ఉద్యోగ యత్నాలు ఫలించడం లేదా?

కొందరు బాగానే చదువుకుని ఉంటారు. ఉన్నత విద్యార్హతలు సాధించి ఉంటారు. పోటీ ప్రపంచంలో కావలసినవన్నీ ఉన్నా ఉద్యోగం దొరకడం గగనమవుతుంది. ఎన్ని ప్రయత్నాలు కొనసాగిస్తున్నా ఫలితం కనిపించక నిరాశలో కూరుకుపోతుంటారు. ఉద్యోగయత్నాలు సఫలం కావాలంటే..

♦ సూర్యుడిని ఆరాధించండి. ఏదైనా ఆదివారం రోజున ప్రారంభించి, ప్రతిరోజూ ఆదిత్య హృదయం  పఠనం కొనసాగించండి. ఇలా ఆరు వారాలు నిరాటంకంగా చేయాల్సి ఉంటుంది.
♦ ఆదివారం రోజున ఉదయం వేళ నన్నారి (సుగంధి పాల చెట్టు) వేరును సేకరించి, శుభ్రం చేసి, పూజలో ఉంచండి. మరునాడు దానిని ఒక తాయెత్తులో ఉంచి, ఎరుపుదారంతో మెడలో ధరించండి.
♦ ఏదైనా గురువారం రోజున గోవులకు గోధుమ రొట్టెలు, నానబెట్టిన శనగలు తినిపించండి. అలాగే, ప్రవహించే నీటిలో చిన్న బెల్లం ముక్కను విడిచిపెట్టండి. ఇలా పదహారు వారాలు పాటించాల్సి ఉంటుంది.
♦  ఏదైనా సోమవారం శివాలయాన్ని దర్శించుకుని, శివలింగానికి చెరకురసంతో అభిషేకం జరిపించండి. ఇలా వరుసగా పదకొండు వారాలు చేయాలి.
♦  ప్రతిరోజూ ఉదయం వేళ కాకులకు నల్ల నువ్వులు కలిపిన అన్నం ముద్దలను ఆహారంగా వేయండి. ఆ తర్వాతనే అల్పాహారం తీసుకోండి.

– పన్యాల జగన్నాథదాసు