స్కూల్ ఎడ్యుకేషన్

డాల్ఫిన్లు వాసన చూడలేవా?
 సముద్ర జలాల్లో నివసించే డాల్ఫిన్లు
 ‘సెటాషియన్స్’ అనే క్షీరదాల జాతికి చెందినవి. భూగోళంపైన అతి శీతల ప్రాంతాల్లో ఉండే చల్లని సముద్ర జలాలు మొదలుకొని ఉష్ణమండల ప్రాంతంలో ఉండే వెచ్చని జలాల వరకు అన్ని రకాల సముద్ర జలాల్లోనూ మనకు డాల్ఫిన్లు కనిపిస్తాయి. డాల్ఫిన్లలో కిల్లర్‌వేల్, పైలట్, బాటిల్‌నోస్ డాల్ఫిన్ అని విభిన్న రకాలవి ఉన్నాయి. సముద్ర జలాల నీటిలో కలిసిపోయే విధంగా కొన్ని రకాలకు చెందిన డాల్ఫిన్లు తెలుపు - నలుపు రంగులో ఉంటే మరికొన్ని చిక్కని నలుపు రంగులో ఉంటాయి.
 
  సీసామూతిలాంటి ముక్కుతో ఉండే డాల్ఫిన్లు మాత్రం బూడిద రంగులో ఉంటాయి. డాల్ఫిన్ల రకాలను బట్టి 8 అడుగుల నుంచి 20 అడుగుల పొడవు వరకు ఉంటాయి. సాధారణంగా డాల్ఫిన్లు రోజుకి 3 నుంచి 7 మైళ్ల దూరం వరకు ఈదుతాయి. వీటి ముందు భాగం, అలాగే వెనుక భాగం కొనదేలినట్లు ఉండటంతో ఈదేటప్పుడు వీటి శరీరంపైన ముందు నుంచి వెనక్కి నీరు సులభంగా ప్రవహించగలుగుతుంది. ఈ ప్రక్రియ ఈత విషయంలో డాల్ఫిన్లకు బాగా ఉపకరిస్తుంది.
 
 డాల్ఫిన్ల తెలివితేటలు, సామూహిక జీవనం లక్షణాలను పరిగణనలోకి తీసుకుని చాలామంది శాస్త్రజ్ఞులు వాటిని ‘సముద్రంలో నివసించే మనుషులు’గా పరిగణిస్తుంటారు. నేలపైన మనుషులు ఎలా తెలివైనవారో, జలచరాల్లో డాల్ఫిన్లు అలా తెలివైనవని అంటుంటారు. ఇవి ఒంటరిగా కాకుండా గుంపులు, గుంపులుగా జీవిస్తుంటాయి. చూపులతో, రకరకాల శబ్దాలతో, స్పర్శతో, ఒకదానికొకటి సందేశాలు పంపించుకుంటాయి. ఆఖరికి రుచి చూడటంలో కూడా ఇవి దిట్టలే. అయితే చిత్రమైన విషయమేమిటంటే వీటికి వాసన చూసే శక్తి మాత్రం లేదు.