ఎస్బీఐ పండగ ఆఫర్లు
యోనో యాప్తో షాపింగ్ చేస్తే డిస్కౌంట్లు, క్యాష్బ్యాక్
న్యూఢిల్లీ: ప్రభుత్వ రంగ బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా (ఎస్బీఐ) పండగ సీజన్ సందర్భంగా తమ ఖాతాదారుల కోసం ప్రత్యేక ఆఫర్లు ప్రకటించింది. తమ యోనో (యూ ఓన్లీ నీడ్ వన్) యాప్ ద్వారా షాపింగ్ చేసినవారికి అదనంగా డిస్కౌంట్లు, క్యాష్ బ్యాక్ అందిస్తున్నట్లు పేర్కొంది. అక్టోబర్ 16–21 మధ్యలో ఎస్బీఐ క్రెడిట్, డెబిట్ కార్డులతో యోనో యాప్ ద్వారా షాపింగ్ చేస్తే 10% దాకా డిస్కౌంటు, క్యాష్ బ్యాక్ లభిస్తుంది. ఈ–కామర్స్ సైట్లు ఇచ్చే డిస్కౌంట్లకు ఇవి అదనం.
‘టాప్ 14 ఈ–కామర్స్ సంస్థలు .. ఫ్యాషన్ నుంచి ఫర్నిచర్ దాకా పలు ఉత్పత్తులపై సాధారణంగా 50% దాకా డిస్కౌంట్ ఇస్తున్నాయి. యోనో షాపింగ్ ఫెస్టివల్ (వైఎస్ఎఫ్)లో భాగంగా మా యాప్ ద్వారా ఎస్బీఐ క్రెడిట్, డెబిట్ కార్డులతో డిజిటల్ షాపింగ్ చేస్తే 10% దాకా డిస్కౌంట్లు, క్యాష్ బ్యాక్ అందిస్తున్నాం’ అని ఎస్బీఐ ఎండీ పి.కె. గుప్తా వెల్లడించారు.
ఎస్బీఐ కస్టమర్లందరికీ ఫైనాన్సింగ్ ఆప్షన్ కూడా ఉంటుందని ఆయన వివరించారు. అమెజాన్, జబాంగ్, మింత్రా, కల్యాణ్ జ్యువెలర్స్, క్యారట్లేన్, పీసీజే, పెపర్ఫ్రై, ఓయో, టాటా క్లిక్, యాత్రా, ఫస్ట్క్రై, ఈజ్మైట్రిప్, ఐజీపీ, ఫెర్న్స్ అండ్ పెటల్స్ సంస్థలతో వైఎస్ఎఫ్లో భాగంగా ఎస్బీఐ ప్రత్యేక ఒప్పందాలు కుదుర్చుకుంది.