ఆఫర్లే ఆఫర్లు

కడప కల్చరల్‌ : ఆఫర్లే ఆఫర్లు.. కొత్త సంవత్సరం వస్తూ వస్తూ ఆఫర్ల ఆనందాలను మోసుకొస్తోంది. నూతన సంవత్సరాన్ని ఆహ్వానిస్తూ డిసెంబరు 31న రాత్రంతా విందులు, వినోదాలతో ఆనదించేందుకు ఆసక్తి గల వారు ఏర్పాట్లు చేసుకుంటున్నారు. అలాంటి వారి కోసం హోటళ్లు, స్వీట్‌ స్టాళ్లు బోలెడు ఆఫర్లు ప్రకటించాయి. ఇలాంటి ప్రకటనలతో కూడిన ఫ్లెక్సీ హోర్డింగ్‌లను నగర కూడళ్లలో ఏర్పాటు చేశారు. రెండు బిర్యానీలకు ఒక బిర్యానీ ఫ్రీ.. కేజీ స్వీట్‌ కొంటే అర కిలో మిక్చర్‌ ఉచితం.. బిర్యానీ కొంటే కూల్‌డ్రింక్‌ ఉచితం.. ఇలా కొత్త సంవత్సరాన్ని స్వాగతిస్తూ జిల్లాలోని హోటళ్లు, స్వీట్‌స్టాళ్లు, బేకరీలు తమ అమ్మకాలను పెంచుకునేందుకు ఆఫర్లు గుప్పిస్తున్నాయి.

 వీటితో కూడిన ప్రచారాన్ని బ్యానర్లు, ఫ్లెక్సీ హోర్డింగ్‌లతో కూడళ్లను నింపేశారు. ఎటు చూసినా ఆ బోర్డులే కనిపించేలా జాగ్రత్తలు తీసుకున్నారు. ప్రచారంలో పోటీపడుతున్నారు. దుకాణాల వద్ద కొత్త కళ కనిపించేలా రంగురంగుల విద్యుత్‌ దీపాల సీరియల్‌ సెట్లను అలంకరించారు. తమ దుకాణాలు మిగతా వాటి కంటే ఆకర్షణీయంగా కనిపించేలా శ్రద్ధ తీసుకుంటున్నారు. కడప నగరంలోని ఏడురోడ్ల కూడలి, ఎన్టీఆర్, కోటిరెడ్డి సర్కిళ్లు, కృష్ణా సర్కిల్, ఎర్రముక్కపల్లె, అప్సర, పాతబస్టాండు సర్కిళ్లు ఇలా నగరంలోని ప్రముఖ కూడళ్లలన్నింటినీ భారీ ఫ్లెక్సీ, హోర్డింగ్‌లతో నింపేశారు. వాటిపై తాము ఆఫర్‌ చేస్తున్న వివరాలు పొందుపరిచారు.

ఆఫర్లు: బిర్యానీ ధర 25 శాతానికి తగ్గించారు. ఫ్యామిలీ ప్యాక్‌ బిర్యానీ తీసుకుంటే కూల్‌డ్రింక్‌ ఉచితంగా ఇస్తున్నారు. ఐదుగురు తినగలిగే బక్కెట్‌ బిర్యానీ ధరలో దాదాపు రూ. 150 వరకు తగ్గింపు ఇవ్వడంతోపాటు రెండు బట్టర్‌ నాన్, ఒక చికెన్‌కర్రీ, కూల్‌డ్రింక్‌ కూడా ఉచితంగా ఇస్తున్నారు. పార్శిల్‌ సౌకర్యం కూడా ఉందని ప్రకటించారు. నాన్‌ వెజ్‌ ఐటమ్‌లపై కూడా 25–40 శాతం తగ్గింపు ఇస్తున్నారు. మరికొన్ని హోటళ్లలో డిసెంబరు 31, జనవరి 1 సందర్భంగా బిర్యానీమేళా నిర్వహిస్తున్నారు. మరికొన్ని హోటళ్లలో ముందే టేబుళ్లు బుక్‌ చేసుకుంటే 30–50 శాతం బిల్లులో తగ్గిస్తున్నారు.

 ప్రముఖ స్వీట్‌ దుకాణాలలో కిలో స్వీట్‌ కొంటే అరకిలో మిక్చర్, అరకిలో స్వీట్‌ కొంటే పావుకిలో మిక్చర్‌ ఇలా ఆఫర్లు పెట్టారు. ఇంకొన్ని హోటళ్లలో రెండు బిర్యానీలకు ఒక బిర్యానీ ఫ్రీ, బిర్యానీలకు కూల్‌డ్రింక్‌ ఫ్రీ అంటూ భారీగా ఆఫర్లు గుప్పించారు. ప్రధాన కూడళ్ల చుట్టూ ఈ ఫ్లెక్సీ హోర్డింగ్‌లే ఉండడంతో అటు వైపు నుంచి వచ్చే వాహనాలు కనిపించడం లేదు. కడప నగరంలో ఇలాంటి ఫ్లెక్సీలు కుప్పతెప్పలుగా వెలిశాయి. ‘నయాసాల్‌’పై ప్రజల్లో ఉన్న ముఖ్యంగా యువతలో ఉన్న క్రేజ్‌ను సొమ్ము చేసుకునేందుకు వ్యాపారులు తమదైన శైలిలో ఈ ఆఫర్లను ప్రకటించడం విశేషం.