వ్యక్తి దారుణ హత్య

Man Murdered Brutally In Khammam - Sakshi

కారేపల్లి : ఓ వ్యక్తిని దారుణంగా హత్య చేసి పొలంలో పడేసిన ఘటన మండల పరిధిలోని ఎర్రబోడు గ్రామంలో శుక్రవారం చోటు చేసుకుంది. మృతదేహం అనుమానాస్పద స్థితిలో పడి ఉండటంతో ఇది ముమ్మాటికీ హత్యేనని..స్థానికులు అనుమానాలు వ్యక్తం చేస్తున్నారు. కుటుంబ సభ్యులు, పోలీసులు తెలిపిన వివరాల ప్రకారం..మండలంలోని ఎర్రబోడు గ్రామానికి చెందిన పాయం జంపయ్య (32) కూలి పనులు చేసుకుని జీవనం కొనసాగిస్తుండగా, భార్య పద్మ స్థానికంగా అంగన్‌వాడీ టీచర్‌గా విధులు నిర్వర్తిస్తుండేది.

కాగా..ఏడాది క్రితం ఆమె గర్భిణిగా ఉండి అనారోగ్యంతో మృతి చెందింది. వీరికి ఏడు సంవత్సరాల కుమారుడు యశ్వంత్‌ ఉన్నాడు. పిల్లాడితో కలిసి హైదరాబాద్‌కు వెళ్లి అక్కడే కూలి పని చేసుకొని జీవిస్తున్నాడు. అప్పుడప్పుడూ ఎర్రబోడుకు వచ్చి తన తల్లి కౌసల్య, తమ్ముడు రంగయ్య వద్ద రెండు మూడు రోజులు గడిపి తిరిగి వెళ్లేవాడు. కాగా..10 రోజుల క్రితం కుమారుడు యశ్వంత్‌తో ఎర్రబోడుకు వచ్చిన జంపయ్య మూడు రోజుల క్రితం కుమారుడిని తన అత్తగారి ఊరైన ఇల్లెందు మండలం నాయకన్‌గూడెం గ్రామంలో వదిలేసి వచ్చాడు. అప్పటి నుంచి ఎర్రబోడులోనే ఉంటూ..మద్యం సేవిస్తూ, మానసికంగా మదనపడుతూ, తనకు దయ్యం పట్టిందని, భయం భయంగా ఉందని, ఇంట్లో వారితో గొడవ పడుతుండే వాడు.

ఈ క్రమంలోనే గురువారం రాత్రి గ్రామంలో ఉన్న ఓ బెల్టు దుకాణం వద్ద మద్యం సేవించి బయటికి వెళ్లిన జంపయ్య శుక్రవారం మధ్యాహ్నం ఎర్రబోడు చెరువు సమీపంలో ఉన్న ఓ రైతు పొలంలో శవమై కన్పించాడు. ముఖం భాగంలో తీవ్రంగా రాయితో కొట్టినట్లు, చెయ్యి, కాలు మడెమల వద్ద విరిగిన భాగాలతో పాటు తీవ్ర రక్తస్రావం అయ్యి ఉండటం, తన చొక్కాతోనే ఉరి బిగించి చంపినట్లు..ఘటన స్థాలంలో స్పష్టంగా ఆనవాళ్లు కన్పిస్తున్నాయి. ఎర్రబోడు చెరువు సమీపంలో హత్యచేసి, ఆ పై మృతదేహాన్ని ఈడ్చుకొచ్చి ఇవతల వైపు ఉన్న పొలాల్లో వేసినట్లు స్థానికులు అనుమానం వ్యక్తం చేస్తున్నారు.

ఇది ముమ్మాటికీ హత్యేనని, జంపయ్య ఎవరితో గొడవ పడే వ్యక్తి కాదని, సౌమ్యుడిగా పేరుందని గ్రామస్తులు పేర్కొంటున్నారు. కాగా..ఆస్తి తగదాల విషయంలో ఏమైనా గొడవలు జరిగి..హత్యకు పాల్పడి ఉంటారా..? లేక.. ఇటీవల చేతబడి వంటి అపోహలు గ్రామంలో ఎక్కువగా విన్పిస్తుండటం..మృతుడి ముఖం భాగంలోనే రాయితో కొట్టి దంతాలు ఊడే విధంగా చేసి ఉండటం వంటి ఆనవాళ్లు..గ్రామస్తుల్లో పలు అనుమానాలకు తావిస్తోంది. ఘటనా స్థలానికి చేరుకున్న కారేపల్లి పోలీసులు కేసు నమోదు చేసుకొని దర్యాప్తు చేస్తున్నారు.

Advertisement
Advertisement

*మీరు వ్యక్తం చేసే అభిప్రాయాలను ఎడిటోరియల్ టీమ్ పరిశీలిస్తుంది, *అసంబద్ధమైన, వ్యక్తిగతమైన, కించపరిచే రీతిలో ఉన్న కామెంట్స్ ప్రచురించలేం, *ఫేక్ ఐడీలతో పంపించే కామెంట్స్ తిరస్కరించబడతాయి, *వాస్తవమైన ఈమెయిల్ ఐడీలతో అభిప్రాయాలను వ్యక్తీకరించాలని మనవి

Back to Top