సౌరమానం: ఈ వారం రాశి ఫలితాలు

రాశి ఫలాలు – 2019  

జన్మనక్షత్రం తెలియదా?  నో ప్రాబ్లమ్‌!  మీ పుట్టినరోజు తెలుసా? మీ పుట్టిన తేదీని బట్టి ఈవారం (మే 18 నుంచి 24 వరకు)  మీ రాశి ఫలితాలు

మేషం (మార్చి 21 – ఏప్రిల్‌ 19)

గాలి వీస్తున్నప్పుడు ఎలా ప్రమిదని వెలిగించలేమో, తోవంతా గోతులతో గొప్పులతో ఉంటే ఎలా వేగంగా ప్రయాణించలేమో అదే తీరుగా మనసు నిలకడగా లేని సందర్భంలో ఏ నిర్ణయాన్నీ ప్రకటించలేం. అలా కాకుండా నిర్ణయించిన పక్షంలో మళ్లీ మార్చుకోవాల్సిన అవసరమేర్పడుతుంది. దాంతో ఎవరికైనా చంచల స్వభావం కలవాడనే ఓ పేరు పడిపోతుంది. నిర్ణయాన్ని ప్రకటించలేననే నిర్ణయాన్ని ప్రస్తుతానికి తెలియజేస్తున్నానని దృఢంగా చెప్పండి. దాదాపుగా బయల్దేరేసాం! అనుకున్న ప్రయాణం కాస్తా ఆగిపోవచ్చు. అందుకు సిద్ధపడి ఉండండి తప్ప ‘అయ్యో’ తీరా బయల్దేరాక ఇదేమిటనే తీరు బలహీన మనస్తత్వంతో ఉండకండి. అలాగని ఎలాగూ ప్రయాణం ఆగిపోయేదే కదా! అనుకుంటూ ప్రయాణానికి సిద్ధమై లేకుండా ఉండద్దు.

అమృత ఘడియల్లో దుర్ముహూర్తం వస్తే అమృత ఘడియల ప్రకారం వాహనమ్మీద బయల్దేరతాం. దుర్ముహూర్తం కారణంగా వాహనానికి సరిగ్గా ఆ సమయంలోనే మరమ్మత్తు అవసరం వస్తుంది. అమృత ఘడియలు దుర్ముహూర్తం దాటాక కూడా ఉంటే వెంటనే మరమ్మతు పూరై్త అదే వాహనం మీద వెళ్లి పని పూర్తి చేసుకుంటారు.ఉద్యోగంలో పై స్థాయికి మీకు పదవీ ఉన్నతినిస్తామని పై అధికారులు చెప్తే అంగీకరించడం సరికాదు ప్రస్తుతానికి. మనశ్శాంతి లేకుండా చేసే కాలం ఇది కాబట్టి. సంతానానికి సంబంధించిన చదువులు బాగానే ఉంటాయి. తప్పనిసరిగా ధనవ్యయం అవుతుంది. ఆరోగ్యం కూడా మీకు అప్పుడప్పుడు వైద్యుడు అవసరమని గుర్తు చేస్తూ ఉంటుంది. జాగ్రత్త!

లౌకిక పరిహారం: జీతం ఎక్కువైనా హోదా ఎక్కువైనా ఈ రెండూ మనశ్శాంతి కంటె తక్కువే. 
అలౌకిక పరిహారం: ఆదిత్య హృదయ స్తోత్రం ముఖ్యం. 
 
వృషభం (ఏప్రిల్‌ 20 – మే 20)

కర్ణుడొక్కడు లేకపోతే ద్రౌపదీ వస్త్రాపహరణం ఉండేది కాదు– కురుక్షేత్రం దాకా కథ సాగిపోయేది కాదు కథ. శూర్పణఖ ఒక్కతి లేకుంటే రామరావణ విరోధం పెరిగేది కాదు. సీతాపహరణం ఉండేదే కాదు. అలాగే 8వ ఇంట శని (నిజానికి మంచి చేసేవాడే. అయితే తానున్న స్థానం 8 కదా మరి!) లేకుంటే మీ తెలివితేటలకీ నైపుణ్యానికీ ఇబ్బందులే ఉండేవి కావు. అయితే ఇప్పుడు కొంత జాగ్రత్త అవసరం. ముఖ్యంగా మొహమాటం– మాటని వెంటనే చెప్పేయకుండా నాన్చడం , పనిని చేస్తానని చెప్పి దురదృష్టవశాత్తూ మర్చిపోవడం వంటివి మంచిది కాదు. మీ కుటుంబ సభ్యులకి కూడా చెప్పండి. స్పష్టంగా సూటిగా అవగాహనంతోనే మాట్లాడాలని, లేనిపక్షంలో అపార్థాలకి తావు వస్తుంది. ఎలాగూ పరీక్ష తప్పుతానన్న వానికి ఫలితాలకోసమైన ఎదురు చూపే ఉండదు.

పరీక్షలలో ఉత్తీర్ణుడనైతాను గాని సరైన శాతం రాదనుకునే వారికి దిగులే లేదు. ఇక తప్పక ఎంతో గొప్పగా ఉత్తీర్ణుడనౌతాననుకున్న వానికే ఉత్తీర్ణతా శాతం తలకిందులైందని తెలిసినప్పుడే తీవ్రాతి తీవ్ర నిరుత్సాహానికి గురౌతాడు. అలాగే మీరు ఉద్యోగులైతే మీకు మంచి మెచ్చుకోలు లభించకున్నా– వృత్తికి చెందిన వారైతే తగిన గుర్తింపుకి నోచుకోక మీకంటె తక్కువ వానికి మన్నన లభించినా– వ్యాపారంలో లాభం మాట అటుంచి సరుకు అమ్మకమే కాకున్నా.. ఈ వారానికి తట్టుకోక తప్పదు మరి. ఆంజనేయుడంతటి అసామాన్యుడు స్వయంప్రభాదేవి గుహలో చిక్కుకుని ఇవతలకి రాలేక లోపలే ఉండిపోలేదా? కాలప్రభావం అంతే!క్షణాల్లో నిర్ణయాన్ని తీసుకోవాల్సిన సందర్భాలొస్తాయి. అప్పుడు ఏ నిర్ణయమూ ప్రకటించకుండా ఉండండి. అనుభవజ్ఞుల్ని సంప్రదించి చెప్పండి. 

లౌకిక పరిహారం: ఓటమికి సిద్ధపడి ఉండండి. 
అలౌకిక పరిహారం: శ్రీవిష్ణు సహస్రనామ పఠనం ఉత్తమం.

మిథునం(మే 21 –  జూన్‌ 20)
ప్రతి చిన్న పరాజయంతోనూ కొత్త కొత్త మెళకువలని ఓర్పుతో నేర్పుతో గ్రహించుకుని జాగ్రత్తగా జీవితాన్ని గడుపుకునే ఆలోచనతో ఉన్న మీకు ఇబ్బందులుండవు. అందుకే ఉద్యోగాన్ని సుఖంగా నిర్వహించుకుంటూ ఉంటారు– ఏదైనా పొరపొచ్చెం వచ్చినా పెద్దగా పట్టించుకోకుండా ఉంటారు. మీ సంస్థలో మీరు అజాత శత్రువుగా గుర్తింపుని పొందడం అంటే నిజంగా అది మీరు మీ ఇంట్లో కూర్చునే కూర్చీలోనే కూచున్నంత యథార్థం సహజ సాధారణం. ఎంత ఆనందం కలిగినా ఇతరులు మీతో ఎంత చనువుతో మెలుగుతున్నా ఎంతటి సహాయాన్ని వారు మీకు అందించినా ఎక్కడా ఎప్పుడూ కూడా మీ వ్యక్తిగత విషయాలని మాత్రం బహిరంగ పరుస్తూ సూచనలనీ సలహాలనీ అడక్కండి.

మన సంసార భవనపు మరో తాళం చెవిని వారికి పరోక్షంగా మనమే అందిస్తూ సర్వకాలాల్లోనూ మన సంసార పరిస్థితుల్ని చూస్తుండే అవకాశాన్ని కలిగిస్తున్నామన్నమాటే. స్నేహాలు దెబ్బతినేది ఇక్కడే. మీ అదృష్టం ఎంతదంటే నిజంగా గట్టి ప్రయత్నాన్ని చేయవలసి ఉన్నప్పటికీ కూడా సులభంగా అంతటి ప్రయత్నం వైపు దృష్టిని పెట్టకుండానే ఫలితాన్ని పొందేంత. కాబట్టి ఆ అదృష్టకాలంలో వచ్చిన అవకాశాలని వృథా పోనీయకండి. ఎప్పుడూ మనకి ధాన్యాన్ని అందించే పంటపొలంలో పాములూ తేళ్లూ ఇతర విషజంతువులూ ఉన్నట్లే వాటి మధ్యనే ఉంటూ జాగ్రత్తతో పొలం పనిని ముగించుకుని వస్తూండేటట్లూ మీరు చేస్తున్న వృత్తి ఉద్యోగ వ్యాపార క్షేత్రాల్లో కూడా ఇలాంటి విషబుద్ధులున్న వ్యక్తులు ఉంటూనే ఉంటారు. చూసి గమనించి దూరంగా తొలగి పోతుంటే నష్టం కష్టం ఉండదు. సమస్య పుట్టదు. 

లౌకిక పరిహారం: ఎంతలో ఉండాలో అంతలోనే ఉండండి. 
అలౌకిక పరిహారం: దుర్గాదేవీ స్తోత్రపఠనం ఉత్తమం. 
   

కర్కాటకం (జూన్‌ 21 – జూలై 22)

శ్రీమద్రామాయణం సుందరకాండలో ఆంజనేయ స్వామి ఆకాశానికి ఎగురుతున్న సందర్భంలో ఆయన కుడి చంకలో కొన్ని చెట్లు చిక్కుకున్న కారణంగా ఆకాశం వరకూ వెళ్లి కిందికి పడిపోయాయి. అయితే ఈ చెట్లకొమ్మలు తమలో ఇరుక్కున్న కారణంగా మరికొన్ని చెట్లు ఆంజనేయుని ఎడమ చంకలో ఇరుక్కుని ఆకాశం వరకూ వెళ్లి కింద పడ్డాయి. ఇదంతా ఎందుకంటే మీకు ప్రత్యక్షంగా సంబంధం ఏమాత్రమూ లేకున్నా మీకు సంబంధించిన వారితోపాటు మీరు కూడా న్యాయస్థానానికో రక్షకభటాలయానికో లేదా పెద్దల పంచాయితీకో వెళ్లవలసి రావచ్చు. వ్యతిరేకించకండి. చిన్నతనంగా భావించుకోకండి. చేతినిండుగా పుష్కలంగా ఆదాయం లభిస్తూ ఉంటుంది. పైగా మీరు సహజంగా పొదుపు పాటించే వారైన కారణంగా ఆర్థికమైన ఇబ్బంది ఈ వారంలో ఉండే వీలు లేదు మీకు.

బంధువులూ మిత్రులూ కలిసి ఎక్కడికో వినోదం విహారం విలాసం కోసం తిరిగే అవకాశం కూడా ఉండచ్చు. ఈ వారంలోనే మీకు సంబంధించిన ఓ సమస్య పరిష్కారమై అది మీకు ఆనందాన్ని కల్గించే ముగింపుగా మారి ఎంతో సంతోషాన్ని కల్గిస్తుంది. మీరొక్కరే ఓ నిర్ణయానికి రావడం కాకుండా సమష్టిగానే నిర్ణయాన్ని చేయనీయడం మంచిది. ఎంత ప్రశాంతంగా చేద్దామని అనుకున్నా ఏవేవో అనవసర సమస్యలు బుర్ర చుట్టూ తిరుగుతూ మనశ్శాంతిని కోల్పోతుండేలా చేయొచ్చు. జరిగే వ్యతిరేకతంటూ ఏదీ ఉండకపోవచ్చుగాని, ఏదో జరిగిపోతుందేమోననే ఆందోళన మాత్రం ప్రతి రక్తపు కణంలోనూ కలగచ్చు. కంగారు పడకండి. అందుకే పూర్వపు రోజుల్లో పెద్దలంటుండేవాళ్లు– వృద్ధజన సేవ అవశ్యం చేయాలనీ చేస్తూ ఉండాలనీనూ. ఈ రోజుల్లో మరి స్వయం రాజా స్వయం మంత్రే కదా!

లౌకిక పరిహారం: ఒక్కరే నిర్ణయాన్ని తీసుకోకండి. 
అలౌకిక పరిహారం: లలితా సహస్రనామ పఠనం అవశ్యం. 

సింహం (జూలై 23 – ఆగస్ట్‌ 22)

ఓ రెండు స్తంభాల మధ్య కట్టబడిన తాడు మధ్యలో తెగినట్లయితే, అలా తెగి రెండు తాడులుగా ఉన్న ఆ పరిస్థితిని చక్కబెట్టాలంటే, మరో తాడు ముక్కని తెచ్చి రెండు తాడుల్నీ కలుపుతూ కట్టాల్సిందే తప్ప, ఆ తెగిన రెంటినీ కొత్తతాడుని తేకుండా అక్కడే కలిపి ఒకటి చేద్దామనుకుంటే కుదరదు. కలిపి కట్టినా బలహీనంగానే ఉంటుంది. అలాగే మీకూ మీ బంధువుల్లో కొందరికీ వచ్చిన కొన్ని అభిప్రాయ భేదాలని మీరూ వారూ మాత్రమే కూర్చుంటే పరిష్కరింపబడవు. మధ్యలో చిన్నతాడు ముక్కలా మరొక ఉత్తముడు వచ్చి తీరాల్సిందే.మీకు పలుకుబడి అనూహ్యంగా పెరిగిపోతుంది. ఈ కాలంలోనే నిదానం అవసరం. పలుకుబడి ఉంది గదాని అయినదానికీ కానిదానికీ మీ పలుకుబడిని ఉపయోగిస్తూ పోకండి. ఒకప్పటి రోజుల్లో చెలమలు అని ఉండేవి.

మెల్లగా నీళ్లు అలా ఊరుతూ ఉంటే కొంత నీరు రాగానే వాటిని పట్టుకుంటూ బిందెని నింపుకుంటూండేవారు. అలాగే చాలా పొదుపుగా ఆ పలుకుబడిని వాడుకోండి. లేని పక్షంలో మీకే ఫలితం అనుభవంలోకి వస్తుంది.సాహసించే కార్యాలు చేయద్దు. సాహసంతో మాత్రమే చేయాల్సిన పనులుంటే వాటికి ప్రోత్సాహాన్ని కూడా చేయద్దు. వ్యాపారమే చేస్తూండే వారైనట్లయితే, నిషేధింపబడిన వస్తువులనీ – తగిన లెక్కలు సరిగా లేని వస్తువులనీ అధికమైన రాబడి కలుగుతుందనే దృష్టితో కొనకండి – అమ్మకండి. ముఖ్యంగా మీ కుటుంబ సభ్యుల్ని ఈ వ్యవహారంలో ఏ కోణంలోనూ భాగస్వాముల్ని చేయకండి.ఎవరి పేరునో ఉన్న భూముల పత్రాలనీ, వాహనాలనీ, వస్తువుల్నీ మీ ఇంట్లో ఉంచుకోకుండా జాగ్రత్తపడండి.

లౌకిక పరిహారం: మీది కాని దేన్నీ మీ ఇంట ఉంచుకోకండి.
అలౌకిక పరిహారం: గణపతి ఆరాధన తప్పనిసరి. 

కన్య (ఆగస్ట్‌ 23 – సెప్టెంబర్‌ 22) 

వెనకటికి పేదరాశి పెద్దమ్మ కథలని ఉంటూండేవి. అందులో ఒకడికి వరమిచ్చాడు శంకరుడు–నువ్వేది అనుకుంటే అదే అయిపోతుం–దని. సంతోషించిన భక్తుడు ఎన్నెన్నో మంచి వాటినే కోరుకున్నాడు గాని ఓసారి– ఆ వచ్చే పులి తనని తినేస్తుందేమో! – అనుకున్నాట్ట. అంతే! ఇక ఆ మనిషి లేడు – అదీ కథ. మీరు కూడా అలాగే మంచిని మాత్రమే కోరుకుంటూ ఉండండి తప్ప, మీ గురించిన చెడుని గాని, మీ శత్రువులకి చెడు జరగాలని గాని కోరుకోకండి. మీకియ్యబడిన వరం ఇతరులకి శాపంగా ఉండకూడదని గ్రహించండి.రోజూ దూరంలో ఉన్న తల్లిదండ్రులతో మాట్లాడుతూ ఉండండి. అత్తమామలతో కూడా వారానికొక్కమారైనా పలకరిస్తూ ఉండడం వల్ల అపార్థాలూ అభిప్రాయాలూ తలెత్తవు. గమనించుకోండి.

అత్తమామలతో విభేదించిన ఏ కోడలైనా ‘అత్త మామలతో మాట్లాడ్డం దేని?’–కంటూ తన పరిస్థితికే మిమ్మల్ని ఈడ్చబోతే నిష్ఠూరంగానే చెప్పండి – ఇలాంటి సలహాలని ఇచ్చి కుటుంబాల్లో ఇబ్బందులు తేకం–డని. నిప్పుని దూరంగా ఉంచినప్పుడే మనకి మనుగడ.పెద్దల ఆశీస్సులని పొందుతూ ఉండండి. ఇతరుల వ్యవహారాల్లోకి తలదూర్చకండి. సలహాలనీ సూచనలనీ ఇయ్యడం, ఫలానివారు బాగా తెలుసుననడం... వంటి కొత్త పనుల్ని చేపట్టకండి. ఆర్థికంగా ఎవరైనా అప్పునడిగితే బీద పలుకుల్ని పలకడానికి వెనుకాడకండి. ఏదో వస్తువు మీదనైనా సొమ్ముని రుణంగా ఈయవలసిందని బతిమిలాడినా ‘అంత సొమ్మా!’ అని ఆశ్చర్యబోతూ పనిని పూర్తిచేయకండి.పిల్లల ప్రవర్తన, విద్యాశాతం చక్కగా ఉంటూండటంతో ఆనందంగా ఉంటారు. ఆరోగ్యం గురించి తరచూ పరామర్శిస్తూ ఉండండి.

లౌకిక పరిహారం:  తల్లిదండ్రులతో సమంగా అత్తమామలతో వ్యవహరించండి.
అలౌకిక పరిహారం: లలితాసహస్ర నామాలు మంచిది. 

తుల(సెప్టెంబర్‌ 23 –అక్టోబర్‌ 22) 

నిజానికి అరటిచెట్టు కాపుకొచ్చేసరికి దాదాపు 7 నెలల కాలం పడుతుంది గాని, ఏడాకుల అరటిచెట్టయితే 3 నెలల్లో కాపుకొచ్చేస్తుంది. అలాగే మామాడి చెట్టయితే 5 సంవత్సరాల కాలాన్ని తన రుచికరమైన పండునందించడానికి తీసుకుంటుంది గాని ఒక తీరు తీయమామిడి (సహకార ఫలం) జాతి చెట్టయితే 2 సంవత్సరాల్లోనే పండ్లనందించేస్తుంది. సరిగ్గా అలాగే మీరు చేసిన తీవ్ర ప్రయత్నాల కారణంగా ఫలితం అనుకున్న సమయాని కంటే ముందుగానే లభించేస్తుంది. ఫలితం ముందుగా వచ్చిందని ఆనందపడటం కంటే, మానసిక ఆందోళనకి తొందరగా తెరపడిందని సంతోషించండి. మానసిక ఆందోళనకి మించిన మృత్యు సమాన వేదన లేదని బాణకవి తన కాదంబరిలో రాశాడు. కుటుంబ అభివృద్ధి కోసం మీరు పడుతున్న వేదన అంతా ఇంతా కాదు.

ఈ పరిస్థితిని తెచ్చుకోకుండా చేసుకోగల నేర్పరితనం మీలో లేకపోలేదు. అయితే ఓ పదిమంది సలహాలు, సూచనలు ప్రశ్నాసమాధానాలు బుజ్జగించి తమ తోవకి తిప్పుకోవడాలు... వంటివన్నీ సాగాక మీరు ఇలా కఠినంగా అయ్యుంటారు గాని నిజానికి మీ సహజ సాధారణ మనస్తత్వం ఇది కానే కాదు.‘ఎంతో శ్రమపడుతూ కుటుంబాన్ని లాక్కొస్తోంది – లేదా లాక్కొస్తున్నా’డనే ప్రశంసలకి మీకు ఆనందం కలగచ్చు గాని ఆ తీరు ప్రశంసలని మీరు పొందాల్సిన అవసరం ఏమొచ్చింది? ఎలా వచ్చిందని గాని ఆలోచిస్తే ఒక్క క్షణంలో చిన్న అడుగుని పక్కకి వేసి ఆ బాటలోనే ప్రయాణిస్తూ వెళ్లిపోయినందుకే కదా అనే అంశం మీకు గుర్తుకొస్తుంది.మంచి కీర్తి ప్రతిష్ఠలు అబ్బుతాయి. చేస్తున్న వృత్తి, ఉద్యోగ, వ్యాపారాల్లో అనుకూల పరిస్థితులే ఉంటాయి. కొద్దిపాటి అనారోగ్యం తప్పక పోవచ్చు. వాహనాల విషయంలో భద్రం సుమా! 

లౌకిక పరిహారం: మీ భవిష్యత్తు మీ నిర్ణయంలోనే ఉంది. ఆలోచించుకోండి.
అలౌకిక పరిహారం: అర్ధనారీశ్వర స్తోత్ర పఠనం మంచిది. 

వృశ్చికం (అక్టోబర్‌ 23 – నవంబర్‌ 21)

చాణక్యుడు తన రాజనీతి తంత్ర గ్రంథంలో – ఏకైక స్యాపి నిర్ణయో దోషాయ భవతి – ఎంత గొప్పవాడనిపించుకున్నవాడైనా తానొక్కడే గాని నిర్ణయాన్ని చేస్తే తప్పక అది దోషమే అవుతుందని రాశాడు. చాణక్యుడంటే అర్థ శాస్త్రవేత్త కాబట్టీ అనుభవజ్ఞుడు కూడా కాబట్టీ ఈ ఆలోచనని బుద్ధిలో పెట్టుకుని మీకు మీరే ఓ నిర్ణయానికి వచ్చేయకండి. వర్షం రానప్పుడు, నేల మరింత గట్టిపడి ఉన్నప్పుడు నాగలి కర్రుని మరింత బలంగా నేలలోకి దిగి దున్నేలా చేయడం కోసం బలమైన నాగలినీ, దృఢమైన ఎద్దులనీ పూన్చి దుక్కి చేసిన తీరుగా చిన్న పని అని అనిపించిన పనిని కూడా ఎంతో సహాయ సంపత్తులతో సిద్ధమై పూర్తిచేయండి. వనమనగానే క్రూరమృగాలుంటాయనేది నిజమౌతూంటే, పులుల వనమని పేరుపడ్డ వనంలో ఒంటరిగా ప్రయాణం చేయడం సబబౌతుందా? కాబట్టి గట్టి ప్రయత్నంతో విశేష శ్రమతో పనికి సిద్ధం కండి.

సంస్కృతంలో ‘అర్ధోక్తి’ అనే మాట ఒకటుంది. పూర్తిగా ఓ విషయాన్ని చెప్పాలని మనసులో అనుకుని కొద్దిగా చెప్పడాన్ని ప్రారంభించి మళ్లీ అందులోనే ఒక సంశయం వచ్చిన కారణంగా ఏదేదో మాట్లాడి – తాను ముందు మాట్లాడిందంతా అర్థం కాకుండా చేసెయ్యడం – అంతేకాక మాటల్ని మధ్యలో ముగించేయడం అని దానర్థం. మీరు అలా మాట్లాడకుండా సూటిగా, స్పష్టంగా అవగాహనతోనే మాట్లాడండి. ఒకవేళ పూర్తిగా విషయాన్ని చెప్పకూడదనిపిస్తే అసలు మాటల్ని ప్రారంభించనే ప్రారంభించకండి.జీవిత భాగస్వామితో మనఃస్పర్ధలు లేకుండా చేసుకోవాలనే గాని అనిపిస్తే దాన్ని అమలు చేయడం అనేది ఏమాత్రపు కష్టమైన పనీ కా(బో)దు. ఇది మంచి అనుకూల సమయం. ఆప్తులెవరైనా తప్పదని నిర్బంధించిన సందర్భంలో మధ్యవర్తిత్వాన్ని వహించి ఆ వ్యవహారాన్ని న్యాయబద్ధంగా పూర్తిచేయవచ్చు.

లౌకిక పరిహారం: మనఃస్పర్ధల్ని తొలగించుకోదలిస్తే ఇది అనుకూల సమయం.
అలౌకిక పరిహారం: శని శ్లోకాన్ని రోజుకి 361 మార్లు పఠిస్తూ ఉండండి. 

ధనుస్సు (నవంబర్‌ 22 – డిసెంబర్‌ 21)

భార్యాభర్తల అనుబంధం గట్టి పడాలంటేనూ ఎప్పటికప్పుడు చిగురు తొడుగుతూ ఉండాలంటేనూ ఇద్దరి మధ్యలోనూ ఏ విధమైన దాపరికాలూ ఉండకూడదు. నిజానికి ఏ దాపరికమూ లేకుండానే కాపురం చేసుకోవాలని ఇద్దరూ జీవితాన్ని ప్రారంభిస్తారు గాని ఇటు తల్లీ అటు తల్లీ అనే ఇద్దరూ ఇటువైపున అటువైపున చేరి ఏమేమో సలహాలిస్తూ ‘దాచిపెట్టా’లనే ఆలోచనని బలంగా ఇద్దరికీ కలిగించేస్తారు. ఇదే పరిస్థితి మీ కాపురంలో ప్రస్తుతం ఉండచ్చు కాబట్టి ఇద్దరూ కలిసి ఇద్దరు తల్లులతోనూ మాట్లాడే సందర్భాలని ఏర్పాటు చేసుకోండి. సంసారం మీది. ఆనందం మీది. పానకంలో పుడకలెందుకు మీ మధ్యలో. అలాగని మేం ‘తల్లులకి చెప్పకుండా ఉంటే ఇబ్బందుల్లో పడమా?’ అనిపిస్తుంది మీకు. అందుకే ఇద్దరూ కలిసి ఆ ఇద్దరు తల్లులతోనూ కలిపి మాట్లాడుకుంటూ ఉండండి.

కాపురాలు నిలవాలంటే ఇదే మూలసూత్రం.నిస్సా్వర్థంగా మాట్లాడేవాళ్లూ పెద్దరికంతో ఉంటూ పదిమంది కాపురాలు నిలబెట్టాలనే మనస్తత్వం కలవాళ్లూ అయిన దంపతులతోనే స్నేహాలు చెయ్యండి. భార్యాభర్తల మధ్య కలహం సాగుతున్నవాళ్లూ, అలాగే విడిచివేసిన కారణంగా దంపతులు వేర్వేరుగా ఉంటున్నవాళ్లూ, కనిపిస్తే చాలు తమ జీవిత భాగస్వామి (ని) న్యాయస్థానంలో ఓడిపోతే బాగుంటుందనే ఎదురుచూపుతో ఉండేవాళ్లతో స్నేహం వద్దే వద్దు. అంటువ్యాధి అనేది సూక్ష్మంగా ప్రారంభమై శరీరం మొత్తాన్ని గుల్ల చేసేస్తుంది.చేయాల్సిన పనినే ఓసారి చేసి, ఆ చేసిన పని మీకే నచ్చని కారణంగా మళ్లీ చేస్తారు. కొంత నిర్లక్ష్య భావం, మరికొంత మానసిక గ్లానితనం, ఇంకొంత నిరుత్సాహ భావం... ఇలా ఇన్నీ కలిసి పనిలో స్పష్టత, శుభ్రత తిరిగి అదే పనిని చేయనవసరం లేని స్థితి పోయి పూర్తిగా అపకీర్తి పాలు కావచ్చు.

లౌకిక పరిహారం: ప్రతీకార బుద్ధితో ఉండకండి. దాంపత్య ఐకమత్యం అవసరం.
అలౌకిక పరిహారం: శని స్తోత్రాన్ని 19 మార్లు చదవండి ప్రతిరోజూ. 

 మకరం (డిసెంబర్‌ 22 – జనవరి 19)

నిచ్చెననెక్కితే గాని అటక మీద వస్తువులు ఏవున్నాయో, ఏవి లేవో, ఏవి ఏ స్థితిలో ఉన్నాయో వివరంగా కన్పించనట్టుగా గత అనుభవాల కారణంగా మీకు బుద్ధి మరింతగా వికసించి ఏది చేయకూడదు, ఏది చేయదగినది.. అనే ఈ విశేషం ఎవరో పెద్దల్ని అడగనక్కర్లేకుండానే తెలిసిపోతుంది. అయితే ఇది మంచిదా? కాదా? అనే తీరు నిర్ణయం కోసమే ఎవరో ఒక ఆప్తుల్ని అడుగుతారంతే. చక్కని ఆలోచన అభివృద్ధి జీవితంలో వస్తుంది. దగ్గరివాళ్లంటే లెక్కలేనితనంతోనూ, మీకున్న సహజకోపం కారణంగా నోటికి ఎంతొస్తే అంతా మాట్లాడే విధానంతోనూ ఉన్న మీరు పూర్తిగా పంథాని మార్చుకుని దూరం దగ్గర అనే భేదం లేకుండా అందరితోనూ దగ్గరగా ఉంటూ ఎవరినీ తూలనాడుకోరు. చేతికొచ్చినట్టుగా వ్యయం చేసేయడమనేదాన్ని నియంత్రించుకోవలసి ఉంటుంది.

చేస్తున్న వ్యాపారానికి తోడుగా ఏ పెద్దవాళ్ల నెలసరి పింఛనో లేదా మరేదో తీరుగా నెలసరి ఆదాయం అదనంగా వచ్చే వీలుంది. మరొక్కరి సొమ్ము ఓ రూపాయిని మీరు అనుభవించినా ముందు నాటికి మాట పడవలసి వస్తుంది కాబట్టీ, అది మీకు సుతరామూ నచ్చని విషయం కాబట్టీ డబ్బు విషయంలో జాగ్రతగా ఉండండి. ‘ఇది కూడ మీదే– అనుభవించం’డని నెలసరి ఆదాయం మిమ్మల్ని ప్రోత్సహించినా నలుగురిలో అవమానమనేది దీని వల్లే వచ్చే వీలుంది కాబట్టి తగు మాత్రపు హెచ్చరికతోనే ఉండండి. ఇది ఏదో చాదస్తమనుకోకండి. పర్ణశాల అనేది ఉండేందుకు వసతినిచ్చేదే. పాక అయినా డాబా అయినా మేడ అయినా మహా భవనమయినా ప్రయోజనం మాత్రం ఒకటే. కొత్తగా మనింటికొచ్చిన శిశుసంతానానికి కొనే వస్తువుల్లో ధరల పరిమితిని మించకుండా ఉండడం మంచిది. 

లౌకిక పరిహారం: ఎవరి నుండో వచ్చిన సొమ్ము ఎంతైనా ఎంచి మరీ ఖర్చు చేయాలి. 
అలౌకిక పరిహారం: ఆంజనేయ స్తుతి సకల ప్రయోజనప్రదం. 

కుంభం(జనవరి 20 – ఫిబ్రవరి 18) ఆడబోయిన తీర్థం ఎదురైంది (స్నానం చేద్దామని నది కోసం వెతుకుతూంటే ఆ నదిపాయ అక్కడే కన్పించింది) అన్నట్టుగా ఏదో పెళ్లికో ఉత్సవానికో వెళ్తూంటే ఎవరికోసం ఎదురు చూస్తున్నారో వాళ్లే అక్కడ కన్పిస్తారు. శుభకార్యానికి పుష్కలంగా అవకాశాలు కన్పిస్తున్నాయి కాబట్టి వీలయినంత పొదుపుగా వ్యయం చేసుకుంటూ ఉండడం మంచిది. స్వయంగా ఆలోచించగలశక్తి ఉండీ కూడ ఎవరెవర్నో అడగడం, అమలు చేద్దామని ప్రయత్నించండి, మళ్లీ అందులో కొన్ని తేడాలని గుర్తించి మీరు ఆలోచించిన మార్గాన్నే మంచిదని నిర్ణయించుకుని ప్రయాణించడం మానండి. అనవసర కాలయాపన కదా! ధైర్యంగా ఓ నిర్ణయాన్ని తీసుకుని సాగిపొండి. ప్రస్తుతం దశ బాగానే నడుస్తోంది. భూములూ స్థలాలూ వాహనాలూ కొనుగోలు చేయాలనే ఆలోచన బలంగా వస్తుంది, రావచ్చు.

అయితే శుభకార్యానికి కావలసిన సొమ్ముని దృష్టిలో ఉంచుకుని మాత్రమే వ్యయం చేసుకోండి. మీ నైపుణ్యం నేర్పరితనం కారణంగా మీ వృత్తిలో మంచి గుర్తింపు వసుతది. ఆ గుర్తింపు ఆధారంగా మీ అమ్మకాలు పెరగచ్చు. అంత మాత్రాన ధరలని పెంచడం సరికాదని గుర్తించండి. వ్యాపారమనేది పోటీ తత్వంతో సాగే కారణంగా ఒక్కసారి దిగుదల వైపు పోతే పునరుద్ధరించుకోవడం కష్టం. వ్యాపారం చేయని వాడూ చేయలేనివాడూ – ధరల పెంపు మంచిది– వంటి ఉచిత సూచనలు చేఊసి పక్కకి జరుగుతాడు. గమనించుకోండి. ఆధ్యాత్మిక కార్యక్రమాల్లో పాల్గొనాలనుకోవడం, దేవాలయ దర్శనాఉల (పుణ్యక్షేత్ర) ప్రదేశాలకి వెళ్దామనుకునే ఊహతో తగిన ఏర్పాట్లని చేసుకోవడాలూ వంటివి మంచిదే కాని శ్రుతి మించి ‘అతి’ అయితే రోజువారీ పనులు దెబ్బతినచ్చు. 

లౌకిక పరిహారం: శుభకార్యాన్ని దృష్టిలో పెట్టుకుని ఖర్చు చేసుకోండి.
అలౌకిక పరిహారం: శివాభిషేకం ఉత్తమం. 

మీనం (ఫిబ్రవరి 19 – మార్చి 20)

శ్రీ మద్రామాయాణంలో భరతుడు రామచంద్రుణ్ణి రాజ్యపరిపాలన నిమిత్తం ఆహ్వానించదలిచి చిత్రకూటానికి వెళ్లదలిచి – మార్గాల పల్లాలని పూడ్చెయ్యండి, ఎత్తుల్ని తవ్వేసి సరిచేయండి, అవసరమైన చోట్ల తాడికర్రలతో వంతెనలని వేయండి.. అంటూ ఆజ్ఞ చేసాడు. సరిగ్గా ఇదే తీరులో మీరు కూడ ఇంటి మరమ్మతులూ అలాగే వ్యాపార స్థలంలో మార్పులూ చేర్పులూ చేయాలని గట్టిగా సంకల్పించి దాదాపుగా పూర్తి చేస్తారు పనులని. సంతానం విద్యలో క్రమక్రమంగా నైపుణ్యాన్ని చూపిస్తూ మీకు ఆశాజన కంగా ఉంటారు. బాగానే మోస్తూ పరుగెత్తుతోంది గదాని గుర్రం మీద ఎన్నెన్నో బరువుల్ని వేస్తూ మీరు స్వారీ చేయబోతే అకస్మాత్తుగా ముందుకాళ్లని నేలకి మడిచి చతికిలపడిపోవచ్చు. అందుకని సంతానానికి చదువు చదువంటూ విరామం లేకుండా చిత్తడి చేయకండి.

ఉత్సాహమున్న మేక తనంత తానే పొలంలో ఆకుల్ని మేయడం కోసం దూరమైనా ప్రయాణిస్తుంది గాని, తగిన ఉత్సాహం లేకుంటే పక్కనున్న చిగుళ్లవైపు కూడ దృష్టిని సారించదు. కాబట్టి సంతానాన్ని ఉత్సాహపరచండి. ఆరోగ్యం యధాపూర్వంగా ఉంటుంది. మార్పులుండవు. లోకంలో అందరూ కూడ అన్నిటిలోనూ గొప్పది ధనమన్నీ, ఆ మీదట గొప్పదీ విలువైనదీ విద్య అనీ భావిస్తారు. అది సరికాదు. ధనాన్ని ఖర్చు చేసుకుంటూ తిరిగి సంపాదించుకోగలం కొంతలో కొంతనైనా. విద్యని ఖర్చు చేస్తుంటే విజ్ఞానం అభివృద్ధి అవుతుంది. అదీ మంచికే. అయితే ఈ రెంటికంటె విలువైనది సమయం. దీన్ని మనం ఖర్చు చేయనవసరం లేదు. చిల్లు పడ్డ కుండనుండి కారిపోయేటట్లుగా సమయం దానంతట అదే వ్యయమౌతుంది. మీరు అలా వృధా కాలక్షేపం చేస్తున్నారేమో గమనించుకోండి. 

లౌకిక పరిహారం: సమయపాలన తప్పనిసరి అని భావించండి.
అలౌకిక పరిహారం: దుర్గాదేవీ స్తోత్రం మంచిది.  

డా‘‘ మైలవరపు శ్రీనివాసరావు
జ్యోతిష్య పండితులు

Advertisement
Advertisement

*మీరు వ్యక్తం చేసే అభిప్రాయాలను ఎడిటోరియల్ టీమ్ పరిశీలిస్తుంది, *అసంబద్ధమైన, వ్యక్తిగతమైన, కించపరిచే రీతిలో ఉన్న కామెంట్స్ ప్రచురించలేం, *ఫేక్ ఐడీలతో పంపించే కామెంట్స్ తిరస్కరించబడతాయి, *వాస్తవమైన ఈమెయిల్ ఐడీలతో అభిప్రాయాలను వ్యక్తీకరించాలని మనవి

Back to Top