బైక్‌ పైనే ఉన్నా.. ఇంటికి వచ్చేస్తున్నా..!

Man Dies In Road Accident At Rajam - Sakshi

ఫోన్‌ కట్‌ చేసిన కాసేపటికే ప్రమాదంలో వ్యక్తి మృతి 

తల్లడిల్లిన కుటుంబ సభ్యులు అంబకండిలో విషాదం

సాక్షి, రాజాం సిటీ: ఇంటికి వచ్చేస్తున్నాను.. మాటిమాటికి ఫోన్‌ చేయొద్దు.. బండిమీద ఉన్నాను.. అన్న మాటలు ఒక్కసారిగా ఆగిపోయాయి. మరో అరగంట తర్వాత కుటుంబ సభ్యులు మళ్లీ ఫోన్‌చేసినా ఫలితం లేకుండాపోయింది. శనివారం రాత్రి జరిగిన ప్రమాదంలో వ్యక్తి మృతి చెందిన ఘటన ఆదివారం వెలుగులోకి వచ్చింది. పోలీసులు తెలిపిన వివరాల ప్రకారం.. రేగిడి మండలం అంబకండి గ్రామానికి చెందిన వాడబోయిన పైడియ్య (30)కొబ్బరికాయలు వ్యాపారం చేసుకుంటూ జీవనం సాగిస్తున్నాడు. వృద్ధ తల్లిదండ్రులతోపాటు భార్య, ఇద్దరు చిన్నారులను కూడా కంటికిరెప్పలా కాపాడుకుంటూ వస్తున్నాడు. కార్తీకమాసం కావడంతో శనివారం కొబ్బరికాయలను అమ్మకం చేసి తిరిగి బైకుపై ఇంటికి వెళ్తున్న సమయంలో రాజాం మండలం శ్యాంపురం వెళ్లే దారిలో చెరువు గట్టుపై అదుపుతప్పి పంటపొలాల్లోకి పడిపోయాడు.

ఆ సమయంలో ఎవరూ లేకపోవడం, తలకు పెద్ద గాయం కావడంతో అక్కడికక్కడే మృతిచెందాడు. కొబ్బరికాయలు అమ్మి వేగంగా ఇంటికి వస్తానని చెప్పి వెళ్లిన కుమారుడు తిరిగిరాని లోకాలకు వెళ్లిపోయాడన్న వార్త విని కుటుంబ శోకసంద్రంలో మునిగిపోయింది. తండ్రి శివుడు, తల్లి నారాయణలు లబోదిబోమంటూ సంఘటనా స్థలానికి పరుగులు తీశారు. పిల్లలతో కన్న వారింట్లో ఉన్న భార్య శాంతి.. భర్త మరణించాడన్న వార్త తెలియడంతో సొమ్మసిల్లి పడిపోయింది. ఇంటికి పెద్ద దిక్కుగా ఉన్న పైడియ్య మృతి చెందడంతో కుటుంబ సభ్యులు కన్నీరుమున్నీరుగా విలపిస్తున్నారు. ప్రభుత్వం అన్ని విధాలా ఆదుకోవాలని గ్రామస్తులు కోరుతున్నారు. కుటుంబ సభ్యులు ఇచ్చిన ఫిర్యాదు మేరకు కేసు నమోదు చేశామని సీఐ జి.సోమశేఖర్‌ తెలిపారు. 

 

Read latest Crime News and Telugu News | Follow us on FaceBook, Twitter

Advertisement
Advertisement

*మీరు వ్యక్తం చేసే అభిప్రాయాలను ఎడిటోరియల్ టీమ్ పరిశీలిస్తుంది, *అసంబద్ధమైన, వ్యక్తిగతమైన, కించపరిచే రీతిలో ఉన్న కామెంట్స్ ప్రచురించలేం, *ఫేక్ ఐడీలతో పంపించే కామెంట్స్ తిరస్కరించబడతాయి, *వాస్తవమైన ఈమెయిల్ ఐడీలతో అభిప్రాయాలను వ్యక్తీకరించాలని మనవి

Back to Top