వైరల్‌: ధోని పాదాలను ముద్దాడిన అభిమాని

సాక్షి, స్పోర్ట్స్‌ : టీమిండియా మాజీ కెప్టెన్‌ మహేంద్ర సింగ్‌ ధోనికి ప్రపంచ వ్యాప్తంగా ఫ్యాన్‌ ఫాలోయింగ్‌ ఉన్న విషయం తెలిసిందే. తమ అభిమాన క్రికెటర్‌పై తమకున్న ప్రేమను ధోని అభిమానులు చాలా సందర్భాల్లో చాటుకున్నారు.  ఎన్నో అద్భుత ప్రదర్శనలతో ఈ జార్ఖండ్‌ బ్యాట్స్‌మన్‌ అభిమానుల మనసులను దోచుకున్నాడు. అందుకే మైదానంలో ధోని ఏం చేసినా అవి సోషల్‌ మీడియాలో వైరల్‌ అవుతాయి. 

ఇటీవల లక్నోలో జరిగిన ఓ కార్యక్రమంలో పాల్గొన్న ధోనికి ఓ లిటిల్‌ అభిమాని నుంచి ఊహించని సంఘటన ఎదురైంది. ధోని చేతుల మీదుగా బహుమతి అందుకోవడానికి వేదికపైకి వచ్చిన ఆ అభిమాని వస్తూ వస్తూనే ధోని కాళ్ల మీద పడుతూ.. పాదాలను ముద్దాడాడు. దీంతో అక్కడి వారంతా ఒక్కసారిగా ఆశ్చర్యానికిలోనయ్యారు. వెంటనే ధోని అతన్ని పైకి లేపి కౌగిలించుకొని మరీ ఓ సెల్ఫీ దిగాడు. అంతేగాకుండా ఓ చిన్న బ్యాట్‌ను బహుమతిగా అందజేశాడు. దీంతో ఆ అభిమాని ఆనందానికి అవధుల్లేకుండా పోయింది. తన ఆరాధ్యదైవమైన ధోని తన ముందుండటంతో ఆ బుడ్డోడు మరోసారి పాదాభివందనం చేశాడు. దీనికి సంబంధించిన వీడియో ఇప్పుడు నెట్టింట్లో హల్‌చల్‌ చేస్తోంది. ఇక గతంలో మ్యాచ్‌ జరుగుతుంటే కొంత మంది అభిమానులు ధోనికి ఇలా పాదాభివందనం చేసిన విషయం తెలిసిందే.