'చహల్‌' మాయాజాలం భారత్ ఘనవిజయం

‘ఆరో నంబర్‌’ ఆటగాడు అద్భుతం చేశాడు. తన మణికట్టు మాయాజాలం చూపిస్తూ చిన్నస్వామి మైదానంలో చరిత్రను తిరగరాశాడు. గుగ్లీలు, ఫ్లిప్పర్లతో ఇంగ్లండ్‌ బ్యాట్స్‌మెన్‌ను విలవిల్లాడించిన యజువేంద్ర చహల్‌ భారత జట్టుకు ఆహా అనిపించే గెలుపును అందించాడు. తన తొలి ఓవర్లో వికెట్‌తో శుభారంభం... మూడో ఓవర్లో వరుస రెండు బంతుల్లో కీలక బ్యాట్స్‌మెన్‌ను అవుట్‌ చేసి ప్రత్యర్థి కోట బద్దలు... చివరి ఓవర్లో మరో మూడు వికెట్లు... గతంలో ఏ భారత బౌలర్‌కూ సాధ్యం కాని రీతిలో ఆరు వికెట్లతో లెగ్‌స్పిన్నర్‌ చహల్‌ ఆటాడుకున్నాడు. టెస్టులు, వన్డేల బాటలోనే ఇంగ్లండ్‌తో టి20 సిరీస్‌ కూడా గెలిచి భారత్‌ తమ విజయాల జోరును పరిపూర్ణం చేయగా, ఇంగ్లండ్‌ నిరాశతో పర్యటనను ముగించింది.