువాత కాంగ్రెస్‌ నాయకత్వంపై అసంతృప్తి వ్యక్తం చేస్తున్న అ పార్టీ నాయకులకు చురకులు అంటించారు మాజీ సీఎం సిద్దరామయ్య. గురువారం ఇక్కడి బండి మహాకాళి ఆలయంలో హీరో దునియా విజయ్‌ నటిస్తున్న సలగ చిత్రం షూటింగ్‌ మూహుర్తానికి మాజీ సీఎం సిద్దరామయ్య క్లాప్‌ కొట్టి డైలాగ్‌ చెప్పారు. ప్రస్తుతం ఆ వ్యాఖ్యలు రాజకీయంగా దుమారం రేపుతున్నాయి. ‘ఏనుగు నడిచిందే దారి, ఒంటరి ఏనుగు చాలా ప్రమాదకరమని’ డైలాగ్‌ చెబుతూ క్లాప్‌ కొట్టారు. ఈ సందర్భంగా సిద్దరామయ్య డైలాగ్‌ రాజకీయ వర్గాల్లో అందరి దృష్టిని ఆకర్షించింది. తాను విజయ్‌ నటించిన రెండు సినిమాలను చూశాను, ప్రజలకు మంచి సందేశం, మనోరంజనంగా ఇచ్చే సినిమాలను తీయా లన్నారు. సలగ సినిమా కథను తనకు చెప్పలేదని, చిత్రం విజయవంతం కావాలని ఆయన హీరో దునియా విజయ్‌కు శుభాకాంక్షలు తెలిపారు. నేడు విలువలతో కూడిన సినిమాలు రావటం లేదని, నేటి యువ దర్శకులు సమాజానికి ఉపయోగపడే సినిమాలు నిర్మించాలన్నారు.