రైల్వేస్టేషన్ వద్ద పేలుళ్లు.. 86 మంది మృతి

టర్కీ రాజధాని అంకారాలో రైల్వేస్టేషన్ సమీపంలో జరిగిన జంట పేలుళ్లలో 86 మంది మరణించారు. మరో 180 మంది  గాయపడ్డారు. ఈ విషయాన్ని దోగన్ న్యూస్ ఏజెన్సీ తెలిపింది. వామపక్ష సంఘాలు, కుర్దిష్ అనుకూల విపక్ష పార్టీలు తలపెట్టిన శాంతి ర్యాలీ లక్ష్యంగా ఈ పేలుళ్లు జరిగాయి. మృతుల్లో ఎక్కువమంది శాంతియాత్రలో పాల్గొనేందుకు వచ్చిన కార్యకర్తలే ఉన్నారు. చెల్లాచెదురుగా పడి ఉన్న వారి మృతదేహాలు, వారి పక్కన శాంతిని ఆకాంక్షిస్తూ నినాదాలు రాసివున్నఫ్లకార్డులతో ఆ ప్రాంతమంతా భీతావహంగా ఉంది.

ఈ ఘటనను తీవ్రంగా ఖండించిన టర్కీ ప్రభుత్వం.. పేలుళ్ల వెనుక ఉగ్రవాదుల హస్తం ఉండవచ్చునని అనుమానం వ్యక్తం చేసింది. పేలుళ్ల ప్రదేశాన్ని పోలీసులు తమ అధీనంలోకి తీసుకొని తనిఖీలు జరుపుతున్నారు. పెద్దసంఖ్యలో గాయపడిన వారిని సహాయక సిబ్బంది ఆస్పత్రులకు తరలించి చికిత్స అందిస్తున్నారు.