వ్యక్తి దారుణహత్య

Man Murdered In Dhone Living Relationship - Sakshi

సాక్షి, డోన్‌ (కర్నూలు): పట్టణంలోని వైఎస్‌ నగర్‌లో ఓ వ్యక్తి దారుణ హత్యకు గురయ్యాడు. దుండగులు బీరు సీసాలు, రాళ్లతో మోది హత్య చేసి, ఆత్మహత్యగా చిత్రీకరించేందుకు రైల్వే ట్రాక్‌పై పడేసి ఉడాయించారు. పోలీసులు తెలిపిన వివరాలు.. మండల పరిధిలోని ఉంగరానిగుండ్ల గ్రామానికి చెందిన ఖాజా(35) భార్య మైరూన్, పిల్లలతో వచ్చి దాదాపు 12 ఏళ్ల క్రితం డోన్‌ పట్టణంలో కాపురం పెట్టాడు. రెండేళ్లకే భార్య, పిల్లలను వదిలి కృష్ణగిరి మండలం కటారుకొండ గ్రామానికి చెందిన ఓ మహిళతో వివాహేతర సంబంధం పెట్టుకొని ఆమెతోనే కలిసి వైఎస్‌ నగర్‌లో అద్దె ఇంట్లో సహజీవనం చేస్తున్నారు.

గురువారం ఉదయం రైల్వే ట్రాక్‌పై శవమై కనిపించాడు. స్థానికుల సమాచారంతో డీఎస్పీ ఖాదర్‌బాషా, పట్టణ సీఐ కళావెంకటరమణ ఘటనా స్థలానికి చేరుకొని పరిశీలించారు. మృతదేహం పడి ఉన్న చోటుకు కాస్త దూరంలో పూటుగా మద్యం తాపించి, ఆపై హత్య చేసిన ఆనవాళ్లు కనిపించాయి. దుండగులు నమ్మించి తీసుకొచ్చి ఘాతుకానికి పాల్పడినట్లు డీఎస్పీ అనుమానం వ్యక్తం చేశారు. అనంతరం అక్కడి నుంచి దుస్తులు లేకుండా ఈడ్చుకుంటూ వచ్చి రైల్వే ట్రాక్‌పై పడేసినట్లు గుర్తించారు. కాగా సహజీనం చేస్తున్న మహిళ మూడు రోజులుగా ఇంట్లో కనిపించలేదని స్థానికులు పోలీసులకు తెలిపారు. 

డాగ్‌ స్క్వాడ్, క్లూస్‌టీంతో విచారణ 
డీఎస్పీ ఖాదర్‌బాషా వెంటనే కర్నూలు డాగ్‌ స్క్వాడ్, క్లూస్‌ టీంను రప్పించారు. బీరు సీసాలపై ఉన్న వేలి ముద్రలు  సేకరించారు. డాగ్‌ స్క్వాడ్‌ నేరుగా మృతుని ఇంటి వద్దకు వెళ్లి, వెంటనే పక్కనే ఉన్న కాలనీలోని ఓ ఇంట్లోకి వెళ్లి ఆగిపోయింది. మృతుడి సోదరుడు దూదేకుల షేక్‌ హుసేన్‌ ఫిర్యాదు మేరకు సహజీవనంచేస్తున్న మహిళతో పాటు మరికొందరు గుర్తుతెలియని వ్యక్తులపై కేసు నమోదు చేసినట్లు రైల్వే ఎస్‌ఐ హనుమంతయ్య తెలిపారు.    

Read latest Crime News and Telugu News | Follow us on FaceBook, Twitter

Advertisement

*మీరు వ్యక్తం చేసే అభిప్రాయాలను ఎడిటోరియల్ టీమ్ పరిశీలిస్తుంది, *అసంబద్ధమైన, వ్యక్తిగతమైన, కించపరిచే రీతిలో ఉన్న కామెంట్స్ ప్రచురించలేం, *ఫేక్ ఐడీలతో పంపించే కామెంట్స్ తిరస్కరించబడతాయి, *వాస్తవమైన ఈమెయిల్ ఐడీలతో అభిప్రాయాలను వ్యక్తీకరించాలని మనవి

Taboola - Feed

Back to Top