ప్రియుడి ఇంటి ఎదుట యువతి నిరసన

31 Aug, 2018 12:52 IST
పోలీసుస్టేషన్‌కు తల్లిదండ్రులతో వచ్చిన ప్రియాంక ప్రియుడి ఇంటి ఎదుట ప్రియాంక

ప్రకాశం, మార్కాపురం: కోచింగ్‌ సెంటర్‌లో పరిచయమై పెళ్లి చేసుకుంటానని నమ్మించి మాయమాటలు చెప్పి ఇప్పుడు ముఖం చాటేశాడంటూ ఓ యువతి తన ప్రియుడి ఇంటి ఎదుట నిరసనకు దిగింది. ఈ సంఘటన గురువారం సాయంత్రం పట్టణంలోని పూలసుబ్బయ్య కాలనీ ప్రాంతంలో ఉన్న రామాలయం వెనుక వీధిలో జరిగింది. వివరాలు.. అర్ధవీడు మండలం కాకర్లకు చెందిన దండు ప్రియాంక మార్కాపురంలోని ఓ కోచింగ్‌ సెంటర్‌కు ఉద్యోగ శిక్షణకు వెళ్తోంది.

అక్కడ మహేష్‌ అనే యువకుడితో ఏర్పడిన పరిచయం ప్రేమగా మారింది. పెళ్లి చేసుకుంటానని చెప్పి ఇప్పుడు తాను ఎవరో తెలియనట్లుగా ప్రవర్తిస్తున్నాడని ప్రియాంక ఆరోపిస్తోంది. మహేష్‌ ఇంటి ఎదుట నిరసనకు దిగింది. పోలీసులు సమాచారం అందుకుని ఆమెను పోలీసుస్టేషన్‌కు పిలిపించారు. తల్లిదండ్రులు యాకోబు, రంగమ్మలు తమ కుమార్తెకు న్యాయం చేయాలని పోలీసుస్టేషన్‌లో ఫిర్యాదు చేశారు. ఈ విషయమై ఎస్‌ఐ కోటయ్యను వివరణ కోరగా కేసు విచారిస్తున్నట్లు తెలిపారు.

Tags